ރާއްޖޭގެ ޓޫރިޒަމަށް 50 އަހަރު ފުރޭ ރަން އަހަރު ދެ މިލިއަން ޓޫރިސްޓުން ޒިޔާރަތްކުރާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
މައުސޫމް މިހެން ވިދާޅުވީ، މަރުކަޒީ ބޭންކު، އެމްއެމްއޭ އިން އާންމުކުރި "ޓޫރިޒަމް ފޯކާސްޓިން މޮޑެލް ފޯ ދަ މޯލްޑިވްސް" ދިރާސާގެ އަންދާޒާތަކާ ގުޅުވައިގެންނެވެ.
އެ ދިރާސާއިން ފާހަގަކުރި ގޮތުގައި އަންނަ އަހަރު ރާއްޖެއަށް އެންމެ ރަނގަޅު ހާލަތުގައި އަންނާނީ 1.4 މިލިއަން ޓޫރިސްޓުންނެވެ.
މިނިސްޓަރު މައުސޫމް ކުރެއްވި ޓްވީޓުގައި 2022 ގައި ދެ މިލިއަން ޓޫރިސްޓުން ޒިޔާރަތްކުރުމުގެ އިތުރުން، 13.5 މިލިއަން ބެޑް ނައިޓްސް ވެސް ހަމަވާނެ ކަމަށް ވިދާޅުވި އެވެ.
މި އަދަދަށް ޓޫރިސްޓުންނާއި ބެޑްނައިޓްސް ހަމަވެއްޖެނަމަ، 2019 ގެ 1.7 މިލިއަން ޓޫރިސްޓުންގެ ރެކޯޑު މުގުރާލާނެ އެވެ.
މި އަދަދުތައް މިނިސްޓަރު ޖެއްސެވީ ކޮންކަމަކަށް ބިނާކޮށްތޯ ޓްވީޓުގައި މީހަކު ކުރި ސުވާލަކަށް ޖަވާބު ދެމުން މައުސޫމް ވިދާޅުވީ ބައިވަރު ފެކްޓާތައް އެބަހުރި ކަމަށެވެ.
އޭގެ ތެރޭގައި ގިނަ ބާވަތްތަކެއްގެ ޓޫރިޒަމުގެ ބެޑް ކެޕޭސިޓީ އިތުރުވުމާއި، އިތުރު މާކެޓްތަކަށް ފޯރުމާއި، އެއާ ކަނެކްޓިވިޓީ އިތުރުވުމާއި، ޑޮމެސްޓިކް ޓްރާންސްޕޯޓު ދާއިރާގެ ހާލަތު މިހާރަށް ވުރެ ރަނގަޅު ވުން ފާހަގަކުރެއްވި އެވެ.
އޭގެ އިތުރުން ކުރިން ދެ އަހަރުގެ ޕެންޓް އަޕް ޑިމާންޑް (ރާއްޖެ އަންނަ ބޭނުންވެ ނާދެވިފަ ތިބި މީހުންގެ ޑިމާންޑް) އަދި ރާއްޖޭގެ ޓޫރިޒަމުގެ ރަން އަހަރު ފާހަގަކުރަން ހިންގާ ހަރަކާތްތައް ވެސް މިނިސްޓަރު ފާހަގަކުރެއްވި އެވެ.
