ކުރިއަށް އޮތް ސާބާ މެންސް ޗެމްޕިއަންޝިޕް ބާސްކެޓް ބޯޅަ މުބާރާތުގައި ވާދަކުރަން ތައްޔާރުވަމުން އަންނަ ގައުމީ ބާސްކެޓްބޯޅަ ޓީމުގެ ހެޑް ކޯޗަކަށް ކުރިން ގައުމީ ޓީމަށް ކުޅުނު އަދި ބާސްކެޓްގައި ވިދަމުން އަންނަ ކޯޗު އިލްޔާސް އިބްރާހިމް (އިއްލެ) ހަމަޖައްސައިފި އެވެ.
ކުރިން ޓީރެކްސް ބާސްކެޓްބޯލް ކްލަބްގެ ކޯޗަކަށް ހުރި އިއްލެ ގައުމީ ޓީމުގެ ކޯޗަކަށް ހަމަޖެއްސިއިރު، ބާސްކެޓްބޯލް އެސޯސިއޭޝަން އޮފް މޯލްޑިވްސް (އެމްބީއޭ) އިން ކޯޗިން ޓީމުގައި އެއްކޮށް އެކުލަވާލީ ދިވެހިންނާ އެކު އެވެ.
އިއްލެގެ އެސިސްޓަންޓް ކޯޗުންނަށް ހަމަޖެއްސި ބައެއް ކޯޗުންނަކީ އޭނާއާ އެކު ގައުމީ ޓީމަށް ކުޅުނު ކުޅުންތެރިންނެވެ. އޭގެ ތެރޭގައި 2019 ވަނަ އަހަރު ގައުމީ ޓީމަށް ކުޅުން ހުއްޓާލި މުހައްމަދު ޒިލާލް (ޒިލާ) އާއި އަލީ ފަޒްލީ ހިމެނެ އެވެ. ދެން ހުރި އެސިސްޓަންޓް ކޯޗަކީ މުހައްމަދު ނަސީރު އެވެ.
ގައުމީ ޓީމުން ތައްޔާރުވަމުން އަންނަނީ ބަންގްލަދޭޝްގައި އޮކްޓޫބަރު 21 ވަނަ ދުވަހު ފަށާ ސާބާ ޗެމްޕިއަންޝިޕް އަށެވެ. މިއީ ކޮވިޑް-19ގެ މެދުކަނޑާލުމަށް ފަހު ގައުމީ ބާސްކެޓް ޓީމުން ވާދަކުރާ ފުރަތަމަ މުބާރާތެެވެ.
އެސިސްޓަންޓް ކޯޗުންގެ ގޮތުގައި ހަމަޖެއްސި ޒިލާ (ކ) އާއި ފަޒްލީ.
އިންޓަ ސްކޫލް ބާސްކެޓްބޯޅަ މުބާރާތުން ވިދާލި އިއްލެ ވަނީ ގައުމީ ފުޓްބޯޅަ ޓީމަށް ފީފާ ވޯލްޑް ކަޕް ކޮލިފައިންގައި ކުޅެފަ އެވެ. އޭނާ ބާސްކެޓަށް އެއްކޮށް ހުސްވީ 2007 ވަނަ އަހަރު އެވެ. ސްޓެލްކޯ ކްލަބުން ބާސްކެޓްބޯޅަ ފަށައި ފަހުން ވިކްޓްރީ އަށް ވެސް ކުޅުނު އިއްލެ އަކީ 2009 ވަނަ އަހަރު ޓީރެކްސް ވުޖޫދަށް ގެނައިއިރު، އޭގެ އިސްކޮށް ހަރަކާތްތެރިވި އެކަކެވެ. ޓީރެކްސް އަށް ކުޅެ ފަހުން އެ ޓީމުގެ ކޯޗުކަމާ ހަވާލުވެ ގިނަ ކާމިޔާބީތަކެއް ހޯދި އިއްލެ އަކީ ގައުމީ ޓީމުގައި ރަނގަޅު މަސައްކަތްތަކެއް ކުރެވޭނެ ފެންވަރުގެ ކޯޗެކެވެ.
އެސިސްޓަންޓް ކޯޗަކަށް ހަމަޖެއްސި ޒިލާ އަންނަނީ ބާސްކެޓްބޯޅައިގެ ޑިވެލޮޕްމަންޓްގެ މަސައްކަތްތަކެއް ކުރަމުންނެވެ. ޒިލާ ވަނީ ދާދި ފަހުން ކިންގްސްގެ ކޯޗަކަށް ހަމަޖައްސައިފަ އެވެ.
