ޒިއުރިކް (ސެޕްޓެމްބަރު 11) - ޕްރިމިއާ ލީގުގެ ކްލަބުތަކަށް ކުޅޭ ބްރެޒިލްގެ ކުޅުންތެރިންގެ ސަސްޕެންޝަން ފީފާ އިން އުވާލުމުން، އެ ކުޅުންތެރިންނަށް މި ހަފުތާ ބަންދުގެ މެޗުތައް ކުޅުމުގެ ފުރުސަތު ލިބިއްޖެ އެވެ.
ބްރެޒިލްގެ ފުޓްބޯލް ފެޑެރޭޝަންގެ އެދުމުގެ މަތިން ޕްރިމިއާ ލީގުގެ ކްލަބުތަކަށް ކުޅޭ ބްރެޒިލްގެ ގައުމީ ޓީމުގެ އަށް ކުޅުންތެރިން ފީފާ އިން ސަސްޕެންޑްކުރީ ފަސް ދުވަހުގެ މުއްދަތަކަށެވެ.
އެކަމަކު ފީފާ އިން ބުނީ ބްރެޒިލްގެ ފެޑަރޭޝަނާ ފަހުން ބޭއްވި މަޝްވަރާތަކަށް ފަހު، ފެޑެރޭޝަނުން މައްސަލަ އަނބުރާ ގެންގޮސްފައިވާ ކަމަށެެވެ. އެހެންކަމުން، ސަސްޕެންޝަން އުވާލަން ނިންމާފައިވާ ކަމަށް ފީފާ އިން ވަނީ ބުނެފަ އެވެ.
ޕްރިމިއާ ލީގުގައި ކުޅޭ މެކްސިކޯ އާއި ޕެރަގުއޭ އަދި ޗިލީގެ ގައުމީ ޓީމުގެ ކުޅުންތެރިން ވެސް ސަސްޕެންޑްވާނެ ކަމަށް ބެލެވުނު ނަމަވެސް، އެ ކުޅުންތެރިން ނިސްބަތްވާ ގައުމުތަކުގެ ފެޑެރޭޝަންތަކުން މައްސަލަ އަނބުރާ ގެންދިޔައީ އެވެ. އެހެން ކަމުން، ވުލްވްސް އަށް ކުޅޭ މެކްސިކޯގެ ފޯވަޑް ރައޫލް ހިމެނޭޒާއި ނިއުކާސަލް ޔުނައިޓަޑަށް ކުޅޭ ޕެރަގުއޭގެ މިޑްފީލްޑަރު މިގުއެލް އަލްމިރޮން އަދި ވޮޓްފޯޑަށް ކުޅޭ ޗިލީގެ މިޑްފީލްޑަރު ފްރެންޗެސްކޯ ސިއެރެލްޓާ އަށް ކުޅެވޭނެކަން އިއްޔެ ވަނީ ކަށަވަރުވެފަ އެވެ.
ފީފާ އިން ސަސްޕެންޑްކުރި ބްރެޒިލްގެ ކުޅުންތެރިން:
- އެލިސަން، ރޮބާޓީ ފިރްމީނިއޯ، ފަބީނިއޯ (ލިވަޕޫލް)
- އެޑަސަން، ގެބްރިއަލް ހެސޫސް (މެންޗެސްޓާ ސިޓީ)
- ތިއާގޯ ސިލްވާ (ޗެލްސީ)
- ފްރެޑް (މެންޗެސްޓާ ޔުނައިޓަޑް)
- ރަފީނިއާ (ލީޑްސް ޔުނައިޓަޑް
ޕްރިމިއާ ލީގުގެ ކްލަބުތަކުން ކުޅުންތެރިން ގައުމީ ޓީމުތަކަށް ރިލީޒްނުކުރީ އިނގިރޭސިވިލާތުން ދަތުރުފަތުރު ކުރުމުގައި ސަމާލުވާން ކަނޑައަޅާފައިވާ ރެޑް ލިސްޓުގައި އެ ގައުމުތައް ހިމެނޭތީ އެވެ. ރެޑް ލިސްޓުގައި އޮތް ގައުމަކަށް ގޮސްފައި އެނބުރި އިންގްލެންްޑަށް އައިސް 10 ދުވަހުގެ ކަރަންޓީނު ވާން ޖެހޭނެ އެވެ.
