މިއުނިކް (ސެޕްޓެމްބަރު 11) - ޖަރުމަން ބުންޑަސްލީގާގައި ރޭ އާރްބީ ލައިޕްޒިގް އަތުން 4-1 އިން މޮޅުވެ، ބަޔާން މިއުނިކް ތާވަލްގެ ދެވަނަ އަށް ޖެހިލައިފި އެވެ.
ލައިޕްޒިގްގެ ދަނޑުގައި ރޭ ކުޅުނު މެޗުގައި ބަޔާނަށް ލަނޑު ޖަހައިދިނީ ރޮބަޓް ލެވަންޑޮވްސްކީ އާއި ޖަމާލް މުސިއާލާ އާއި ލީރޯއީ ސާނޭ އަދި އެރިކް މެކްސިމް ޗޫޕޯ މޯޓިންގެވެ.
ލައިޕްޒިގްގެ ހަމައެކަނި ލަނޑު މެޗުގެ 58 ވަނަ މިނިޓުގައި ޖެހީ ކޮންރެޑް ލައިމާ އެވެ.
މި މޮޅާއެކު، ބަޔާން ވަނީ 10 ޕޮއިންޓާއެކު ތާވަލްގެ ދެވަނަ އަށް ޖެހިލައިފަ އެވެ. ތާވަލްގެ އެއްވަނައިގައި 12 ޕޮއިންޓާއެކު އޮތީ ވުލްފްސްބާގެވެ.
ތާވަލްގެ ތިން ވަނައިގައި އޮތް ބޮރޫޝިއާ ޑޯޓްމަންޑް ވަނީ ލީގުގައި ރޭ ބަޔާ ލޭވަކޫސަން އަތުން 4-3 އިން މޮޅުވެފަ އެވެ. ފޯރިގަދަ ކުޅުމެއް ފެނިގެންދިޔަ މި މެޗުގައި ޑޯޓްމަންޑްގެ ފޯވަޑް އެރްލިންގް ބްރައުޓް ހާލާންޑް ވަނީ ދެ ލަނޑު ޖަހައިފަ އެވެ.
ޑޯޓްމަންޑަށް އިތުރު ލަނޑުތައް ޖަހައިދިނީ ޖޫލިއަން ބްރާންޓް އަދި ރަފައެލް ގުރޭރޯ އެވެ. ލޭވަކޫސަން އަށް މި މެޗުގައި ލަނޑު ޖަހައިދިނީ ފްލޯރިއަން ވިޓްޒާއި ޗެކް ރިޕަބްލިކްގެ ފޯވަޑް ޕެޓްރިކް ޝިކް އަދި މޫސާ ޑިއާބީ އެވެ. -- ބީބީސީ
