މާފުށި ޖަލުގައި ހިންގާ ފިހާރައިން އެ ތަނުގައި ދިރިއުޅޭ ގައިދީންނަށް ގަނެވޭ ސާމާނުގެ ތަފްސީލު ހާމަކުރަން މޯލްޑިވްސް ކަރެކްޝަނަލް ސާވިސް އިން ދެކޮޅު ހަދައިފި އެވެ.
މައުލޫމާތު ހޯދައި ލިބިގަތުމާ ގުޅޭ (އާރްޓީއައި) ގާނޫނުގެ ދަށުން މާފުށި ޖަލުގެ ގައިދީންނަށް ވިޔަފާރިކުރެވޭ ސާމާނުގެ ތަފްސީލުތައް ހޯދަން އަދަދު އިން އެދުމުން ކަރެކްޝަނުން ބުނީ އެ މައުލޫމާތަކީ ސިއްރު ހިފަހައްޓަންޖެހޭ މައުލޫމާތެއް ކަމަށެވެ.
އާރްޓީއައި ރިކުއެސްޓުގައި އެދިފައިވަނީ މާފުށި ޖަލުގެ ގައިދީންނަށް ވިޔަފާރި ކުރެވޭ ސާމާނު ހިމެނޭ ލިސްޓު އަގުތަކާއެކު ހިއްސާކުރުމަށާއި އޭގެ ތެރެއިން ޖޫން 1، 2026، ގެ ނިޔަލަށް ސްޓޮކް ހުސްވެފައި ހުރި ސާމާނުގެ ތަފްސީލާއި، އެ މުއްދަތުގެ ތެރޭގައި ސްޓޮކް ހުސްވެފައި ހުރި ސާމާނު ނުލިބޭތާ ފާއިތުވި ދުވަހުގެ އަދަދު ހޯދުމަށެވެ.
މި ނޫހަށް އެނގިފައިވާ ގޮތުގައި މާފުށި ޖަލުގެ ގައިދީންނަށް ވިޔަފާރިކުރެވޭ ލިސްޓުގައި ހިމެނޭ ގިނަ އަދަދެއްގެ ތަކެތި ނުލިބި އެތަކެއް ދުވަހެއް ވަނީ ފާއިތުވެފަ އެވެ. އެކަމާ ގުޅިގެން ގައިދީންގެ އާއިލާތަކުން ސޯޝަލް މީޑިއާގައި ކަންބޮޑުވުން ފާޅުކޮށްފައި ވެސް ވެ އެވެ.
ގައިދީންނަށް ވިޔަފާރި ކުރެވޭ ސާމާނުގެ ތެރެއިން ހުސްވެފައިވާ ތަކެތީގެ ތެރޭގައި ކޮސްމެޓިކްސް އާއި ބައެއް ކާބޯތަކެތި ވެސް ހިމެނޭކަން އެނގިފައިވެ އެވެ.
މާފުށި ޖަލުން ގައިދީންނަށް ވިޔަފާރިކުރެވޭ ތަކެތި ފޯރުކޮށްދިނުމަށް ހަވާލުކޮށްފައިވަނީ ޕްރިޒަން ކޯޕަރޭޓިވް ސޮސައިޓީ (ޕްރިސްކޯ) އާ އެވެ. އެނގިފައިވާ ގޮތުގައި ޕްރިސްކޯއިން އެ ތަކެތި ފޯރުކޮށްދެނީ އެހެން ކުންފުންޏަކާ ހަވާލުކޮށްގެންނެވެ.
ގައިދީންނަށް ވިޔަފާރި ކުރެވޭ ސާމާނު ފޯރުކޮށްދިނުމަށް ޕްރިސްކޯއާއެކު 10 އަހަރުގެ އެއްބަސްވުމެއް ހެދީ ފެބްރުއަރީ 1، 2018، ގަ އެވެ. އެ އެއްބަސްވުމުގެ މުއްދަތު ހަމަވާނީ ފެބްރުއަރީ 31، 2028، ގަ އެވެ.
