ގާނޫނީ ދާއިރާއިން ތައުލީމް ހާސިލްކުރުމަށްފަހު، ގާނޫނީ ވަކީލްކަމުގެ ލައިސެންސް ހޯދުމަށް ހަދަން ޖެހޭ ބާ ކައުންސިލްގެ އިމްތިހާން އަންނަ އަހަރުގެ މެދުތެރޭ ބާއްވަން ތައްޔާރުވެއްޖެ އެވެ.
ބާ ކައުންސިލަކީ ވަކީލުން ރެގިއުލޭޓް ކުރުމުގެ ޒިންމާ އޮންނަ ކައުންސިލެވެ. އެ ކައުންސިލްގެ އެގްޒެކެޓިވް ކޮމިޓީގައި ތިއްބަވާނީ ވަކީލުން އިންތިހާބުކުރާ ރައީސަކާއި ނައިބު ރައީސެއްގެ އިތުރުން މެމްބަރުންނާއި ބަންޑާރަ ނައިބެވެ.
އެ ކައުންސިލްގެ ރައީސެއްގެ ގޮތުގައި މިހާރު ހުންނެވީ މައުމޫން ހަމީދެވެ.
ވަކީލުން ރެގިއުލޭޓް ކުރަން އަމަލުކުރަން ފެށި ގާނޫނީ ފަންނުގެ ގާނޫނުގެ ދަށުން އުފައްދާފައިވާ ކައުންސިލްގެ މި އިމްތިހާން ރާއްޖޭގައި ފުރަތަމަ ފަހަރަށް ބޭއްވުމަށް ކުރިން ނިންމީ މިދިޔަ އަހަރު އެވެ. ނަމަވެސް, އެ އިމްތިހާން ބޭއްވުން ލަސްވަނީ ރަނގަޅު ފެންވަރުގެ ބާ އިމްތިހާނެއް ބޭއްވުމަށްޓަކައި ބޭރުގެ ބާ އެސޯސިއޭޝަންތަކުގައި އެހީ ހޯދަމުންދާތީ ކަމަށް މައުމޫން މީގެ ކުރިން ވިދާޅުވެފައިވެ އެވެ.
ކޮވިޑްގެ ބަލިމަޑުކަމާއި ގުޅިުގެން މިދިޔަ އަހަރު ފަހުކޮޅު ބޭއްވުމަށް ތައްޔާރުވި އެ އިމްތިހާން ނުބޭއްވި ދިއުމާއި އެކު ގާނޫނީ ފަންނު އުނގެނެމުންދާ ގިނަ ދަރިވަރުން ވަނީ ކަންބޮޑުވުން ފާޅުކޮށްފަ އެވެ.
އިއްޔެ ގެޒެޓްކޮށްފައިވާ ބާ ކައުންސިލްގެ ނޫސްބަޔާނުގައި ވަނީ ބާ އިމްތިހާނުގެ ކަންކަން އިންތިޒާމުކުރުމުގެ މަސައްކަތް ކަމާބެހޭ ފަރާތްތަކާއެކު ކުރިއަށް ގެންދާކަން ފާހަގަކޮށްފަ އެވެ. އެގޮތުން, ފުރަތަމަ ބާ އިމްތިހާނު ބޭއްވުމަށް މިހާރު ނިންމިފައިވަނީ 2022 ވަނަ އަހަރުގެ ދެވަނަ ކުއާޓަރުގައި ކަމަށް ބާ ކައުންސިލުން ބުނެ އެވެ.
ބާ އިމްތިހާނުގައި އިމްތިހާނު ދެވޭ މައިގަނޑު ބައިތައް އެ ނޫސްބަޔާނުގައި ފާހަގަކޮށްފައިވެ އެވެ. އެއީ:
1. ކޮންސްޓިޓިޔުޝަނަލް / ޕަބްލިކް ލޯ
2. ކޮންޓްރެކްޓް ލޯ
3. ކްރިމިނަލް ލޯ
4. ޓޯޓް ލޯ
5. ލޭންޑް/ ޕްރޮޕަޓީ ލޯ
6. މޯލްޑިވިއަން ލީގަލް ސިސްޓަމް
މީގެ ދެ އަހަރު ކުރިން އަމަލު ކުރަން ފެށި ގާނޫނީ ފަންނުގެ ގާނޫނު އޮތް ގޮތުން ވަކީލުކަމުގެ ހުއްދަ ދެވޭނީ ބާ ކައުންސިލުން ކަނޑައަޅާ ބާ އިމްތިހާނެއް ފުރިހަމަ ކުރުމާ އެކު، ބާ ކައުންސިލުން ކަނޑައަޅާ ތަނެއްގައި ވަކި މުއްދަތެއް ވަންދެން ތަމްރީނު ޕްރޮގްރާމެއް ފުރިހަމަ ކުރުމުންނެވެ.
އެ ބާ އިމްތިހާނު ނުބޭއްވޭތީ ތައުލީމް ނިންމާފައިވާ ގިނަ ދަރިވަރުންނަށް ވަކީލު ކަމުގެ ހުއްދަ އޮތީ ނުލިބި އެވެ.
