ތަހުގީގުގައި ފުލުހުން ގޯސް ހަދާފައި އޮތުމުން ކުޑަކުއްޖަކާއެކު ޖިންސީ ގުޅުން ހިންގި ކަމުގެ މައްސަލައެއްގައި ކުށް ސާބިތުވެފައިވާ މީހަކު ސަލާމަތްވެއްޖެ އެވެ.
ހައިކޯޓުން އިއްޔެ ސަލާމަތް ކޮށްފައިވަނީ 17 އަހަރުގެ ކުއްޖަކާއެކު ޖިންސީ ގުޅުން ހިންގުމުގެ ސަބަބުން އެ ކުއްޖާ ބަނޑުބޮޑުވެ، އަދި އެބޯޓްވި މައްސަލައެއްގައި ކުށް ސާބިތުވި އަމްޖަދު މުހައްމަދު ކިޔާ މީހެކެވެ.
ހއ. މާރަންދޫގައި ފަޅު ގެއެއްގެ ތެރޭ ހިނގި މި ހާދިސާއާ ގުޅިގެން އަމްޖަދުގެ މައްޗަށް ދައުވާ އުފުލައި، އެ ރަށު މެޖިސްޓްރޭޓް ކޯޓުގައި ޝަރީއަތް ހިންގުމަށްފަހު އޭނާގެ މައްޗަށް 10 މަހުގެ ޖަލު ހުކުމެއް އިއްވި އެވެ.
ނަމަވެސް، އެ ހުކުމް ހައިކޯޓުގައި އޭނާ އިސްތިއުނާފު ކުރުމުން، ފުލުހުން ހަދާފައި އޮތް ގޯހެއްގެ ސަބަބުން ޖަލު ހުކުމުން އޭނާ ސަލާމަތްވީ އެވެ.
ބޮޑު ހުކުމަކުން އަމްޖަދު މުހައްމަދުގެ މައްޗަށް ސަލާމަތްވީ އޭނާއަށް ދައުވާކޮށްފައިވަނީ އޭނާގެ މައްޗަށް ތުހުމަތުކޮށް ތަހުގީގު ކުރި ތުހުމަތުގެ މައްޗަށް ނޫން ކަމުގައިވާތީ އެވެ.
ތަހުގީގުގައި އަމްޖަދުއާ ސުވާލުކޮށްފައިވަނީ ޒިނޭގެ ކުށާ ގުޅޭ ގޮތުންނެވެ. ނަމަވެސް، އޭނާގެ މައްޗަށް ދައުވާކޮށްފައިވަނީ ކުޑަކުދިންނަށް ގޯނާ ކުރާ މީހުންނާމެދު ހާއްސަ އުސޫލުތަކުން އަމަލު ކުރުމުގެ ގާނޫނުގެ ދަށުން، ކުށަށް ތުހުމަތުކޮށެވެ.
އޭނާގެ މައްޗަށް ކުރި ދައުވާއަކީ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ދައުވާ އެވެ. އެ ކުށަކާ ގުޅޭ ގޮތުން ގާނޫނީ އިންޒާރު އޭނާއަށް ދީފައެއް ނުވެ އެވެ.
ހައިކޯޓުގެ ހުކުމްގައި ބުނި ގޮތުގައި މީހެއްގެ މައްޗަށް ކުށެއްގެ ތުހުމަތު ކުރެވޭއިރު އެމީހެއްގެ މައްޗަށް އޮތް ތުހުމަތު އެނގެން ޖެހޭނެ އެވެ. ނޭނގި އެކަމުން ދިފާއުވުމަށް ފުރުސަތު ދޫވުނީ ކަމަށް ބަލާނެ ހަމައެއް ނޯންނާނެ ކަމަށެވެ.
އަމްޖަދުގެ މައްޗަށް ތުހުމަތު ކުރި ކުށް ނޫން އެހެން ކުށެއްގެ މައްޗަށް ދައުވާކުރި މައްސަލައެއްގައި ހުށަހަޅާފައިވާ ހެއްކަކީ އިޖުރާއީ ގޮތުން އެކަމަށް ކަނޑައަޅާފައިވާ އުސޫލުތަކާ އެއްގޮތަށް ހޯދާފައިވާ ހެއްކަށް ނުވާނެ ކަމަށް ހައިކޯޓުން ބުންޏެވެ.
އެހެންވެ، މި މައްސަލާގައި އަމްޖަދުގެ މައްޗަށް އިއްވާފައިވާ ޖަލު ހުކުމް ބާތިލް ކުރަން ޖެހޭ ކަމަށް ހައިކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ހުކުމް ކުރެއްވި އެވެ.
