މި އަހަރު ރާއްޖެއަށް ޒިޔާރަތްކުރި ޓޫރިސްޓުންގެ އަދަދު ހަތް ލައްކައަށް އިތުރު ވެއްޖެ އެވެ.
ޓޫރިޒަމް މިނިސްޓްރީން އެންމެ ފަހުން އާންމުކުރި ތަފާސްހިސާބުތައް ބުނާ ގޮތުން، އޮގަސްޓު 21 ގެ ނިޔަލަށް 705،024 ޓޫރިސްޓުން ރާއްޖެ ޒިޔާރަތްކޮށްފި އެވެ.
މިއީ ހުސްވި އަހަރުގެ ޖުމްލައަށް ވުރެ ގާތްގަނޑަކަށް ދޮޅު ލައްކަ ޓޫރިސްޓުން އިތުރު އަދަދެކެވެ. އަދި ހަމަ އެ އަހަރުގެ މި މުއްދަތާ އަޅާކިޔާއިރު، ޓޫރިސްޓުންގެ އަދަދު 80 ޕަސެންޓު އިތުރެވެ.
މި އަހަރުގެ ދެވަނަ ކުއާޓާގައި ޓޫރިޒަމަށް އައި ހީނަރުކަމަށް ފަހު، ނަމްބަރުތައް އުފުލެން ފެށީ ހުސްވި ޖޫން މަހުން ފެށިގެން ދިން ކޮވިޑް ލުއިތަކާ އެކީގަ އެވެ.
މި ލުއިތަކުގެ ތެރޭގައި ވެކްސިން ޖަހާފައިވާ ޓޫރިސްޓުންނަށް ކަރަންޓީނު ލުއި ދިނުމާއި، ދެކުނު އޭޝިއާ ގައުމުތަކުން އަންނަ ޓޫރިސްޓުންނަށް ރާއްޖެ ހުޅުވާޅުން ހިމެނެ އެވެ.
މިއާ ގުޅިގެން ޓޫރިޒަމް ސިނާއަތަށް އައި ދިރުމާ އެކު، މިހާރު އެވަރެޖްކޮށް ދުވާލެއްގެ މައްޗަށް އަންނަ ޓޫރިސްޓުންގެ އަދަދު ހުރީ 4،877 އެވެ.
މިއީ މި އަހަރުގެ ތެރޭގައި ވެސް މި އަދަދަށް ދުވަހުގެ އެވަރެޖް މިހާ މަތިވީ ފުރަތަމަ ފަހަރެވެ. އަހަރުގެ މިހާތަނަށް އެންމެ ގިނަ ޓޫރިސްޓުން އައި މާޗު މަހުގެ އެވަރެޖަކީ 3،534 އެވެ.
މި އަދަދުތަކާ އެކު، މި އަހަރު ރާއްޖެއަށް އެއް މިލިއަން ޓޫރިސްޓުން އަންނާނެ ކަމުގެ ޔަގީންކަން ވަނީ އިތުރުވެފަ އެވެ. އަދި ކޮވިޑުގެ ހާލަތު މިގޮތުގައި ދެމެހެއްޓިއްޖެ ނަމަ، މި އަދަދު ދޮޅު މިލިއަނަށް އެރުމުގެ ފުރުސަތު ވެސް އެބައޮތް ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް އާއި ދާއިރާގެ ފުންނާބު އުސް ބޭފުޅުން ވަނީ ވިދާޅުވެފަ އެވެ.
