މި ސަރުކާރު އައުމަށްފަހު ވަޒީފާ ދިން މީހުން ފްލެޓަށް ޝަރުތު ހަމަވާ ގޮތަށް އުސޫލު ބަދަލުކޮށްފި

މުއިއްޒުގެ ސަރުކާރު ވެރިކަމަށް އައުމަށްފަހު ވަޒީފާ ދީފައިވާ މީހުންނަށް ސަރުކާރުގެ "ބޯހިޔާވެހިކަން އެންމެންނަށް" ސިޔާސަތުގެ، "އާއިލީ ބޯހިޔާވެހިކަން" ޕްރޮގްރާމުގެ ދަށުން ކަނޑައަޅާފައިވާ ފްލެޓުތަކުގެ ތެރެއިން އިދާރާތަކާއި މުއައްސަސާތަކަށް ހާއްސަ ކެޓަގަރީއަށް ޝަރުތު ހަމަވާ ގޮތަށް އެ އުސޫލަށް ބޮޑު ބަދަލެއް ގެނެސްފި އެވެ.

އެ ސްކީމުގެ ދަށުން ޖުމްލަ 7،900 ފްލެޓް ދިނުމަށް ވަނީ ހަމަޖެހިފަ އެވެ. ހައުސިން މިނިސްޓްރީން ޑިސެމްބަރު 29، 2025 ގައި ގެޒެޓުކުރި ފްލެޓު ދިނުމުގެ އުސޫލުގެ 15 ވަނަ ނަންބަރުގައި ވަނީ ހާއްސަ އިސްކަންދޭ ކެޓަގަރީތައް ހިމަނާފަ އެވެ. އެ ނަންބަރުގެ ފ. ގައި އޮތީ މިނިސްޓްރީން އާންމުކޮށް އަންގައި އިއުލާނުކުރާ އިދާރާތަކާއި މުއައްސަސާތަކުގެ މުވައްޒަފުންނަށް ފްލެޓު ދެވޭ ގޮތަށެވެ.

ޖެނުއަރީ 18، 2026 ގައި ހައުސިން މިނިސްޓްރީން ފްލެޓަށް ހުޅުވާލުމަށް ކުރި އިއުލާނުގައި ހިމަނާފައިވާ އުސޫލުގައި ވަނީ އެ އިދާރާތަކާއި މުއައްސަސާތައް ކަނޑައަޅައި އަސާސީ ޝަރުތުތަކުގެ އިތުރުން ހުންނަން ޖެހޭ ޝަރުތުތަކެއް ހާމަކޮށްފަ އެވެ.

އެ ޝަރުތުތަކުގައި އޮތީ ފްލެޓަށް ކުރިމަތިލެވޭނީ އެ އިދާރާއެއް ނުވަތަ މުއައްސަސާއެއްގައި މެދުނުކެނޑި މަސައްކަތް ކުރާތާ ފަސް އަހަރު ވެފައިވާ މުވައްޒަފުންނަށް ކަމަށެވެ. އަދި ފްލެޓެއް ލިބިއްޖެނަމަ ފަސް އަހަރު އެފަދަ އިދާރާއެއް ނުވަތަ މުއައްސަސާއެއްގައި މަސައްކަތް ކުރަން އެއްބަސްވާނެ ޖެހޭ ކަމަށް ޝަރުތުތަކުގައި އޮތެވެ.

ނަމަވެސް، މާޗު 2، 2026 ގައި އެ އުސޫލަށް ބަދަލު ގެނެސް އަލުން ވަނީ ގެޒެޓުކޮށްފަ އެވެ. މިފަހަރު ބަދަލުކުރީ އެ ޝަރުތުތަކެވެ.

މިހާރު އުސޫލު އޮތްގޮތުން އެފަދަ އިދާރާއެއް ނުވަތަ މުއައްސަސާއެއްގައި މެދުނުކެނޑި އެއް އަހަރުގެ މުއްދަތަށް ހިދުމަތްކޮށްފައިވާ މުވައްޒަފުން ވެސް ފްލެޓަށް ޝަރުތު ހަމަވާނެ އެވެ. އަދި ފްލެޓެއް ލިބިއްޖެނަމަ އެފަދަ އިދާރާއެއް ނުވަތަ މުއައްސަސާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރަން އެއްބަސްވާން ޖެހެ އެވެ.

