ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން ފޯރުކޮށްދޭ ބޯހިޔާވަހިކަމާ ގުޅޭ ފައިނޭންސިން ކަންކަމަށް ފައިސާ ހޯދަން ސުކޫކް ވިއްކަން ތައްޔާރުވެއްޖެ އެވެ.
އެޗްޑީއެފްސީން މުދާރަބާ އެއްބަސްވުމެއްގެ ދަށުން ވިއްކާ ސުކޫކެއްގެ އަގަކީ 1،000ރ. އެވެ. އެގޮތުން 200 މިލިއަން ރުފިޔާގެ ފައިނޭންސިން އަމާޒަށް، 200،000 ސުކޫކް ވިއްކަން ވަނީ ހަމަޖެހިފަ އެވެ.
މި ސުކޫކް ވިއްކަން ފަށަން ހަމަޖެހިފައިވަނީ މާދަމާ އިން ފެށިގެންނެވެ. އަދި ސުކޫކް ގަތުމުގެ ފުރުސަތު މި ހިނގާ ސެޕްޓެމްބަރު މަހުގެ ނިޔަލަށް އޮންނާނެ އެވެ.
އެޗްޑީއެފްސީން ސުކޫކް ވިއްކަނީ ސުކޫކް ގަންނަ ފަރާތަށް ކޮންމެ ހަ މަހަކުން 65 ޕަސެންޓު ފައިދާ ލިބޭ ގޮތަށް، 10 އަހަރު ދުވަހުގެ މުއްދަތަށެވެ. އަދި މިއީ ސްޓޮކް އެކްސްޗޭންޖުގައި ރަޖިސްޓްރީކޮށްގެން ވިއްކާ ސުކޫކެކެވެ.
އެޗްޑީއެފްސީން ބުނި ގޮތުގައި މިއީ އެ ކޯޕަރޭޝަނުގެ އަމްނާ ހިދުމަތްތައް އިތުރަށް ފުޅާކޮށް، ޝަރީއާ ހުއްދަކުރާ ގޮތުގެ މަތިން އިންވެސްޓްމަންޓުތަކެއް ފަހިކޮށްދިނުމުގެ ގޮތުން ކުރާ ކަމެކެވެ. އަދި މީގެ ސަބަބުން ދީން ހުއްދަކުރާ ހިރާސް ކުޑަ އިންވެސްޓްމަންޓުތަކެއް ކުރަން އާންމު ފަރުދުންނަށާއި، ވިޔަފާރިތަކަށް ލިބޭނެ ކަމަށް ފާހަގަކުރި އެވެ.
މިއީ އެޗްޑީއެފްސީން ހައުސިން ފައިނޭންސަށް ފައިސާ ހޯދަން ސުކޫކް ވިއްކާ ހަތަރުވަނަ ފަހަރެވެ. އެގޮތުން މީގެ ކުރިންވެސް އެ ކޯޕަރޭޝަނުން ވަނީ ސުކޫކް ވިއްކައިގެން 250 މިލިއަނާ ގާތްކުރާ އަދަދަކަށް ފައިސާ ހޯދާފަ އެވެ.
