ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ބަޔަކު ސިއްރުން ފާރަލަމުންދާ ކަމަށް ބުނެ، އެ މައްސަލަ ފުލުހަށް ހުށަހަޅައިފި އެވެ.
ގޭބަންދުގައި ހުންނެވި ޔާމީންގެ ދިރިއުޅުއްވާ ހ. ދޫވެހީ ކައިރީގައި ވަރަށް ސިއްރިއްޔާތުގައި ފޮޓޯ އާއި ވީޑިއޯތަކެއް ނަގަން ބަޔަކު އުޅުނު މައްސަލައެއް މީގެ ދުވަސްކޮޅެއް ކުރިން ފެންމަތިވި އެވެ.
ޔާމީންގެ ވަކީލް ޑރ. މުހައްމަދު ޖަމީލު އަހުމަދު ވިދާޅުވީ ތަކުރާރުކޮށް ބަޔަކު ޔާމީންގެ ގެކޮޅު ކައިރިން ވަރަށް ޝައްކު ކުރެވޭ ފަދަ ގޮތަކަށް އުޅެމުންދާ ކަމަށެވެ.
އެމަނިކުފާނުގެ ފުރާނައަށް ގެއްލުމެއްވެދާނެ ކަމަށް އާއިލާއިން ވަރަށް ކަންބޮޑުވެފައިވާ ކަމަށް ޖަމީލު ވިދާޅުވި އެވެ.
އެހެންވެ، އެކަން ބަލައި އަޅަން ޖެހޭ ފިޔަވަޅުތައް އަޅައިދިނުމަށް ފުލުހުންނަށް މިއަދު ހުށަހެޅުއްވީ ކަމަށް ޖަމީލު ވިދާޅުވި އެވެ. ޖަމީލު ވިދާޅުވި ގޮތުގައި ފުލުހުންގެ ފަރާތުން އެކަމަށް އެއްބާރުލުން ލިބުން ކަމާއި މައްސަލަ ފުލުހުން ބަލާނެ ކަމަށް އުއްމީދު ކުރައްވަ އެވެ.
ވަކީލުންގެ ޓީމުގައި ހިމެނޭ އާދަމް ޝަމީމް ވިދާޅުވީ ރައީސް ޔާމީނަށް ބަޔަކު ފާރަލަމުންދާތީ، އެކަން ފުލުހުންގެ ސަމާލު ކަމަށް ގެނައީ ކުށްކުރުން ހުއްޓުވުމަށް އަޅަންޖެހޭ ފިޔަވަޅުތައް އެޅުމަކީ ފުލުހުންގެ ޒިންމާއަކަށްވާތީ އެވެ.
އަދި، ކުރީގެ ރައީސް މުހައްމަދު ނަޝީދަށް އަމާޒުކޮށްވެސް ޓެރަރިސްޓް ހަމަލާއެއްދީ، މިއީ ޓެރަރިޒަމްގެ ނުރައްކާ އޮތް ދަނޑިވަޅަކަށްވާތީ ކަމަށް ޝަމީމް ވިދާޅުވި އެވެ.
ޔާމީން މިހާރު ގޭ ބަންދުގައި ހުންނެވިއިރު އެ ގޮތަށް ބަދަލު ކުރީ ޖަލުގައި ކޮވިޑް ފެތުރޭތީ ކަމަށް ކެރެކްޝަނުން ބުނެފައިވެ އެވެ. ނަމަވެސް، މިހާރު ޖަލުގައި ކޮވިޑް ފެތުރުން ހުއްޓުވައި އާންމު ހާލަތަށް ވަނީ ގެނެސްފަ އެވެ.
