ޓޫރިޒަމް ދާއިރާގެ މަސައްކަތްތެރިންގެ މައުލޫމާތު ބެލެހެއްޓުމަށް ހާއްސަކޮށްގެން ޓޫރިޒަމް މިނިސްޓްރީން ފަރުމާކުރި "ފަހިވޭ" އެޕްގެ މަސައްކަތް ނިމި، ތައާރަފުކުރުމުގެ މަސައްކަތް ފަށައިފި އެވެ.
މި އެޕުން ޓޫރިޒަމް މަސައްކަތްތެރިން އެއް ޕްލެޓްފޯމަކުން ގުޅާލާ، ޓޫރިޒަމް ދާއިރާގެ ވަޒީފާތަކާ ގުޅޭ މައުލޫމަތު ވެސް ލިބޭނެ އެވެ.
ޓޫރިޒަމް މިނިސްޓްރީން ބުނި ގޮތުގައި މިހާރު މަސައްކަތް ކުރަމުން ދަނީ ޓޫރިޒަމް އިންޑަސްޓްރީ މި އެޕަށް އަހުލުވެރިކުރުމުގެ މަސައްކަތެވެ.
އެގޮތުން މި އެޕްލިކޭޝަނަށް އެޑްމިނިސްޓްރޭޓަރުން އައްޔަނުކުރަން ޓޫރިސްޓް ފެސިލިޓީތަކަށް ވަނީ ދައުވަތު ފޮނުވާފަ އެވެ. އެޕަށް މީހުން ރަޖިސްޓްރީކުރުމަށް ފަހު، ތަމްރީނުކުރުމުގެ މަސައްކަތްތަކާއި، މައުލޫމާތުތައް އަޕްޑޭޓް ކުރަމުން އަންނަ ކަމަށް ޓޫރިޒަމުން ބުންޏެވެ.
މިނިސްޓްރީން ލަފާކުރަނީ މި ހުރިހާ މަސައްކަތެއް ނިމި، އެޕް ލޯންޗު ކުރެވޭނީ އަންނަ އޮކްޓޫބަރު މަހުގެ ފުރަތަމަ ހަފުތާގެ ތެރޭގައި ކަމަށެވެ. މި އެޕްގެ ޒަރިއްޔާއިން މަސައްކަތްތެރިންނާއި ވަޒީފާދޭ ފަރާތްތަކަށް ހުރި ގޮންޖެހުންތައް ހައްލުކުރުމަށް ވެސް މަގުފަހި ވެގެން ދާނެ ކަމަށް މިނިސްޓްރީން ބުންޏެވެ.
ކުރީގެ ޓޫރިޒަމް މިނިސްޓަރު އަލީ ވަހީދުގެ ހުންނެވި އިރު، މި އެޕް މިދިޔަ އަހަރުގެ މެއި 1 ގައި ތައާރަފުކުރަން އޮތީ ނިންމައިފަ އެވެ. ނަމަވެސް ލަސްވެގެން ދިޔައީ މަސައްކަތް ނުނިމިގެންނެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން 2019 ވަނަ އަހަރު ހަދާފައިވާ، ސާވޭއިން ދައްކާ ގޮތުގައި، ރާއްޖޭގެ އިގުތިސޯދަށް އެންމެ ބޮޑު ހިއްސާއެއްކުރާ ރިސޯޓުތަކުގައި 45،000 މުވައްޒަފުން ވަޒީފާ އަދާކުރެ އެވެ.
