ރާއްޖޭގައި ގޮދަން ފުށް ޕްރޮސެސްކުރަން ފެށުމުގެ ގޮތުން އެސްޓީއޯއިން އަޅަން ގަސްތުކުރާ ފުށް ފެކްޓްރީގެ މަޝްރޫއު ފެށުމުގެ ގޮތުން ކުރަން ޖެހޭ ދިރާސާތައް ފަށައިފި އެވެ.
މި ފުށް ފެކްޓްރީއަކީ ރާއްޖެއަށް ދިމާވެފައިވާ ކާބޯތަކެތީގެ ރައްކާތެރިކަމުގެ މައްސަލައަށް ހައްލެއް ގެނައުމުގެ ގޮތުން އެސްޓީއޯއިން މި އަހަރު އިއުލާނުކުރި މަޝްރޫއެކެވެ. އަދި އަންނަ އަހަރުގެ މެދެއްހާ ހިސާބުގައި ފެކްޓްރީ އޮޕަރޭޝަނަށް ގެންނަން ކުރަން ޖެހޭ މަސައްކަތްތަށް އެސްޓީއޯއިން އަންނަނީ ކުރަމުންނެވެ.
ފުށް ފެކްޓްރީ މަޝްރޫއުގެ މަސައްކަތް ރަސްމީކޮށް ފެށުމާ ގުޅިގެން އެސްޓީއޯއިން ބުނީ ފެކްޓްރީއާ ގުޅޭ ދިރާސާތައް ކުރަން ބޭރުގެ ކޮންސަލްޓަންޓުން މަސައްކަތް ފަށާފައިވާ ކަމަށެވެ. އަދި މި މަޝްރޫއުގެ ކާމިޔާބުކަން ކަށަވަރުކުރުމުގެ ގޮތުން ބަލަންޖެހޭ ކަންކަން އެ ކޮންސަލްޓަންޓުންނާ ގުޅިގެން އެސްޓީއޯއިން ބަލަމުން އަންނަ ކަމަށް ބުންޏެވެ.
މިހާތަނަށް މި ފެކްޓްރީ އަޅާނެ ސީދާ ތަނެއް ނިންމާފައެއް ނުވެ އެވެ. މައުލޫމާތު ލިބިފައިވާ ގޮތުގައި އެސްޓީއޯއިން ވިސްނަނީ ގުޅިފަޅު ނުވަތަ ތިލަފުށީގައި މި ފުށް ފެކްޓްރީ އަޅާށެވެ.
އެއީ އާންމުންގެ ރައްކާތެރި ކަމަށާއި މުސްތަގުބަލުގައި ކޮމާޝަލް ޕޯޓާ ކައިރިން އެ މަސައްކަތް ކުރެވޭނެ މަގުފަހި ކުރުމަށެވެ. އެކަމަކު ފެކްޓްރީ ހުންނާނެ ތަން ނިންމާނީ ކަމާބެހޭ ވުޒާރާތަކާއި އިދާރާތަކާ މަޝްވަރާކުރުމަށް ފަހުގަ އެވެ.
ގޮދަން ފުށް ބަންދުކުރާ ފެކްޓްރީއެއް ގާއިމުކުރުމުގެ ވިސްނުން އެސްޓީއޯ އިން އިއުލާންކުރީ 2020 ވަނަ އަހަރުގެ އެސްޓީއޯގެ އަހަރީ އާއްމު ޖަލްސާގަ އެވެ. މުޅި ޕްރޮޖެކްޓްގެ މައިގަނޑު އަމާޒަކީ ފުށަށް ރާއްޖެއިން ކުރާ ހޭދަ ކުޑަކުރުމާއި ދެމެހެއްޓެނިވި ސަޕްލައިއަކާ ދިމާއަށް އަމާޒުހިފުން ކަމަށް ކުންފުނީގެ މެނޭޖިން ޑިރެކްޓަރު ހުސެއިން އަމްރު ވިދާޅުވި އެވެ. އަދި، މިއީ ރާއްޖެއަށް ދިމާވެފައިވާ ކާބޯތަކެތީގެ ރައްކާތެރިކަމުގެ މައްސަލައަށް ހައްލެއް ލިބި، ރައްޔިތުންނަށް ހެޔޮއަގުގައި ކޮލިޓީ ރަނގަޅު ޕްރޮޑަކްޓެއް ފޯރުކޮށްދެވޭނެ ކަމެއްގެ ގޮތުގައި އަމްރު ސިފަކުރެއްވި އެވެ.
އަދި ވިދާޅުވީ މިއީ ފުށުގެ ކޮލިޓީ ރަނގަޅު ކުރުމަށާއި ކާބޯތަކެތީގެ ރައްކާތެރިކަމުގެ މައްސަލައަށް ހައްލެއް ކަމަށެވެ. އަދި ފެކްޓްރީގައި ފުށް ޕްރޮސެސް ކުރެވެން ފެށުމުން ބާޒާރަށް ފޯރުކޮށްދޭ އަގުތައް ވެސް ހެޔޮވާނެ ކަމަށް އޭނާ ވިދާޅުވި އެވެ.
ގޮދަން ފުށުގެ އިތުރުން މި ފެކްޓްރީގައި ތަފާތު އެކި ބޭނުންތަކަށް ހާއްސަ ފުށް ޕްރޮސެސް ކުރުމަށް ވެސް ވަނީ ހަމަޖެހިފަ އެވެ. އެގޮތުން އާންމުކޮށް ބޭނުންކުރާ މަލްޓި ޕާޕަސް ފްލާގެ އިތުރުން ކޭކު އަޅާ ފުށާއި ޕާން އަޅާ ފުށް އުފެއްދާނެ ކަމަށް އެސްޓީއޯއިން ބުނެ އެވެ.
