ރައްޔިތުންނާ ގުޅިގެން ހިދުމަތް ދިނުމުގެ ކަންކަން އެންމެ ފުރިހަމައަށް ފޯރުކޮށްދޭ ފުލުހުންގެ މަރުކަޒުތަކާއި ރަށްތައް އަދި އަވަށްތައް ފާހަގަކޮށް ހާއްސަ އެވޯޑެއް ދޭން ކޮމިޝަނާ އޮފް ޕޮލިސް މުހައްމަދު ހަމީދު ނިންމަވައިފި އެވެ.
ހަމީދު މިކަން އިއުލާން ކުރެއްވީ ނ. މަނަދޫ ޕޮލިސް ސްޓޭޝަނުގެ ބިންގާ އެޅުމަށް މަނަދޫގައި މިއަދު ބޭއްވި ރަސްމިއްޔާތުގަ އެވެ.
ނަމަވެސް، އަންނަ އަހަރުން ފެށިގެން ދިނުމަށް ހަމަޖެހިފައިވާ އެ އެވޯޑްގެ އިތުރު ތަފްސީލެއް ނުދެއްވަ އެވެ.
ހަމީދު ވިދާޅުވި ގޮތުގައި، އަލަށް ގެނައި ފުލުހުންގެ ހިދުމަތުގެ ގާނޫނުގައި، ރައްޔިތުންނާއި ފުލުހުންގެ މެދުގައި އޮންނަ ގުޅުން ދެމެހެއްޓުމަށް ވަރަށް ބޮޑަށް ބާރުއަޅާފައިވެ އެވެ.
އަދި ކައުންސިލުތަކާއި އެހެނިހެން މުއައްސަސާތަކާއި ރައްޔިތުންނާ އެކުގައި މަސައްކަތްކުރުމަށް ހާއްސަ އޮނިގަނޑެއް، މި މަހުގެ 27 ގެ ނިޔަލަށް އެކުލަވާލަންޖެހޭ ކަމާއި އެކަމުގެ އިންތިޒާމުތައް މިހާރު ވެސް ކުރަމުން އަންނަ ކަމަށް ހަމީދު ވިދާޅުވި އެވެ.
ހަމީދު އިތުރަށް ވިދާޅުވި ގޮތުގައި އާ ގާނޫނުން، ފުލުހުންގެ މަސައްކަތްތައް އިންތިޒާމުވެގެންވާ ގޮތް ވަަރަށް ސާފުކޮށް ކަނޑައަޅައިދީފައިވާ ކަމަށާއި ލާމަރުކަޒީ ހިދުމަތްދިނުމަށާއި މުޖުތަމައުއާ އޮންނަ ގުޅުން ދެމެހެއްޓުމަށް ވެސް ބާރުއަޅަ އެވެ.
"އެހެންކަމުން، ފުލުހުންގެ މަސައްކަތްތައް އަމާޒުކުރެވިފައިވަނީ ރައްޔިތުންނަށް ފުލުހުންދޭ ހިދުމަތް އަލުން ތަރުތީބުކޮށް، ޑިމޮކްރެޓިކް ވެއްޓަކަށް އެކަށޭނަ އަދި ތަރައްގީވެފައިވާ ފުލުހުންގެ ހިދުމަތްތަކެއް މުޅި ރާއްޖެއަށް ފޯރުކޮށްދޭ މުއައްސަސާއަކަށް ދިވެހި ފުލުހުންގެ ހިދުމަތް ބަދަލުކުރުން،" ހަމީދު ވިދާޅުވި އެވެ.
