ކުރީގެ ރައީސް އަބްދުﷲ ޔާމީންގެ މައްޗަށް ކަޅު ފައިސާ ދޮވުމުގެ ކުށް ސާބިތުވިއިރު ބެންޗުގައި ތިއްބެވި ބައެއް ފަނޑިޔާރުން ކަމަށް ބެލެވޭ ބަޔަކު އެ މައްސަލައާ ގުޅޭ ގޮތުން ވާހަކަ ދައްކަނިކޮށް އިއްޔެ ލީކުކޮށްލާފައިވާ އޯޑިއޯތައް އެ ފަނޑިޔާރުން ދޮގުކޮށްފި އެވެ.
ބައެއް މީޑިޔާތަކުގައި އިއްޔެ ލީކުކޮށްލި އެ އޯޑިއޯތަކުގައި ފަނޑިޔާރު ހުސެއިން ރަޝާދު ފާއިޒާއި އަލީ އާދަމް އާއި މުހައްމަދު ސަމީރު ވާހަކަ ދައްކަވާ އަޑު އިވޭ ކަމަށް ރިޕޯޓްކޮށްފައި އޮތެވެ. އަދި އެ މައްސަލަ ހޫނުވެ، އޯޑިއޯ ތަހުގީގު ކުރުމަށް ފުލުހުންނަށް އަދި ޖޭއެސްސީއަށް އޮތީ ހުށަހަޅައިފަ އެވެ.
އެކަމާ ގުޅިގެން މިއަދު ޖޭއެސްސީން ނެރުނު ބަޔާނެއްގައި ބުނެފައި ވަނީ އެ ތިން ފަނޑިޔާރުން މިއަދު އެ ކޮމިޝަނަށް ހާޒިރުކޮށް ސުވާލު ކުރުމުން އެ އޯޑިއޯތަކަކީ ފޭކު އޯޑިއޯތަކެއް ކަމަށް ވިދާޅުވެފައިވާ ކަމަށެވެ.
"މީޑިޔާގައި ދައުރުވަމުންދާ އޯޑިއޯތަކަކީ ސައްހަ އޯޑިއޯތަކެއް ނޫން ކަމަށާއި އެފަދަ ވާހަތަކެއް ދައްކާފައިނުވާނެ ކަމަށް އިސްވެ ދެންނެވުނު ފަނޑިޔާރުން ވަނީ ވިދާޅުވެފަ،" ޖޭއެސްސީގެ ބަޔާނުގައިވެ އެވެ.
އިއްޔެ އެންމެ ފުރަތަމަ ލީކުކޮށްލާފައި ވަނީ ފާއިޒު ވާހަކަ ދައްކަވާ ކަމަށް ބުނާ އޯޑިއޯއެކެވެ. އަދި އޭގެ ފަހުން އަލީ އާދަމް އަދި ސަމީރުގެ އޯޑިއޯއެއް އުޅޭ ކަމަށް ވެސް ބައެއް މީޑިޔާތަކުން ބުނެފައިވެ އެވެ.
އެމްއެމްޕީއާރްސީގެ ފައިސާ އެކައުންޓަށް ވަދެފައިވާ މައްސަލައެއްގައި ކަޅު ފައިސާ ދޮވުމުގެ ކުށް ސާބިތުވެ ރައީސް ޔާމީންގެ މައްޗަށް ކްރިމިނަލް ކޯޓުން ހުކުމް ކުރީ ނޮވެމްބަރު 8، 2019 ގަ އެވެ.
އޯޑިއޯތައް އިއްޔެ ލީކުކޮށްލިއިރު، ސާބިތުވި ކުށުގެ އަދަބެއްގެ ގޮތުން ދައުލަތަށް ދައްކަން ޔާމީންގެ މައްޗަށް އަމުރު ކުރި ފަސް މިލިއަން އެމެރިކާ ޑޮލަރު ހޯދުމަށް ބަންޑާރަ ނައިބު އިބްރާހިމް ރިއްފަތު ވަނީ ކޯޓަށް ގޮސްފަ އެވެ. އަދި މި ދަނޑިވަޅަކީ ރައީސް އިބްރާޙިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދާ ވެސް ދެބަސްވެ، ދެ ބޭފުޅުންގެ ގުޅުން ހީނަރުވެފައިވާ ދުވަސްވަރެކެވެ.