ކުރިން އޮތްގޮތުން ފަސް އަހަރު ވަޒީފާގައި އުޅެން ޖެހޭއިރު މި ބަދަލާއެކު އިދާރާތަކުން ބޭނުންވާ ވަރަކަށް މުވައްޒަފުންނަށް ޝަރުތު ކުރެވިދާނެ އެވެ.

ހާއްސަ އިސްކަންދޭ ކެޓަގަރީތަކާއި ފްލެޓުގެ އަދަދު

• ޖުޑީޝަރީގެ މުވައްޒަފުން - 100 ފްލެޓު
• ފުލުހުން - 100 ފްލެޓު
• ސިފައިން - 100 ފްލެޓު
• ސިވިލް ސާވިސްގެ މުވައްޒަފުން - 200 ފްލެޓު
• ކަރެކްޝަންސް މުވައްޒަފުން - 100 ފްލެޓު

އޭގެ އިތުރުން، ރައީސް އޮފީސް، މަޖިލިސް އިދާރާ، އެޓާނީ ޖެނެރަލް އޮފީސް، ފޮރިން ސާވިސް، ޖުޑީޝަލް ސާވިސް ކޮމިޝަން (ޖޭއެސްސީ)، އިލެކްޝަންސް ކޮމިޝަން (އީސީ)، ސިވިލް ސާވިސް ކޮމިޝަން (ސީއެސްސީ)، ހިއުމަން ރައިޓްސް ކޮމިޝަން (އެޗްއާރުސީއެމް)، އެންޓި ކޮރަޕްޝަން ކޮމިޝަން (އޭސީސީ)، އޮޑިޓު އޮފީސް، ޕްރޮސެކިއުޓާ ޖެނެރަލް އޮފީސް، އެމްއެމްއޭ، މީރާ، ޕެންޝަން އޮފީސް، އިންޓެގްރިޓީ ކޮމިޝަން، މީޑިއާ ކޮންޓްރޯލް ކޮމިޝަން، އެފްޕީއޭ، އެންޑީއެމްއޭ، ޗިލްޑްރަންސް އޮމްބަޑްސްޕާސަން އޮފީސް، އެލްޖީއޭ، ސިވިލް އޭވިއޭޝަން އޮތޯރިޓީ، ސީއެމްޑީއޭ، ޓެކްސް އެޕީލް ޓްރައިބިއުނަލް އަދި ވަޒީފާއާ ބެހޭ ޓްރައިބިއުނަލްގެ މުވައްޒަފުންނަށް 400 ފްލެޓު ހާއްސަކޮށްފައިވެ އެވެ.

ކޮންމެ އިދާރާއަކަށް ކަނޑައަޅާ ފްލެޓްތައް ލިބޭ މުވައްޒަފުން ކަނޑައަޅާނީ، ފްލެޓަށް އެދި ފޯމު ހުށަހަޅާ ޝަރުތު ހަމަވާ ފަރާތްތަކުގެ ތެރެއިން އެ އިދާރާއަކުން ކަނޑައަޅާ އުސޫލެއްގެ މަތިން ކަމަށް އެ އުސޫލުގައި ބުނެފައިވެ އެވެ.

ކުރިން އޮތް ގޮތުންނަމަ މި ފްލެޓުތަކަށް ޝަރުތު ހަމަވާނީ އެ އިދާރާތަކުގައި ޖެނުއަރީ 2021، ގެ ކުރިން ވަޒީފާ އަދާކުރަމުން އައި މުވައްޒަފުންނެވެ. ހައުސިން މިނިސްޓްރީން ގެނައި މި ބަދަލާއެކު ޖެނުއަރީ 2025، ގެ ކުރިން ވަޒީފާ ލިބިފައިވާ ހުރިހާ މުވައްޒަފުންނަށް ކުރިމަތިލެވޭނެ އެވެ.

ބިމާއި ފްލެޓަށް އެދުމުގެ ސުންގަޑިއަކީ އެޕްރީލް 30، ގެ 23:59 ކަމަށް ވަނީ ކަނޑައަޅާފަ އެވެ.