މާލޭގެ ރައްޔިތުންނަށް ލިބިފައިވާ ގޯތިތަކުގައި އިމާރާތް ކުރެވޭނެ އިންތިޒާމު ހަމަޖައްސަން މާލެ ސިޓީ ކައުންސިލާއި ބޭރުގެ އިންވެސްޓްމަންޓް ބެންކަކާ ގުޅިގެން ސިޓީ އިންވެސްޓްމަންޓް އެންޑް ފައިނޭންސް އެޖެންސީ ނަމުގައި ފަންޑެއް ގާއިމުކުރާނެ ކަމަށް މާލެ ސިޓީގެ މޭޔަރަކަށް އަމިއްލަގޮތުން ވާދަކުރައްވާ އިސްމާއިލް ޒަރިޔަންދު ރޭ ވިދާޅުވެއްޖެ އެވެ.
ވެސްޓް ޕާކް ސަރަހައްދުގައި ބޭއްވި ކެމްޕެއިން އިވެންޓެއްގައި ޒަރިޔަންދު ވިދާޅުވީ އެ ފަންޑު ގާއިމުކުރަނީ މާލޭގެ ރައްޔިތުންނަށް ކުރިން ލިބި ނުހެދިފައިވާ ގޯތިތައް އިމާރާތްކުރެވޭނެ އިންތިޒާމު ހަމަޖެއްސުމުގެ އިތުރުން އަލަށް ލިބޭ ގޯތިތައް ވެސް އިމާރާތް ކުރެވޭނެ އިންތިޒާމު ހަމަޖައްސަން ކަމަށެވެ.
"އަޅުގަނޑުމެން މަސައްކަތް ކުރަމުންދާނީ މާލޭގެ ރައްޔިތުންނަށް މިހާރު ނެހެދިވާ ގޯތިތަކާއި އަދި އަލަށް ލިބެމުން އަންނަ ގޯތިތައް އިމާރާތް ކުރެވޭނެ ކަހަލަ އިންތިޒާމެއް ހަމަޖެއްސުމަށް މާލެ ސިޓީ ކައުންސިލާއި ބޭރުގެ އިންވެސްޓްމަންޓް ބެންކެއް ހިއްސާ ހިމެނޭ ފަންޑެއް ގާއިމުކުރުމަށް،" ޒަރިޔަންދު ވިދާޅުވި އެވެ.
މާލޭގެ ރައްޔިތުންނަށް އަމިއްލަ ބޯހިޔާވެހިކަމެއް ކަށަވަރުކޮށްދިނުމަށް ގާއިމުކުރާ އެ ފަންޑު މެދުވެރިކޮށް ގޯތިތައް އިމާރާތްކުރުމަށް ހިނގާ ހަރަދުގެ 25 ޕަސަންޓާ ހަމައަށް ކުޑަ އިންޓްރެސްޓެއްގައި ލޯނު ދޫކުރާނެ ކަމަށް ޒަރިޔަންދު ވިދާޅުވި އެވެ. އޭނާ ވިދާޅުވީ އަލަށް ލިބޭ ފްލެޓްތަކުގެ ޑައުން ޕޭމަންޓް ދެއްކުމަށާއި އަލަށް ލިބޭ ފްލެޓަށް ފަރުނީޗަރު ގަތުމަށް ވެސް އެ ފަންޑުން ލޯނު ދޭނެ ކަމަށެވެ.
"އޭގެ ތެރޭގައި އެންމެ މަދުވެގެން އަލަށް ގޯއްޗެއް ލިބޭ ފަރާތާއި ނޫނިއްޔާ މާލޭގައި ނުހެދިހުރި ގެއެއްގެ އިމާރާތްކުރުމުގެ ހަރަދުގެ 25 ޕަސަންޓަށް އަޅުގަނޑުމެން ލެންޑިން ދޭނަން،" ޒަރިޔަންދު ވިދާޅުވި އެވެ.