އިއްޔެ ފުރަތަމަ ލީކުކޮށްލި 16 މިނެޓާއި 16 ސިކުންތުގެ އޯޑިއޯއިން އިވެނީ ޔާމީންގެ މައްޗަށް ކުރި ހުކުމާމެދު ވާހަކަ ދައްކާ އަޑެވެ. މަދުވެގެން ހަތަރު މީހެއްގެ އަޑު އޯޑިއޯގައި އިވޭއިރު ބެކްގްރައުންޑުގައި ވެސް ބަޔަކު މީހުން ވާހަކަ ދައްކާ އަޑު އިވެ އެވެ. އަދި ޔަގީންވާ ގޮތުގައި ފަނޑިޔާރު ފާއިޒާ ސުވާލު ކުރާ މީހާގެ އަޑު ހުރީ ބަދަލުކޮށްފަ އެވެ. އެހެންކަމުން އެއީ އެޑިޓުނުކޮށް އޮތް ޕިޔޯ އޯޑިއޯއެއް ނޫންކަން ކަށަވަރެވެ.
އެ އޯޑިއޯއިން އެނގޭ ގޮތުގައި ސުވާލި ކުރި މީހާގެ ވާހަކަތައް ސީރިއަސްކޮށް ހުރި ނަމަވެސް ފާއިޒު ކަމަށް ބުނާ މީހާގެ ޖަވާބުތައް ހުރީ ސަކަ ގޮތަކަށެވެ. އަދި ސުވާލު ކުރި މީހާ އޭނާގެ ހުރިހާ ސުވާލުތަކެއް އަމާޒުކޮށްފައި ހުރީ ޔާމީންގެ މައްސަލައާ ގުޅިގެން ރިޝްވަތު ދޭން އުޅުން ނުވަތަ ބިރުދެއްކުމުގެ އަމަލެއް ފަނޑިޔާރަށް އަމާޒުވިތޯ ބެލުމަށެވެ.
އެ މައްސަލައާ ގުޅިގެން އެއްވެސް ފައިސާއެއް ނަގާފައި ނޯންނާނެ ކަމަށް ފާއިޒު ކަމަށް ބުނާ މީހާ އޯޑިއޯގައި ބުނެ އެވެ. އަދި އެ މައްސަލައިގައި ހުކުމް ކުރިއިރު އޭނާއަށް އެއްވެސް ބިރުވެރިކަމެއް ކުރިމަތިވެފައިވާ ކަމެއް ވެސް ނުބުނެ އެވެ.
އިއްޔެ އެ އޯޑިއޯ ލީކުވުމާއެކު އެ ޔާމީންގެ މައްޗަށް ހުކުމްކޮށްފައި ވަނީ އިންސާފުވެރިކޮށް ނޫން ކަމަށް އިދިކޮޅު ޕްރޮރެސިވް ޕާޓީ އޮފް މޯލްޑިވްސް އިން ދަނީ ބުނަމުންނެވެ. މިއަދު ރައްޔިތުންގެ މަޖިލީހުގައި ވެސް އިދިކޮޅު މެމްބަރުން ވަރަށް ގަދަޔަށް އެ ވާހަކަ ދެއްކެވި އެވެ. އަދި ޕާޓީގެ އިސް ވަފުދެއް ރައްޔިތުންގެ މަޖިލީހުން ނިކުމެވަޑައިގެން ރައީސް ސޯލިހާ ބައްދަލު ކުރެއްވުމަށް ރައީސް އޮފީހަށް ވެސް ވަޑައިގެންނެވި އެވެ.
