ގދ. މާވަރުލުގައި އެއާޕޯޓެއް ތަރައްގީ ކުރުމަށް ވެފައިވާ އެއްބަސްވުން ބާތިލްކޮށްފައި ވަނީ ރަނގަޅަށް ކަމަށް ކަނޑައަޅައި، ބަދަލު ދޭން ނުޖެހޭނެ ކަމަށް ސުޕްރިމް ކޯޓުން ހުކުމްކޮށްފި އެވެ.
މާވަރުލުގައި ޑޮމެސްޓިކް އެއާޕޯޓެއް އެޅުމަށް މޫވިންގް އިންޓަނޭޝަނަލްއާއި ހަވާލުކުރެވުނީ 27 ޖޫން 2011ގަ އެވެ. އެހެން ނަމަވެސް, އެއާޕޯޓު ހިދުމަތް ފެށުމަށް ކަނޑައެޅި ތާރީހާއި ހަމައަށް އައިރުވެސް މަސައްކަތް ނިމިފައި ނުވާތީ ދައުލަތުން ވަނީ އެ ކުންފުންޏާއެކު ހެދި އެއްބަސްވުން ބާތިިލްކޮށްފަ އެވެ.
އެއީ އެއްބަސްވުމާ ހިލާފަށް ނިންމި ނިމުމެއް ކަމަށް ބުނެ މައްސަލަ މޫވިންގް އިންޓަނޭޝަނަލް އިން ސިވިލް ކޯޓަށް ހުށަހެޅި އެވެ. ކޯޓަށް ހުށަހެޅީ އެއްބަސްވުން ބާތިލްކުރުމުގެ ސަބަބުން އެ ކުންފުންޏަށް ލިބުނު ކަމަށް ބުނާ ގެއްލުމުގެ ބަދަލު ހޯދުމަށެވެ.
ސިވިލް ކޯޓަށް 2016 ވަނަ އަހަރު ހުށަހެޅި މައްސަލަ ނިމުނީ ދައުލަތާ އެއްކޮޅަށެވެ. އެ ނިންމުމުގައި ވަނީ ދައުލަތުން އެ އެއްބަސްވުން ބާތިލްކޮށްފައި ވަނީ އެގްރިމެންޓްގައިވާ ގޮތަށް ކަމަށެވެ. ހައިކޯޓުގައި ވެސް މައްސަލަ ނިމުނީ ދައުލަތާ އެއްކޮޅަށެވެ.
ހައިކޯޓުގެ ނިންމުން ސުޕްރިމް ކޯޓުގައި އިސްތިއުނާފް ކުރީ މިދިޔަ އަހަރު އެވެ.
ސުޕްރީމް ކޯޓުގައި އިސްތިއުނާފުކުރުމަށް ހުށަހަޅާފައިވާ ފުރަތަމަ ސަބަބެއްގެ ގޮތުގައި ފާހަގަކޮށްފައިވަނީ، ހައި ކޯޓުގެ ނިންމުމަކީ ގާނޫނުއަސާސީގެ 40 ވަނަ މާއްދާއާއި، މުގާބިލެއް ނެތި ދައުލަތަށް ލިބިގެންދާ ނުހައްގު މަންފާއަށް ރިއާޔަތްކުރުމެއް ނެތި ނިންމާފައިވާ ނިންމުމެއް ކަމަށެވެ. ދެވަނަ ނުކުތާއަކަށް އިސްތިއުނާފް ކޮށްފައި ވަނީ ކޮންޓް ޕްރޮފެރެންޓަމްގެ އުސޫލު ހައިކޯޓުން ތަދުބީރު ކޮށްފައި ނުވާ ކަމަށެވެ. ތިންވަނަ ނުކުތާއަކަށް އިސްތިއުނާފްކޮށްފައިވަނީ ކޮންޓްރެކްޓްއާއި ބެހޭ ގާނޫނާއި ހިލާފަށް މައްސަލަ ނިންމާފައިވާ ކަމަށެވެ.
ނަމަވެސް ހައިކޯޓުގެ ނިންމުމަށް ބަދަލުގެންނަން ޖެހޭނެ ސަބަބެއް މޫވިންގް އިންޓަނޭޝަނަލް ކުންފުނިން ހައިކޯޓުގައި ފާހަގަކުރެވިފައި ނުވުމުން ސުޕްރިމް ކޯޓުން ނިންމީ ދައުލަތުން އެއްބަސްވުން ބާތިލް ކުރީ ރަނގަޅަށް ކަމަށެވެ. އަދި ގެއްލުމުގެ ބަދަލު އެ ކުންފުންޏަށް ދޭން ނުޖެހޭނެ ކަމަށެވެ.
މާވަރުލު އެއާޕޯޓް މިހާރު ވަނީ އެއްކޮށް ނިންމާފަ އެވެ. އެ މަޝްރޫއުގެ މަސައްކަތް ފަހުން ހަވާލުކުރީ ދައުލަތުގެ ބޮޑު ހިއްސާ އޮންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީ)އާ އެވެ.
މާވަރުލު އެއާޕޯޓަކީ އެތެރޭގެ އުދުހުންތަކަށް ހާއްސަކޮށްގެން ތަރައްގީކުރި އެއާޕޯޓެކެވެ. އެއާޕޯޓްގެ ރަންވޭއަކީ 1200މީޓަރު ދިގު، 30މީޓަރު ފުޅާ ރަންވޭ އެވެ. ދެ ފިޔަވައްސަކަށް ބަހާލައިގެން ކުރިއަށް ގެންދިޔަ މި މަޝްރޫއަށް ދައުލަތުން ޖުމްލަ 69.14 މިލިއަނަށް ވުރެ ގިނަ ރުފިޔާ ހަރުދުކޮށްފައިވެ އެވެ.
