ހުޅުމާލޭ ޖަލުގައި ހުރި ގައިދީއެއް ކުއްލި ގޮތަކަށް ރޭ މަރުވި ހާދިސާގައި ކަމާބެހޭ އިދާރާތަކުގެ އިހުމާލެއްވޭތޯ ބެލުމަށް ސަރުކާރަށް ގޮވާލައި، އިދިކޮޅުން ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅައިފި އެވެ.
ހުޅުމާލޭގައި ހުންނަ ޖަލުގައި ހުރި ގައިދީއަކު މަރުވެގެން ކަރެކްޝަނަލް ސާވިސްގެ އޮފިސަރުން ރޭ ވަނީ އޭނާގެ ހަށިގަނޑު ހުޅުމާލެ ހޮސްޕިޓަލަށް ގެންގޮސްފަ އެވެ.
އޭގެފަހުން އެ ސަރަހައްދަށް ދިޔަ އެމީހާގެ އާއިލާ އަދި ރައްޓެހިން ވަނީ ކަރެކްޝަންއާ ދެކޮޅަށް އަޑުއުފުލައި ހަމަނުޖެހުން ހިންގާފަ އެވެ. އެހެންވެ, އެ ސަރަހައްދުގައި ގިނަ އަދަދެއްގެ ފުލުހުން ވަނީ ހަރަކާތްތެރިވެފަ އެވެ.
ކަރެކްޝަނަލް ސާވިސްއިން މައުލޫމާތު ދިން ގޮތުގައި މިރޭ މަރުވީ ތިން އަހަރުގެެ ޖަލު ހުކުމެއް ތަންފީޒު ކުރަމުންދިޔަ ގދ. ވާދޫ/ ޖަނަވަރީގެ މުހައްމަދު އަސްލަމެވެ.
އޭނާ އިއްޔެ އިރުއޮއްސި ގާތްގަނޑަކަށް 6:00 އެހާ އިރު ޔާޑު ސަރަހައްދުގައި އިށީދެގެން އިންދާ ކުއްލިއަކަށް ވެއްޓުމާ ގުޅިގެން އެމަޖެންސީ ހާލަތުގައި ހުޅުމާލެ ހޮސްޕިޓަލަށް ގެންދިޔަ ކަމާއި ހޮސްޕިޓަލުން ބެލުމަށްފަހު އޭނާ ރޭ 20:23 ގައި މަރުވެފައިވާ ކަމަށް ވަނީ މައުލޫމާތު ދީފައިވާ ކަމަށް ކަރެކްޝަންސް އިން ބުންޏެވެ.
ސާޅީސް އަހަރުގެ އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޒުކުރަމުންދިޔަ މީހެކެވެ. އޭނާއަކީ ބޮޑު ބައްޔަކަށް ބޭސްފަރުވާ ކުރަމުންދިޔަ މީހެއް ނޫނެވެ.
އެ ހާދިސާއާ ގުޅިގެން މަޑުއްވަރީ ދާއިރާގެ އިދިކޮޅު މެމްބަރު އާދަމް ޝަރީފް ހުށަހެޅުއްވި މައްސަލައިގައި ބުނެފައިވަނީ އަސްލަމް ރޭ މަރުވިއިރު، އެކަމުގައި ކަމާބެހޭ އިދާރާތްތަކުގެ އިހުމާލުއޮތް ކަމަށް އޭނާގެ އާއިލާއިން ތުހުމަތުކުރާ ކަމަށެވެ.
އެހެންކަމުން އެ ހާދިސާ އިންސާފުވެރިކަމާއެކު ތަހުގީގުކުރުމަށް އެ މައްސަލައިގައި އާދަމް ޝަރީފް ވަނީ ސަރުކާރަށް ގޮވާލައިފަ އެވެ.
އެ މައްސަލަ މަޖިލީހަށް ބަލައިގެންފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 24 މެމްބަރުންގެ އިއްތިފާގުންނެވެ.
އެ މައްސަލައިގެ ބަހުސްގައި އާދަމް ޝަރީފް ވިދާޅުވީ މި ސަރުކާރުން ވެރިކަމަށް އައުމުގެ ކުރިން އިންސާނީ ހައްގުތަކާއި އިންސާފު ހޯދައިދޭނެ ބޮޑެތި ވައުދުތައްވެފައިވާ ކަމަށެވެ.
ނަމަވެސް، ގައުމުގެ ކަންކަން މިހާރު ބޮއްސުންލާފައިވާއިރު، މިކަހަލަ ހާދިސާތައް ތަހުގީގުކުރަން އޮންނަ ހިއުމަން ރައިޓްސް ކޮމިޝަން (އެޗްއާރުސީއެމް) ވެސް ނުކުޅެދިފައިވާ ކަމަށް އޭނާ ތުހުމަތުކުރެއްވި އެވެ.
އެ މައްސަލައިގައި ބަހުސްގައި ބައިވެރިވެވަޑައިގެންނެވި ސަރުކާރަށް ނިސްބަތްވާ މެމްބަރުން ވެސް ވަނީ އެ ހާދިސާ ވަރަށް ސީރިއަސް ކަމެއްގެ ގޮތުގައި ތަހުގީގުކުރަންޖެހޭ ކަމަށް ވިދާޅުވެފަ އެވެ.
