ޖިނާއީ މައްސަލަތަކުގައި މީހުންނަށް ފާރަލުމާއި ވަގު ވަގަށް ހެކި ހޯދުމާ ބެހޭ ގަވާއިދެއް ހަދައި ހޯމް މިނިސްޓްރީން މިއަދު ގެޒެޓުކޮށްފި އެވެ.
"ތަހުގީގު ކުރުމުގެ ހާއްސަ އުކުޅު ބޭނުން ކުރުމުގެ ގަވާއިދު" ގެޒެޓު ކުރުމުން ފާރަލައިގެންނާއި އެ ނޫން ބައެއް ގޮތް ގޮތުން ފުލުހުން ހެކި ހޯދުމަށް އުސޫލުތަކެއް ކަނޑައެޅުނީ އެވެ.
ފުލުހުންގެ ހިދުމަތުގެ ގާނޫނުން ބާރުލިބިގެން ހަދާފައިވާ އެ ގަވާއިދުގައި ހާއްސަ އުކުޅުތަކުގެ ތެރޭގައި ހަ ކަމެއް ހިމަނާފައިވެ އެވެ. އެއީ ޑައިރެކްޓް ސަވައިލެންސް އާއި ކޯވާޓް ހިއުމަން އިންޓެލިޖެންސް އާއި އިންޓްރޫސިވް ސަވައިލެންސް އާއި އިންޓަސެޕްޝަން އާއި ސްޓިންގް އޮޕަރޭޝަން އަދި ޕާސޯނާ އުކުޅުތަކެވެ.
ޑައިރެކްޓް ސަވައިލެންސަކީ މީހެއްގެ ހަރަކާތްތަކަށް ފާރަލުމެވެ. ކޯވާޓް ހިއުމަން އިންޓެލިޖެންސަކީ ޖާސޫސުން މެދުވެރިކޮށް މީހަކާ މެދު ގުޅުމެއް އުފައްދައިގެން މައުލޫމާތު ހޯދަން އުޅުމެވެ. އިންޓްރޫސިވް ސަވައިލެންސަކީ ގޭ ތެރެ ނުވަތަ އޮފީސް ފަދަ ތަނެއް ބަގުކޮށް އަޑާއި މަންޒަރު ރެކޯޑު ކުރެވޭ ގޮތް ހެދުމެވެ. އިންޓާސެޕްޝަނަކީ ފޯނު ނުވަތަ އީމެއިލް ފަދަ ތަކެތި ބެލުމާއި އަޑުއެހުމެވެ. ސްޓިންގް އޮޕަރޭޝަންތަކަކީ ހެއްކާއެކު މީހަކު އަތުލުމަށް ވަކި ސެޓިންއެއް ހެދުމެވެ. ޕާސޯނާއަކީ ވާޗުއަލް ނުވަތަ ފޭކު މީހެއްގެ ނަމުގައި މުއާމަލާތްކޮށްގެން ހެކި ހޯދުމެވެ.
އެ ގަވާއިދުގައި ބުނެފައިވާ ގޮތުން ތަހުގީގު ކުރުމުގެ ހާއްސަ އުކުޅެއް ބޭނުން ކުރެވޭނީ ގައުމީ ސަލާމަތަށް ނުރައްކާވާ ހާލަތްތަކުގަ އާއި ބޮޑެތި ކުށްތައް ތަހުގީގު ކުރުމުގަ އެވެ. އަދި ބޭނުންކުރަންޖެހިއްޖެ ނަމަ ހުއްދަ ލިބިގެން އެހެން ހާލަތްތަކުގައި ވެސް އެފަދަ އުކުޅުތައް ބޭނުން ކުރެވިދާނެ ކަމަށް ގަވާއިދުގައި ބުނެފައިވެ އެވެ.
ގަވާއިދުގައި ބުނެފައިވާ ހުރިހާ އުކުޅުތަކަކީ ވެސް ފުލުހުން މިހާރު ބޭނުން ކުރަމުންދާ އުކުޅުތަކެވެ. އަދި އެފަދަ އުކުޅުތައް ބޭނުންކޮށްގެން ޓެރަރިޒަމްގެ ބޮޑެތި މައްސަލަތައް ހިންގުމުގެ ކުރިން ހުއްޓުވާފައި ވެސް އެބަހުއްޓެވެ.
އޭގެ އިތުރުން، ފުލުހުންނާ ގުޅޭ ހަތިޔާރު ގެންގުޅުމުގެ ގަވާއިދަކާއި ފުލުހުންގެ ބާރު ބޭނުން ކުރުމުގެ ގަވާއިދަކާއި ޕޮލިސް ރިކޯޑް ދޫކުރުން ފަދަ ގަވާއިދުތަކެއް ހޯމް މިނިސްޓްރީން ވަނީ ގެޒެޓުކޮށްފަ އެވެ. އެ ހުރިހާ ގަވާއިދުތަކެއް ވެސް ގެޒެޓުކޮށްފައި ވަނީ ކުރީގެ ރައީސް މުހައްމަދު ނަޝީދު އަވަހާރަކޮށްލަން މެއި 6، ގައި ދިން ހަމަލާއަށްފަހު އެވެ.
