ހުރިހާ ވައްތަރެއްގެ ވެހިކަލްތަކަށް ހިދުމަތް ދެވޭ ޒަމާނީ ފެންވަރުގެ ޕެޓްރޯލް ޝެޑެއް މާލޭ އިންޑަސްޓްރިއަލް ވިލެޖް ސަރަހައްދުގައި ގާއިމްކުރުމަށް ފިއުލް ސަޕްލައި މޯލްޑިވްސް (އެފްއެސްއެމް)އާ މިއަދު ހަވާލުކޮށްފި އެވެ.
މިއީ ޕްލޭނިން މިނިސްޓްރީން އެފްއެސްއެމްއާ ހަވާލުކޮށްގެން ކުރިޔަށް ގެންދާ މަސައްކަތެކެވެ. އެއްބަސްވުމުގައި ސޮއިކުރެވުނީ ކުރިޔަށް އޮތް ހަ މަސް ދުވަހުގެ ތެރޭގައި މިތަނުގެ މަސައްކަތް ނިންމާ ގޮތަށެވެ.
އެފްއެސްއެމްއިން ބުނި ގޮތުގައި މި ޝެޑުން ހަތަރު ފުރޮޅުލީ އަށް އުޅަނދަށާއި ދެ ފުރޮޅުލީ 16 އުޅަނދަށް އެއްފަހަރާ ޚިދުމަތް ލިބޭނެ އެވެ.
މި ޝެޑާ ގުޅޭ ގޮތުން އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް "އަދަދު"އަށް ވިދާޅުވީ މި ޝެޑުގައި ގިނަ އުޅަނދުތަކަށް އެއް ފަހަރާ ހިދުމަތް ދެވޭއިރު، މި ޕަމްޕުތައް ހުންނާނީ އެކި ވައްތަރުގެ އުޅަނދުތަކަށް ހާއްސަކޮށްފައި ކަމަށެވެ.
އެގޮތުން މި ޝެޑުގައި ސައިކަލަށް ހާއްސަ ޕަމްޕުތަކާއި، ކާރުތަކަށް ހާއްސަ ޕަމްޕުތަކާއި، ލޮރީތަކަށް ހާއްސަ ޕަމްޕުތައް ހުންނާނެ އެވެ. އަދި ބޮޑެތި ހެވީ ވެހިކަލްތަކަށް ޕެޓްރޯލް އަޅަން ބޭނުންވާ ޕަމްޕުތައް ވެސް އެތަނުގައި ހުންނާނެ އެވެ.
ގަސަމް ވިދާޅުވި ގޮތުގައި މިތަނުން މިހާރު އާންމުކޮށް ދިމާވާ ކިއު ޖެހުމުގެ މައްސަލައަށް ހައްލެއް ލިބޭނެ ކަމަށެވެ. އަދި މިތަން ފަރުމާކުރީ މިހާރު ހުރި ޝެޑުތަކުން ދިމާވާ މައްސަލަތައް ހައްލުކުރުމަށް ކަމަށް ވިދާޅުވި އެވެ.
"މިހާރު މިހުންނަ ޝެޑުތަކުގައި މި ހުންނަނީ ހަތަރު ޑިސްޕެންސަރު. އެކަމަކު މިތަން ފަރުމާކުރީ އެކި ވެހިކަލްތަކަށް ހާއްސަ ގިނަ ޑިސްޕެންސަރު ފަރުމާ ތެރޭގައި ހިމަނައިގެން. އަދި އެކި ސައިޒުގެ ވެހިކަލްތަކަށް ހިދުމަތް ދެވޭ ގޮތަށް. މިސާލަކަށް އެސްޓީއޯގެ އެންމެ ބޮޑެތި ވެހިކަލްތަކަށް ހިދުމަތް ދެވޭ ޕަމްޕު ވެސް ހުންނާނެ" ގަސަމް ވިދާޅުވި އެވެ.
މި ޕެޓްރޯލް ޝެޑުގެ މަޝްރޫއަށް ހިނގާނެ ހަރަދާ ގުޅިގެން ގަސަމް ވިދާޅުވީ އެ އަދަދުތައް ވަރަށް އަވަހަށް ހިއްސާކުރާނެ ކަމަށެވެ. އެކަމަކު ޕްރޮޖެކްޓުގެ ޑިޒައިނަށް ގެންނަން ޖެހުނު ބަދަލުތަކަކާއި ގުޅިގެން އިތުރަށް ކުރިން އަންދާޒާކުރި ވަރަށް ވުރެ ބޮޑު ހަރަދެއް ހިނގާނެ ކަމަށް ބެލެވޭ ކަމަށް ވިދާޅުވި އެވެ.
މިތަނަކީ އަމިއްލައަށް ހިދުމަތްދޭ ގޮތަށް ފަރުމާކުރެވޭ "ސެލްފް ސާވިސް" ތަނެއްތޯ ސުވާލު ކުރުމުން ގަސަމް ވިދާޅުވީ، އެކަން ކުރާނީ ހުޅުމާލޭގައި އެ ހިދުމަތް ތަޖުރިބާ ކުރުމަށް ފަހު ކަމަށެވެ. އަދި އެ ތަޖުރިބާއަށް ފަހު އެކަން ކާމިޔާބު ނަމަ، މި ޝެޑުން އަމިއްލައަށް ހިދުމަތް ހޯދާ ގޮތަށް ބަދަލު ކުރެވޭ ކަމަށް ވިދާޅުވި އެވެ.
