ކުރިއަށް އޮތް ސާބާ މެންސް ޗެމްޕިއަންޝިޕް ބާސްކެޓް ބޯޅަ މުބާރާތުގައި ވާދަކުރަން ތައްޔާރުވަމުން އަންނަ ގައުމީ ބާސްކެޓްބޯޅަ ޓީމުގެ ސްކޮޑުގައި އިބްރާހިމް ރަޝްވާން (ޗިކު) އާއި އަހުމަދު އައުޝަން ހިމެނިއްޖެ އެވެ.
އައުޝަން އަށް ގައުމީ ސްކޮޑުން އެންމެ ފަހުން ފުރުސަތު ލިބުނީ 2015 ވަނަ އަހަރުގެ ރީޔޫނިއަންގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިންނެވެ. ރާއްޖޭގެ އެންމެ މޮޅު ބާސްކެޓްބޯޅަ ކުޅުންތެރިޔާގެ މަގާމު ހޯދާފައިވާ ޗިކޫ އަށް ގައުމީ ސްކޮޑުން އެންމެ ފަހުން ޖާގަ ލިބުނީ 2018 ވަނަ އަަހަރު އެވެ.
ޕްރޮފެޝަަނަލް ލެވަލްގައި ގިނަ އަހަރުތަކެއް ކުޅުނު އައުޝަންގެ ލޮލަށް ކުރިމަތިވި ގެއްލުމަކާ ގުޅިގެން 2016 ވަނަ އަހަރުން ފެށިގެން އޭނާ ގަވާއިދުން މުބާރާތްތަކުގައި ވާދަކުރުމަށް މެދުކެނޑުމެއް އަ އެވެ. އެކަމަކު، ފަހަކަށް އައިސް އޭނާ އަންނަނީ އަލުން ކެރިއަރުގައި ކުރިއަށްދާން ގިނަ މަސައްކަތްތަކެއް ކުރަމުންނެވެ.
ޗިކޫ ގައުމީ ޓީމަށް އެނބުރި މިއައީ ކަކުލުގެ ސީރިއަސް އަނިޔާއެއްގެ ސަބަބުން ކުޅުމާ ދުރަށް ދާން ޖެހި، އެ އަނިޔާއިން އެއްކޮށް ރިކަވާވެގެންނެވެ. ޗިކޫގެ ކަކުލަށް 2018 ވަނަ އަހަރު ސީރިއަސް އަނިޔާއެއް ދިމާވީ ސްރީ ލަންކާގައި ކުޅުނު ތުރީއޮންތުރީ މުބާރާތެއްގެ ތެރެއިންނެވެ. ޗިކޫ ވަނީ ރިހެބިލިޓޭޝަނަށް ފޯކަސްކޮށްގެން އަލުން ކުރީގެ ފޯމަށް އަންނަން މަސައްކަތްކޮށް އެއްކޮށް ފިޓްވެގެން އައިސް ލޯކަލް މުބާރާތްތަކުގައި ފަހުން ވާދަކޮށްފަ އެވެ.
ސާބާ ޗެމްޕިއަންޝިޕްގައި ވާދަކުރާ ގައުމީ ސްކޮޑު.-- ފޮޓޯ: އެމްބީއޭ
އައުޝަން އާއި ޗިކޫގެ އިތުރުން ގައުމީ ސްކޮޑުގައި ދެން ހިމެނޭ ކުޅުންތެރިންނަކީ އިސްމާއިލް ފަރުހާން، އިބްރާހިމް އަންފާލް ޝަރީފް، އަހުމަދު ފިރާޝް، މުހައްމަދު ސަބީހު ތައުފީގް، އަހުމަދު އަލީ މުސްތަފާ، އަހުމަދު އިފްސާހް، އަހުމަދު ޒަބީރް، އިބްރާހިމް ނަސީމް، ހުސެއިން ހަލީމް (ޗިކަނޭ)، މުހައްމަދު އަޝްމަލް އަހުމަދު، ރިޝްފާން ރަޝީދު، އިސްމާއިލް ވިލްދާން، އަބްދުﷲ އަމްޒަރު، މުހައްމަދު ހުވައިލިދު އަލީ، ޒަކަރިއްޔާ އަބްދުއްލަތީފް (ޒަކިއްޓެ) އަދި މަފާޒް މުހައްމަދު އެވެ.
ބާސްކެޓްބޯޅަ ޓީމުގެ ހެޑް ކޯޗަކަށް ކުރިން ގައުމީ ޓީމަށް ކުޅުނު އަދި ފަހަކަށް އައިސް ބާސްކެޓްގައި ވިދަމުން އަންނަ ކޯޗު އިލްޔާސް އިބްރާހިމް (އިއްލެ) ވަނީ ހަމަޖައްސައިފަ އެވެ. އަދި އެސިސްޓަންޓް ކޯޗުންގެ ގޮތުގައި މަސައްކަތްކުރާނީ މުހައްމަދު ޒިލާލް (ޒިލާ) އާއި އަލީ ފަޒްލީ އެވެ.
ޒިލާ އާއި ފަޒްލީ ގައުމީ ޓީމަށް ކުޅުން ހުއްޓާލީ ގިނަ އަހަރުތަކެއް ވަންދެން ރާއްޖެ ތަމްސީލް ކުރުމަށް ފަހު 2019 ވަނަ އަހަރުގެ ސައުތު އޭޝިއަން ގޭމްސް އަށް ފަހު އެވެ.
ގައުމީ ޓީމުން ތައްޔާރުވަމުން އަންނަނީ ބަންގްލަދޭޝްގައި އޮކްޓޫބަރު 21 ވަނަ ދުވަހު ފަށާ ސާބާ ޗެމްޕިއަންޝިޕް އަށެވެ. މިއީ ކޮވިޑް-19ގެ މެދުކަނޑާލުމަށް ފަހު ގައުމީ ބާސްކެޓް ޓީމުން ވާދަކުރާ ފުރަތަމަ މުބާރާތެެވެ.