ކުޅިވަރު ކުޅުމާއި، މީހުން ތަމްރީނު ކުރުމުގެ ރޮނގުން ހިތްވަރުދިނުމުގެ ގައުމީ އިނާމު 2016 ވަނަ އަހަރު ހާސިލްކޮށްފައިވާ ޒިލާލް ބާސްކެޓްބޯޅަ ކުޅެން ފެށީ މަޖީދިއްޔާ ސްކޫލުގައި އުޅުނުއިރު އެވެ. އިންޓަ ސްކޫލް ބާސްކެޓް މުބާރާތުން ވިދާލި ޒިލާ ކެރިއަރު ފެށީ 2002 ވަނަ އަހަރު ޔުނިޓުއާސް އިންނެވެ. ފަހުން ވިކްޓްރީ އަށް ބަދަލުވެ ހަތް އަހަރު އެ ޓީމަށް ގިނަ ގިނަ ކާމިޔާބީތަކެއް ހޯދި އެވެ. އޭގެ ފަހުން ޓީރެކްސް އަށް ބަދަލުވެ، އެ ޓީމާ އެކު ވެސް ގިނަ ކާމިޔާބީތަކެއް ހާސިލްކުރި އެވެ. އަދި މިހާރު ކުޅެމުން އަންނަ ކިންގްސްއާ ގުޅުމުގެ ކުރިން ރެޑްލައިން ކްލަބަށް ވެސް ކުޅެ ތަށި ހޯދައިދިނެވެ.
ރާއްޖޭގެ އެންމެ މޮޅު ބާސްކެޓްބޯޅަ ކުޅުންތެރިޔާގެ މަގާމް ތިން ފަހަރު ހޯދި ޒިލާ ވަނީ 2011 ވަނަ އަހަރުގެ ސައުތު އޭޝިއަން ބީޗް ގޭމްސް އިން ރާއްޖޭން ލޯ މެޑަލް ހާސިލްކުރިއިރު އަދި 2016 ވަނަ އަހަރުގެ ސާބާ ޒޯންގެ ފީބާ އޭޝިއާ ޗެލެންޖްގެ ކޮލިފިކޭޝަންގައި ރިހި މެޑެލް ހޯދި ޓީމުގައި ހިމެނިފަ އެވެ. އަދި ބައިނަލްއަގުވާމީ އިންޑިވިޖުއަލް ކާމިޔާބީ އަށް ބަލާއިރު ޒިލާ ވަނީ 2013 ވަނަ އަހަރު ބަންގްލަދޭޝްގައި އޮތް ސާބާ ޗެމްޕިއަންޝިޕުގެ މޮޅު ކުޅުންތެރިޔާގެ މަގާމް ވެސް ހޯދައިފަ އެވެ.
ޒިލާ އެކޭ އެއްގޮތަށް ފަޒްލީ ވެސް ގައުމީ ޓީމަށް ކުޅުން ހުއްޓާލީ 2019 ވަނަ އަހަރުގެ ސައުތު އޭޝިއަން ގޭމްސް އަށް ފަހު އެވެ. ރާއްޖޭގެ އެންމެ މޮޅު ބާސްކެޓްބޯޅަ ކުޅުންތެރިޔާގެ އެވޯޑް ހޯދި ފަޒްލީ ދާދި ފަހުން ވަނީ އޭނާ ކްލަބް ކެރިއަރުގައި ގިނަ ކާމިޔާބީތަކެއް ހޯދި ޓީރެކްސްގެ ކޯޗަކަށް ހަމަޖައްސައިފަ އެވެ. ގައުމީ ޓީމުން ބާސްކެޓްގައި ހޯދި ހުރިހާ ކާމިޔާބެއްގައި ކަހަލަ ގޮތަކަށް ފަޒްލީގެ ރޯލު ބޮޑެވެ.
ރާއްޖޭގެ ގައުމީ ބާސްކެޓްބޯޅަ ޓީމުން އެންމެ ފަހުން ކުޅުނީ އެމެރިކާގެ ކޯޗު ކޯރީ އަލެކްސަންޑަ ބެލްސަގެ އިރުޝާދުގެ ދަށުންނެވެ.
