ގްރީސްގައި ކުރިއަށްދާ ހެލަސް އިންޓަނޭޝަނަލްގެ އަންހެން ޑަބަލްސް ކުއާޓާ ފައިނަލުގައި ވާދަކޮށް، ރިވައިވަލް ސްޕޯޓްސް އާއި ގައުމީ ބެޑްމިންޓަން ޓީމުގެ، އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ) ނާކާމިޔާބީއާ ކުރިމަތިލާން ޖެހިއްޖެ އެވެ.
މިއީ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރުހުން ދީފައިވާ ޔޫރަޕްގައި ކުރިއަށްދާ މުބާރާތެއްގެ ކުއާޓާ ފައިނަލުގައި ނަބާ އާއި ނަބީ ކުޅުނު ދެ ވަނަ ފަހަރެވެ.
އެ ގޮތުން، މިދިޔަ ޖޫން މަހު، ޔޮނެކްސް އިޓާލިއަން އޯޕަންގެ އަންހެން ޑަބަލްސް ކުއާޓާ ފައިނަލުގައި ވެސް ނަބާ އާއި ނަބީ ވާދަކޮށް، އެ މުބާރާތުގެ ދަތުރު ވެސް ނިމުނީ ގަދަ 8 އާ ހަމައިންނެވެ.
ހެލަސް އިންޓަނޭޝަަަނަަލްގެ އަންހެން ޑަބަލްސް ކުއާޓާ ފައިނަލުން ނަބާ އާއި ނަބީ ޖާގަ ހޯދީ ގަދަ 16 ބުރުގައި ބަލްގޭރިއާގެ ގެރްގާނާ ޕަވްލޯވާ އާއި ޓިއެޑޯރާ ޕަވްލޯވާ އަތުން 21-15، 21-15 އިން މޮޅުވެގެންނެވެ. ކުއާޓާ ފައިނަލުގައި ނަބާ އާއި ނަބީގެ ޕެއާ ވާދަކުރީ، ޑެންމާކްގެ އެމާ ޖޮނަސަން އާއި މެރީ ވިސްކޮވިޗްއާ އެވެ. އެ މެޗުން، އެމާ އާއި މެރީގެ ޕެއާ ކާމިޔާބު ހޯދީ، 21-08، 21-18 އިން ސެޓުތައް ގެންގޮސްގެންނެވެ.
ގްރީސް މުބާރާތުގެ ފިރިހެން ޑަބަލްސް އާއި މިކްސް ޑަބަލްސް އިން ރިވައިވަލް އިން ވަނީ ގަދަ 16 ގައި ވާދަކޮށްފަ އެވެ. މިއީ، ޖޫން/ޖުލައި މަހު ވާދަކުރި ޔޫރަޕްގެ ޓުއާ މުބާރާތްތަކާ އަޅާކިޔާއިރު، ރިވައިވަލް އިން ހޯދި ކުރިއެރުމެކެވެ.
އެ ގޮތުން ގްރީސް މުބާރާތުގައި ރިވައިވަލްގެ ނިބާލް އަހުމަދު އާއި ޒަޔާން ޒަކީގެ ޕެއާ އިން ވަނީ ގަދަ 32 ގެ ބުރުގައި، ގްރީސްގެ ކޮންސްޓަންޓީނޯސް ކަޕޫކްރަންޑިސް އާއި ޕޮލިޒޮއިސް ޕޮލިޒޯކިސް އަތުން 21-16، 21-6 އިން މޮޅުވެފަ އެވެ. އެކަަމަކު، ގަދަ 16 ބުރުގައި ނިބާލް އާއި ޒަޔާން ވަނީ ތުރުކީގެ ގޮކޭ ގޯލް އާއި މާޓް ސެވަން އަތުން 21-16، 21-13 އިން ބަލިވެފަ އެވެ.
މިކްސް ޑަބަލްސްގައި ނިބާލް އާއި ނަބީގެ ޕެއާ އިން މޯލްޓާގެ ޖުއާން ކަސާރޫ އާއި އެމިލީ އަބޭލާގެ ޕެއާ އަތުން 21-11، 21-09 އިން މޮޅުވެ، ގަދަ 16 ބުރުގައި ނުކުތީ ޖަރުމަނުގެ އަލެކްސަންޑަ ފިލިޕް ޒޭންގް އާއި އެވާ ސްޓޮމެލްގެ ޕެއާއާ ދެކޮޅަށެވެ. އެ މެޗުން ނަބީ އާއި ނިބާލް ބަލިވީ، 21-14، 21-12 އިންނެވެ.
މިކްސް ޑަބަލްސްގައި ޒަޔާން އާއި ނަބާގެ ޕެއާ ވަނީ، ޕޯޗުގަލްގެ ޑޭވިޑް ސިލްވާ އާއި މާޓާ ސޯސާ އަތުން 21-19، 21-09 އިން ބަލިވެފަ އެވެ. ފިރިހެން ސިންގަލްސްގައި އެއް ވަނަ އަށް ސީޑްކޮށްފައިވާ ޑެންމާކްގެ ކްރިސްޓޮފާ ވިޓޯރިއާނީ އަތުން ނިބާލް ބަލިވީ، 21-09، 21-17 އިންނެވެ. ފިިރިހެން ސިންގަލްސް ކޮލިފައިންގައި ހަސަން ޒަޔާން ވަނީ ބަލްގޭރިއާގެ ޖިއޯޖީ ރުޕްޓްސޯވް އަތުން 21-08، 21-07 އިން ބަލިވެފަ އެވެ.
ގްރީސް މުބާރާތަށް ފަހު، ރިވައިވަލް އިން މި ޓުއާގައި ޔޫރަޕްގެ އިތުރު ދެ މުބާރާތެއްގައި ވާދަކުރާނެ އެވެ. މި މަހު 28-31 އަށް ހަންގޭރީގައި ކުރިއަށްދާ 51 ވަނަ ވިކްޓާ އެފްޒެޑް ފޯޒާ ހަންގޭރިއަން އިންޓަނޭޝަނަލް ޗެމްޕިއަންޝިޕްސް އަދި އަންނަ މަހުގެ 5-8 އަށް ނޯވޭގައި ކުރިއަށްދާ އެފްޒެޑް ފޯޒާ ނޯވޭޖިއަން އިންޓަނޭޝަނަލްގަ އެވެ.