ދިވެހި ފުލުހުންގެ ހިދުމަތުގެ ސްޓްރެޓީޖިކް ޕްލޭންގައި ކަނޑައަޅާފައިވާ ހަ ލަނޑުދަނޑީގެ ތެރޭގައި ލޯކަލް ޕޮލިސިން ކަނޑައަޅާފައިވަނީ އަތޮޅު ތެރޭގައި ދެވޭ ހިދުމަތަށް އިތުރު އަހަންމިއްޔަތުކަމެއް ދިނުމުގެ މަގުސަދުގައި ކަމަށް ހަމީދު ވިދާޅުވި އެވެ. އަދި ފުލުހުންގެ ހިދުމަތަށް ގެނެވޭ ބަދަލުތަކުގެ ތެރެއިން އެއް އިންގިލާބީ ބަދަލަކީ ނެއިބަހުޑް ޕޮލިސް ނުވަތަ އަވައްޓެރި ފުލުހުންގެ މަސައްކަތްކަމާއި ނ. އަތޮޅުގައި ވެސް ވަރަށް އަވަހަށް އެ ހިދުމަތް ފެށިގެންދާނެ ވެސް ވިދާޅުވި އެވެ.
ރަސްމިއްޔާތުގައި ވާހަކަ ދައްކަވަމުން ހޯމް މިނިސްޓަރު އިމްރާން އަބްދުﷲ ވިދާޅުވީ މި ސަރުކާރުން ދަނީ ފުލުހުންގެ މުއައްސަސާ ހަރުދަނާކޮށް ކުރިއެރުވުމަށްޓަކައި ވަރަށް ބޮޑަތި މަސައްކަތްތަކެއް ކުރަމުން ކަމަށެވެ. ހާއްސަކޮށް އަތޮޅުތެރޭގައި ފުލުހުންގެ ހިދުމަތް ފުރިހަމަކޮށް ދެވޭ ހިދުމަތް އިތުރުކުރުމަށްޓަކައި، ވަރަށްގިނަ ކަންކަން ރޭވިގެންދާ ކަމަށެވެ.
"ފުލުހުންގެ ހިދުމަތަށް މިވޭތުވެދިޔަ 86 އަހަރުގެ ތެރޭގައި ނުކުރެވޭފަދަ ބޮޑަތި މަސައްކަތްތަކެއް، މިސަރުކާރުން ކުރަމުންގެންދާ ކަމަކީ ފެންނަން އޮތް ވަރަށް ސާފް ހަގީގަތެއް. މިއަދު އަތޮޅުތެރޭގެ 52 ރަށަށްވުރެ ގިނަ ރަށުގައި ސްޓޭޝަންތައް އެޅުމަށް ތައްޔާރުވަމުންދާ ދިއުމަކީ އަތޮޅުތެރޭގައި ފުލުހުންގެ ހިދުމަތް އިތުރަށް ވަރުދަކުރުމަށް މިސަރުކާރުން ކުރާ ވަރަށްބޮޑު މަސައްކަތެއް." އިމްރާން ވިދާޅުވި އެވެ.
މިނިސްޓަރު ވިދާޅުވި ގޮތުގައި އެންމެން ގުޅިގެން ކުރެވޭ މަސައްކަތުން ފުލުހުންގެ މުއައްސަސާއަކީ ރައްޔިތުން އެންމެ ލޯބިވާ، އެންމެ އިތުބާރުކުރާ، އިހުތިރާމްކުރާ މުއައްސަސާގެ ފަރާތުން ރައްޔިތުންނަށް އަމާންކަމާއި ރައްކާތެރިކަން ކަށަވަރުވެގެންދާ މުއައްސާކަމުގައި ވެގެންދާނެ އެވެ.
"ފުލުހުންގެ މުއައްސަސާ ކުރިއަރައިގެން ދިއުމަކީ ހުރިހާ ރައްޔިތުންނަށް ލިބޭ ކުރިއެރުމެއް. ފުލުހުންގެ މުއައްސަސާއަކީ ރައްޔިތުންގެ މުއައްސަސާއެއް. އެކަން އެގޮތުގައި ދެނެތިބެގެން ގަބޫލުކޮށްގެން މިމުއައްސަސާ އަބަދުވެސް ފަހުރުވެރިކަމާއެކު ދެމިއޮންނަ ގޮތަށް މުއައްސަސާއަށް ރީތިނަން ލިބޭގޮތަށް ރައްޔިތުން މަސައްކަތްކޮށްދިނުމަކީ އަޅުގަނޑު ރައްޔިތުންގެ ކިބައިން އެދޭކަމެއް." މިނިސްޓަރު ވިދާޅުވި އެވެ.
