ކުދި އަދި މެދު ފަންތީގެ ވިޔަފާރިތަކަށް ސަރުކާރުން ލޯނު ދޫކުރަމުންދަނީ އެކަމަށް ހާއްސަކޮށް އުފައްދާފައިވާ އެސްއެމްއީ ޑިވެލޮޕްމަންޓް ފައިނޭންސް ކޯޕޮރޭޝަން (އެސްޑީއެފްސީ) މެދުވެރިކޮށް ކަމަށާއި، އެތަނުން ހިދުމަތްދޭ ކަސްޓަމަރުންގެ މައުލޫމާތު ހާމަކުރުން ގާނޫނު ތަންނުދޭ ކަމަށް އިކޮނޮމިކް މިނިސްޓްރީން ބުނެފި އެވެ.
ސަރުކާރު މެދުވެރިވެގެން އެސްއެމްއީ ލޯނު ދެވިފައިވާ ފަރާތްތަކާއި އެ ލޯނުތައް އަނބުރާ ގަވައިދުން ދައްކަމުންދާ ފަރާތްތަކުގެ ތަފްސީލް ހޯދަން މެދު ހެންވޭރު ދާއިރާގެ މެމްބަރު އަލީ އާޒިމް ކުރެއްވި ސުވާލަށް ލިޔުމުން ދެއްވި ޖަވާބުގައި އިކޮނޮމިކް މިނިސްޓަރު ފައްޔާޒް އިސްމާއީލް ވަނީ އެފަދަ ލޯނުތައް ދެމުންދަނީ އެސްޑީއެފްސީ މެދުވެރިކޮށް ކަމަށެވެ.
އެސްޑީއެފްސީ އަކީ މަރުކަޒީ ބޭންކް އެމްއެމްއޭގައި ރެޖިސްޓްރީ ކުރެވިގެން ހިންގޭ މާލީ އިދާރާއަކަށްވާއިރު، ކަސްޓަމަރުންގެ ޒާތީ މައުލޫމާތު ހާމަކުރުމަށް ގާނޫނު ތަންނުދޭކަމަށް އެތަނުން އަންގާފައިވާކަމަށް ފައްޔާޒްގެ ޖަވާބުގައި ވިދާޅުވެފައި ވެ އެވެ.
"...މި މިނިސްޓްރީއަށް އަމާޒުވާ އިލްޒާމުތަކާގުޅޭ ގޮތުން ހަގީގަތް ހާމަކުރުމުގެ ބޭނުމުގައި ނުހަނު ބޭނުންތެރިކަމެއް ކަމަށް އަޅުގަނޑު ދެކޭތީ އާއި އަދި އެ މައުލޫމާތު ހޯއްދެވުމަށް ރައްޔިތުންގެ މަޖިލީހުގެ މެމްބަރަކު އެދިވަޑައިގަންނަވާތީ، ގާނޫނު ހުއްދަކުރާ މިންވަރަށް އެ މައުލޫމާތު ވަކިން މެމްބަރާ ހިއްސާކުރުމަށް އެސްޑީއެފްސީގައި އަޅުގަނޑު އެދިފައިވާނެ،" ފައްޔާޒް ވިދާޅުވެފައި ވެ އެވެ.
އިކޮނޮމިކް މިނިސްޓަރު ފައްޔާޒް މިދިޔަ ޖޫން މަހުގެ ފަހުކޮޅު ބޭއްވި ނޫސްވެރިންގެ ބައްދަލުވުމުގައި، އެސްޑީއެފްސީ މެދުވެރިކޮށް އެހާތަނަށް 1.6 ބިލިއަން ރުފިޔާގެ ލޯނު ދޫކުރެވިފައިވާކަމަށް ވިދާޅުވެފައި ވެ އެވެ.
ކޮވިޑާ ގުޅިގެން ރާއްޖެއަށް ކުރިމަތިވެފައިވާ އިގުތިސޯދީ ހީނަރުކަމުގެ ސަބަބުން ވިޔަފާރިތަކަށް ލިބުނު ގެއްލުންތައް ކުޑަކުރަން، އެސްޑީއެފްސީ މެދުވެރިކޮށް ކުދި ވިޔަފާރިތަކަށް ހާއްސަކޮށްގެން ތައާރަފްކުރި ރިލީފް ލޯނުގެ އަދަދު 360 މިލިއަން ރުފިޔާއަށް އަރާކަމަށް އެ ދުވަހު ފައްޔާޒް ވިދާޅުވެފައި ވެ އެވެ.
މިދިޔަ އަހަރުގެ އޭޕްރީލް މަހުގެ ތެރޭގައި ސަރުކާރުން އިއުލާނުކުރި އިކޮނޮމިކް ރިލީފް ޕެކޭޖުގެ ތެރޭގައި ކުދި ވިޔަފާރިތަކަށާއި އަމިއްލަ މަސައްކަތްކުރާ ފަރުދުންނަށް ހާއްސަ ލޯނު ސްކީމެއް ހިމެނި އެވެ.
އެގޮތުން، "ވިޔަފާރި އެހީ"ގެ ލޯނު އެސްޑީއެފްސީ މެދުވެރިކޮށް ދޫކުރަން ހަމަޖައްސައި، ކުދި ވިޔަފާރިތައް ގިންތިކޮށްފައިވަނީ އޭގެ ކުރީ އަހަރު ވިޔަފާރީގެ އާމްދަނީ ދިހަ މިލިއަނަށް ވުރެ އިތުރުނުވާ ވިޔަފާރިތަކެވެ.
އަދި އެފަދަ ކުދި ވިޔަފާރިތަކަށް ގިނަވެގެން ފަސް ލައްކަ ރުފިޔާ އާއި އަމިއްލަ މަސައްކަތްކުރާ ފަރާތްތަކަށް 30،000 ގެ ލިމިޓެއް ކަނޑައެޅި އެވެ.
ނަމަވެސް، އެ ލޯނުތައް ދޫކޮށްފައިވަނީ އެ ލޯނު އަނބުރާ ދެއްކުމުގެ ގާބިލުކަމަށް އިސްކަންނުދީކަމަށް އޮޑިޓް އޮފީހުން ދާދި ފަހުން އާންމުކުރި ހާއްސަ އޮޑިޓް ރިޕޯޓުގައި ވަނީ ބުނެފަ އެވެ.
