އެމްޑީޕީގެ އިސްތިއުނާފު ފަނޑިޔާރުންގެ މަޖިލީހަށް ރައީސް ސޯލިހުގެ ކެންޑިޑޭޓުން ހޮވިއްޖެ

އެމްޑީޕީގެ އެތެރޭގެ ވާދަވެރިކަން ބޮޑުވެފައި އޮތްވައި، ޕާޓީގެ ބާރުގަދަ ގުނަވަނެއް ކަަމަށްވާ އިސްތިއުނާފު ފަނޑިޔާރުންގެ މަޖިލީހަށް ޕާޓީގެ އިސް ލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތާއިދު ކުރެއްވި ކެންޑިޑޭޓުން އިންތިހާބުކޮށްފި އެވެ.

ނުވަ މެމްބަރުންގެ މައްޗަށް އެކުލެވޭ އިސްތިއުނާފު ފަނޑިޔާރުންގެ މަޖިލީހަށް ވާދަކުރި 18 ކެންޑިޑޭޓުންގެ ތެރެއިން، ގައުމީ މަޖިލީހުގައި ރޭ ނެގި ސިއްރު ވޯޓުގައި އެންމެ ގިނަ ވޯޓުން އެ މަޖިލީހަށް ހޮވިފައިވަނީ، އެމްޑީޕީގެ ކުރީގެ ސެކްރެޓަރީ ޖެނެރަލް އަނަސް އަބްދުއްސައްތާރެވެ.

އިސްތިއުނާފު މަޖިލީހަށް ހޮވުނު ކެންޑިޑޭޓުން

1. އަނަސް އަބްދުއްސައްތާރު، މއ. ބަޑިކުޅިމާލެ، މާލެ (76 ވޯޓު)

2. އަހުމަދު ރިޝްވާން، އާލަމް، ހއ. ދިއްދޫ (71 ވޯޓު)

3. އިބްރާހިމް މުހައްމަދު ދީދީ، ލެގޫން ވިއު، ސ. ހިތަދޫ (67 ވޯޓު)

4. އަހުމަދު މައުރޫފު، ނިއު ލައިޓް، ލ. ކަލައިދޫ (67 ވޯޓު)

5. ފާތިމަތު އިނާޝާ، ހ. ގްރީން ފެހި، މާލެ (66 ވޯޓު)

6. ހުސައިން ރަޝީދު، ތިބުރޯޒުގެ، ތ. އޮމަދޫ (66 ވޯޓު)

7. އާދަމް މާހިރު، މެޑޯޒް، ރ. އަލިފުށި (65 ވޯޓު)

8. އަހުމަދު ނިޝާދު، ނޫރު، މ. ދިއްގަރު (64 ވޯޓު)

9. ނައުޝާދު އަބްދުލް އަޒީޒު، ސުވޭދާ މަންޒިލު، އއ. ރަސްދޫ (63 ވޯޓު)

ވާދަކުރެއްވި އެހެން ކެންޑިޑޭޓުން

1. އަމީން ފައިސަލް، ހ. ތަނޑިރަތްމާގެ، މާލެ (48 ވޯޓު)

2. ފާތިމަތު ޝަހީދާ، ބޯގަހަހެނާ، މާލެ (51 ވޯޓު)

3. އަހުމަދު ޒުހައިރު، ރޭއަލިވާގެ، ސ. ހިތަދޫ (47 ވޯޓު)

4. ސޫޒަން އިބްރާހިމް، ހ. ދޫހިމެރިގެ، މާލެ (45 ވޯޓު)

5. އަހުމަދު އަފުރާހު، އާރު، ބ. ތުޅާދޫ (42 ވޯޓު)

6. ފަޟާޙް އަހުމަދު، ހ. ހިކަރީ، މާލެ (48 ވޯޓު)

7. މުހައްމަދު ކަމާލު، ފޮނިތޮށިގެ، ގއ. ދާންދޫ (41 ވޯޓު)

8. ހަސަން ޒާހިރު، މ. ރަންފަސް، މާލެ (50 ވޯޓު)

9. އަބްދުލް މަޖީދު ޝަމީމް، މ. އަލިމަސްވާދީ، މާލެ (59 ވޯޓު)

ސަރުކާރު ހިންގާ ކޯލިޝަންގެ މައި ޕާޓީގެ އިސްތިއުނާފު ފަނޑިޔާރުންގެ މަޖިލީސްގެ އިންތިހާބުގައި އެ ޕާޓީގެ ގައުމީ މަޖިލީހުގެ 120 މެމްބަރުން ވޯޓު ދެއްވި އެވެ.

އިސްތިއުނާފް ފަނޑިޔާރުންގެ މަޖިލީހުގެ ޒިންމާއަކީ އެމްޑީޕީގެ އަސާސީ ގަވާއިދުގެ އެއްވެސް ކަމަކާ މެދު މެމްބަރަކު ޝަކުވާއެއް އިސްތިއުނާފްކުރަން ބޭނުންވާ ނަމަ އެ ޝަކުވާ ބެލުމެވެ. މީގެ އިތުރުން އަސާސީ ގަވާއިދު މާނުކުރުމާ މެދު އުފެދޭ ހުރިހާ ދެބަސްވުންތަކުގެ ހައްލަށް ވެސް އެ މަޖިލީހަށް ހުށަހެޅިދާނެ ކަމަށް އަސާސީ ގަވާއިދުގައިވެ އެވެ.

އެމްޑީޕީގެ އަސާސީ ގަވާއިދުގައިވާ ގޮތުގައި ފަސް އަހަރުގެ ދައުރަކަށް ހޮވާ އެ މަޖިލިސް އެކުލެވިގެންވާނީ ރައީސާއި އަށް މެމްބަރުންގެ މައްޗަށެވެ.

ފަސް އަހަރުގެ ދައުރު ހަމަވުމުން، އިތުރު ދައުރަކަށް އެ މެމްބަރަކު އިންތިހާބު ވެސް ކުރެވެ އެވެ.

އެމްޑީޕީގެ ގައުމީ މަޖިލީހުގެ މެމްބަރުންނަށް އިސްތިއުނާފް ފަނޑިޔާރު މަޖިލީހުގައި ނުތިބެވޭނެ އެވެ. ގައުމީ މަޖިލީހަށް ހޮވިއްޖެ ނަމަ އެ މީހެއްގެ މަގާމް ގެއްލޭނެ އެވެ.

އެމްޑީޕީގެ މުހިއްމު ކޮމިޓީއަކަށް މެމްބަރުން ހޮވުން ކުރިއަށް އޮތް އިރު، ޕާޓީގެ ގައުމީ މަޖިލީހަށް މެމްބަރުން އިންތިހާބުކުރުން ސެޕްޓެމްބަރުގައި ބާއްވަން ނިންމައި ކެންޑިޑޭޓުންގެ ލިސްޓު އޮތީ އާއްމުކޮށްފަ އެވެ.