ފަސް ތަރީގެ ހޮޓަލަކަށް ބުކިން ހަދައި މިދިޔަ އާދިއްތަދުވަހު ރާއްޖެ އައުމުން ފަޅު ގެއަކަށް ގެންދިޔަ އިންޑިއާގެ 27 ޓޫރިސްޓުން އަދިވެސް ތިބީ ޔޫތު މިނިސްޓްރީ އާއި އިމިގްރޭޝަންގެ ބެލުމުގެ ދަށުގައި ކަމަށް އިމިގްރޭޝަން ކޮންޓްރޯލާ މުހައްމަދު އަހުމަދު، (ހަނަފީ) މިއަދު ވިދާޅުވެއްޖެ އެވެ.
އެ 27 ޓޫރިސްޓުން ރާއްޖެ އައީ މާފުށީ ގެސްޓް ހައުސްއެއްގައި ޗުއްޓީ ހޭދަކުރުމަށް 30،000 ޑޮލަރު (462،600ރ.) ދައްކައިގެންނެވެ. ނަމަވެސް އެއާޕޯޓުން އެ މީހުންނާއި ހަވާލުވި ބިދޭސީ މީހާ އެ މީހުން ގެންގޮސް ވެއްދީ ހެންވޭރުގައި ހުންނަ ފަޅުގެ އަކަށެވެ.
ގިނަ އަދަދެއްގެ ކުޑަކުދިންނާ އެކު އެ މީހުން މަގުމަތިވެފައި ތިބުމުން، އެ ސަރަހައްދަށް ވަޑައިގެން އެ މީހުންނަށް ގޮތެއް ހޯދައިދިނީ، ޔޫތު މިނިސްޓަރު އަހުމަދު މަހުލޫފާއި އިމިގްރޭޝަން ކޮންޓްރޯލާ ހަނަފީ އެ ސަރަހައްދަށް ވަޑައިގެންނެވެ. އެ މީހުން މިހާރު ތިބީ ހުޅުމާލޭގައި ހުންނަ ފުޓްބޯލް ސުކޫލްގަ އެވެ.
އެތަނަކީ ކޮވިޑްގެ ތެރޭގައި ހާލުގައި ޖެހުނު އާއިލާތައް ބައިތިއްބަން ބޭނުންކުރި ތަނެކެވެ. އަދި އެންމެ ފަހުން އެތަން ބޭނުންކުރީ އޭއެފްސީ ކަޕުގައި ރޭ އިންޑިއާގެ ބެންގަލޫރު އެފްސީއާ ދެކޮޅަށް ނުކުތް ރާއްޖޭގެ ކްލަބް އީގަލްސްގެ ފުޓުބޯޅަ ޓީމު ކޭމްޕްކުރާށެވެ.
ހަނަފީ މިއަދު "އަދަދު" އަށް ވިދާޅުވީ އެ 27 ޓޫރިސްޓުން އަދިވެސް ތިބީ ޔޫތު މިނިސްޓްރީގެ ބެލުމުގެ ދަށުގައި އޮންނަ އެ ފުޓްބޯލް ސުކޫލުގައި ކަމަށެވެ. ކެއުމާއި އެހެނިހެން ހަރަދުތައް ކުރަމުން އަންނަނީ އެ މީހުން އަމިއްލައަށް ކަމަށް އޭނާ ވިދާޅުވި އެވެ.
ހަނަފީ ވިދާޅުވީ އެ ޓޫރިސްޓުން މިހާރު އުޅެނީ ފުރަން ކަމަށާއި ފުރަންވަންދެން އެ މީހުން ތިބޭނީ އެތަނުގައި ކަމަށެވެ.
ފަހަކަށް އައިސް އޮޅުވާލައިގެން ރާއްޖެއަށް ފަތުރުވެރިން އެތެރެކުރަމުންދާ މައްސަލަ ބޮޑުވެފައިވާއިރު، އެކަމުގެ އެންމެ ބޮޑު ޝިކާރައަކަށްވެފައިވަނީ އިންޑިއާގެ ޓޫރިސްޓުންނެވެ.
ރާއްޖެއަކީ މިހާރު މެދުއިރުމައްޗާއި ޔޫރަޕަށް ދަތުރު ކުރާ އިންޑިއާ މީހުން ޓްރާންސިޓްވުމާއި ކަރަންޓީން ވުމަށް މަގުބޫލު މަންޒިލެކެވެ. ހުޅުމާލޭ ގޮނޑުދޮށް ވެސް ފުރިފައި އެވަނީ އިންޑިއާގެ ޓޫރިސްޓުންނާ އެކު އެވެ.
ރާއްޖެ އެތެރެވުމުގެ ކުރިން ޓޫރިސްޓުން ތިބޭނެ ތަނެއް އިމިގްރޭޝަން ޕޯޓަލް މެދުވެރިކޮށް ހުށަހަޅަން ޖެހެ އެވެ. އެހެން ހުށަހަޅާއިރު މަދު ރޫމް ހުންނަ ގެސްޓް ހައުސްތަކުގެ ނަމުގައި ދުވާލެއްގެ މައްޗަށް އެތައް ބައިވަރު މީހުން ރާއްޖެ އެތެރެވާތީ އެފަދަ ތަންތަނަށް ގުޅައި ޗެކްކުރަން އިމިގްރޭޝަނުން މިވަނީ ފަށައިފަ އެވެ.
އެގޮތަށް ޗެކް ކުރާއިރު އެނގެނީ ހޮޓާތަކާއި ގެސްޓް ހައުސްތަކުގެ ނަމުގައި ފޭކް ބުކިން ހަދައިގެން އެތައް ބަޔަކު އެތެރެވާ ކަމެވެ.
އޭގެ އިތުރުން ވަގު ބުކިން ހައްދައިގެން ޓޫރިސްޓުން ގެނެސް މަގުމަތި ކުރާ މައްސަލަ ވެސް ބޮޑެވެ. އެކަމުގައި އިސްކޮށް ބިދޭސީން ހަރަކާތްތެރިވެ އެވެ.