"ނޫނިއްޔާ އާއިލާއެއް ބިނާކުރެވޭ ވަރަށް ގެއެއް ބިނާކުރަން ކޮލެޓްރަލްއަކާ ނުލައި ކުޑަ އިންޓްރެސްޓެއްގައި ލޯން ދޫކުރުމާއި އަލަށް ލިބޭ ފްލެޓެއްގެ ޑައުން ޕޭމަންޓް ދެއްކުމަށް ލޯން ދޫކުރުމާއި ލިބޭ ފްލެޓްތަކަށް ފަރުނީޗަރާއި ދިރިއުޅުމުގެ ސާމާނު ހޯދައިދިނުމަށް މައިކްރޯ ލޯން ދޫކުރެވޭނެ."
މާލޭ ރައްޔިތުންގެ ބޯހިޔާވެހިކަމުގެ އަމިއްލަވަންތަކަން ކަށަވަރުކޮށްދޭ އެ ފަންޑަކީ ބޭރު ބަޔަކާ ގުޅިގެން ގާއިމުކުރާ ފަންޑަކަށްވިޔަސް، އެ ފަންޑުގެ 50 ޕަސަންޓް ތަމްސީލްކުރާނީ މާލޭގެ ރައްޔިތުން ކަމަށް ޒަރިޔަންދު ވިދާޅުވި އެވެ.
"މި ގާއިމުކުރެވޭ ފަންޑުގެ 50 ޕަސަންޓް ތަމްސީލްކުރާނީ މާލޭގެ ރައްޔިތުން. މާލެ ސިޓީ ކައުންސިލާއި މާލޭގެ އަވަށު ކޮމިޓީތައް ބައިވެރިވެގެން އުފެދޭ ބޯޑަކުން. އޭގެ މާނައަކީ ބޭރުގެ އިންވެސްޓްމަންޓް އެޖެންސީއަކަށް މިކަން ހަވާލުކުރިކަމުގައި ވިޔަސް އަޅުގަނޑުމެން ސިޓީ ޑިވެލޮޕްމަންޓް ފަންޑުގެ 50 ޕަސަންޓް ހިއްސާ އޮންނާނީ މާލޭ ސިޓީ ކައުންސިލްގެ މައްޗަށޭ،" ޒަރިޔަންދު ވިދާޅުވި އެވެ.
"އޭގެ ތެރެއިން ގާނޫނުގައި ކަނޑައެޅިފައިވާ ގޮތަށް މާލެ ސިޓީ ކައުންސިލްގެ 20 ޕަސަންޓް ހިއްސާ އާއި މާލޭގެ ރައްޔިތުންގެ 30 ޕަސަންޓް ހިއްސާ އެ ފަންޑުގައި ކަށަވަރުކުރެވިގެންދާނެ."
މީގެއިތުރުން ޒަރިޔަންދު ވިދާޅުވީ މޭޔަރަކަށް ހޮވިއްޖެނަމަ މާލޭގައި އެންމެ ބޮޑަށް ބޯހިޔާވެހިކަމަށް ބޭނުންވެފައި ތިބި މީހުންނަށް ސޯޝަލް ހައުސިން ފްލެޓެއް ނުވަތަ ބަންޑާރަ ބިމެއް ލިބެންދެން، ވަގުތީ ހިޔާވެހިކަމެއްގެ ގޮތުން މުނިސިޕަލް ހައުސިން ސްކީމެއް ތައާރަފްކުރާނެ ކަމަށެވެ.
މާލޭ ސަރަހައްދުގައި ގާއިމުކުރެވޭ މުނިސިޕަލް ހައުސިން ފްލެޓްތަކުގެ ކުއްޔަކީ މަހަކު 6،000ރ. އަށް ވުރެ ކުޑަ ކުއްޔަކަށްވާނެ ކަމަށް އޭނާ ވިދާޅުވި އެވެ.
ޒަރިޔަންދު ވިދާޅުވީ މާލޭގެ މޭޔަރުކަމަށް އިންތިހާބުވެއްޖެނަމަ މާލޭގެ ރައްޔިތުން ބޯހިޔާވެހިކަމުގެ ދަންތުރައިން ސަލާމަތް ކުރުމުގެ މަސައްކަތް ކާމިޔާބުކުރާނެ ކަމަށެވެ.
