ޕެެރިސް (އޮކްޓޫބަރު 23) - އޮކްޓޫބަރު މަހަކީ ސީޒަންގެ ކުރީކޮޅު ކަމަށާއި މިއީ ތަށި ހޯދާ މަހެއް ނޫން ކަމަށް ބާސެލޯނާގެ ކޯޗު، ޖަރުމަނުގެ ހަންސީ ފްލިކް ބުނެފި އެވެ.
މި ސީޒަނުގައި ތަފާތު ފޯމެއްގައި ކުޅެމުން އައި، ބާސެލޯނާ ވަނީ މި ހަފްތާގައި ކުޅުނު ޗެމްޕިއަންސް ލީގު މެޗުން ޕީއެސްޖީ އަތުން 4-2 އިން ބަލިވެފަ އެވެ. އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން، ފްލިކް ވަނީ ސީޒަނުގައި ފުރަތަމަ ފަހަރަށް އެ ޓީމުން ނާކާމިޔާބީ އަކާ ކުރިމަތިލާން ޖެހުނު މެޗުގައި ކަންކަން ދިޔަ ގޮތާ މެދު އަމިއްލަ ވިސްނުން ހިއްސާކޮށްފަ އެވެ.
މިދިޔަ ދެ ސީޒަނުގައި ޗެމްޕިއަންސް ލީގުގެ ޗެމްޕިއަންކަން ހޯދި ޕީއެސްޖީއާ ދެކޮޅަށް ބާސެލޯނާ އިން ކުޅުނު މެޗަކީ ދެ ޓީމަށް ވެސް ރަނގަޅު ގިނަ ކަންތައްތަކެއް ފެނިގެންދިޔަ މެޗެއް ކަމަށް ފްލިކް ވަނީ ބުނެފަ އެވެ. އެ ގޮތުން، ޕީއެސްޖީން ދެއްކީ އެ ޓީމު މި ވަގުތު ބާސެލޯނާ އަށް ވުރެން ކުރީގައި އޮތް ސަބަބު ކަމަށާއި އެ މެޗުގައި ހެދުނު ގޯސްތަކުން ބާސެލޯނާ އިން ކަންކަން ދަސްކުރާނެ ކަމަށް ފްލިކް ވަނީ ބުނެފަ އެވެ.
ބާސެލޯނާ އަށް ދިމާވި އެންމެ ބޮޑު މައްސަލަ އަކީ ސްޕެނިޝް ލީގުގައި ކުޅުނު މެޗަށް ފަހު، ރިކަވަރީގައި އެންމެ ރަނގަޅަށް މަސައްކަތް ނުކުރެވުން ކަމަށް ފްލިކް ފާހަަގަކުރި އެވެ.
"މި ދައްކަނީ އުޒުރެއް ނޫން. މި ގަބޫލުކުރަނީ އަހަރެމެން ހެދި ގޯސްތައް، މީގެ އިން ކަންކަން ރަަނގަޅުކުރާނީ،" ފްލިކް ބުންޏެެވެ.
"މިއީ އަދި އޮކްޓޫބަރު މަސް. އޮކްޓޫބަރު މަހުގައެއް ތަށްޓެއް ނުހޯދޭނެ. ޗެމްޕިއަންސް ލީގު ހޯދޭނީ ޖޫން މަހު،"
ބާސެލޯނާ އިން އެންމެ ފަހުން ޗެމްޕިއަންސް ލީގު ޗެމްޕިއަންކަން ހޯދީ މީގެ 10 އަހަރު ކުރިންނެވެ. މިދިޔަ ސީޒަނުގައި ސްޕެނިޝް ލީގުގެ ޗެމްޕިއަންކަން ހޯދި ބާސެލޯނާ އިން މި ސީޒަނުގައި އެންމެ ބޮޑަށް އަމާޒުހިފާފައިވަނީ ޗެމްޕިއަންސް ލީގަށް ކަމަށް އެ ކްލަބްގެ ސީނިއާ އޮފިޝަލުންނާ ހަވާލާދީ މީޑިއާގައި ރިޕޯޓްކޮށްފައިވެ އެވެ.
ސްޕެނިޝް ލީގުގައި އެންމެ އަވަހަށް ބާސެލޯނާ ކުޅެން އޮތް މެޗު އޮތީ، އާދިއްތަ ދުވަހުގެރޭ ވާދަވެރި ރެއާލް މެޑްރިޑާ ދެކޮޅަށެވެ.
