ދިވެހި ސަރުކާރުން ނަގާފައިވާ ދަރަނި އަދާ ނުކުރެވޭނެ ފަދަ ހާލަތެއް އަދި ކުރިމަތި ނުވާ ކަމަށާއި އެއްވެސް ލޯނެއް ޑީފޯލްޓް ނުވާނެ ކަމަށް ފިނޭންސް މިނިސްޓްރީން މިއަދު ބުނެފި އެވެ.
ފިނޭންސުން މިހެން ބުނީ ކްރެޑިޓް ރޭޓިން އެޖެންސީ މޫޑީސްއިން ރާއްޖޭގެ ރޭޓީން ބީ1 އިން ސީއޭއޭ1 އަށް ދަށްކުރުމާ ގުޅިގެންނެވެ. މިއީ ރާއްޖޭގެ ދަރަނީގެ ހާލަތު އިތުރަށް ގޯސްވެ، ދަރަނި އަދާނުކުރެވުމުގެ ފުރުސަތު އިތުރަށް ބޮޑު ކަމަށް ބަލާފައި ދިން ރޭޓިންއެކެވެ.
މި ރޭޓިންއާ ގުޅިގެން ފިނޭންސުން ނެރުނު ބަޔާނެއްގައި ބުނީ، މޫޑީސްއިން ރާއްޖޭގެ އިގުތިސޯދަށް އައިސްފައިވާ ކުރިއެރުމާއި ވޭތުވެ ދިޔަ މަސްތަކުގެ ތެރޭގައި ދަރަނީގެ ހާލަތަށް އައިސްފައިވާ ބަދަލަށް ރިއާޔަތްކޮށްފައި ނުވާ ކަމަށެވެ.
އެގޮތުން ކޮވިޑުގެ އެންމެ ގޯސް ހާލަތުގައި ޖީޑީޕީގެ ނިސްބަތުން ދަރަނި 100 ޕަސެންޓުން މައްޗަށް އުފުލުނު ނަމަވެސް، އިގުތިސޯދީ ހާލަތު ރަނގަޅު ވަމުން ދިޔުމާ އެކު އެ އަދަދު ތިރިކުރެވިއްޖެ ކަމަށް ބުންޏެވެ. އަދި މިހާރުގެ ހާލަތަށް ބަލާއިރު، އެއްވެސް ލޯނެއް ޑީފޯލްޓް ނުވެ، ބަރާބަރަށް ފައިސާ އަދާކުރުމުގެ ގާބިލިއްޔަތު ދިވެހި ސަރުކާރުގެ އެބަހުރި ކަމަށް ފިނޭންސުން ފާހަގަކުރި އެވެ.
މިހާތަނަށް ރާއްޖޭގެ ސަރުކާރުން ނަގާފައިވާ އެއްވެސް ލޯނެއް އަދާކުރުމުގައި ޑީފޯލްޓް ވެފައެއް ނުވެ އެވެ. އަދި ކުރިޔަށް އޮތް ތަނުގައި ވެސް އެކަން އެގޮތަށް ދަމަހައްޓާނެ ކަމަށް ފިނޭންސުން ބުންޏެވެ.
ފިނޭންސުގެ ބަޔާނުގައި ރާއްޖޭގެ އިގުތިސޯދަށް އައިސްފައިވާ ކުރިއެރުންތައް ފާހަގަކުރަމުން ބުނީ، ދަރަނި މެނޭޖްކުރަން ސަރުކާރުން ގެންގުޅޭ ސިޔާސަތު މޫޑީސްއިން ވެސް ބަލައިގަންނަ ކަމަށެވެ. އަދި އެ އިދާރާއިން ރާއްޖޭގެ އައުޓްލުކް "ނެގެޓިވް" އިން "ސްޓޭބަލް" އަށް ބަދަލުކުރީ ވެސް އެހެން ވެގެން ކަމަށް ބުންޏެވެ.
އޭގެ އިތުރުން ކޮމާޝަލް ބޭންކުތަކާއި އެހެނިހެން މާލީ އިދާރާތަކުން މިހާރު އިންޓްރެސްޓް ބޮޑުކޮށް ލޯނު ލިބުނު ނަމަވެސް، އަދިވެސް އެހެނިހެން ގޮތްގޮތުން ލިބޭ ލޯނުތަކުގެ އިންޓްރެސްޓް ކުޑަ ކަމަށް ބުންޏެވެ. އަދި މިފަހުން ރާއްޖެއިން ވިއްކި 300 މިލިއަން ޑޮލަރުގެ ސުކޫކް ހިމެނޭ ގޮތަށް ރާއްޖޭގެ އެވަރެޖް އިންޓްރެސްޓް ރޭޓު އަދިވެސް ހުރީ 3.5 ޕަސެންޓުގައި ހިފެހެއްޓިފައި ކަމަށް ބުންޏެވެ.
ފިނޭންސުން ބުނީ ފިނޭންސް ހޯދަން ކުރިޔަށް އޮތް ތަނުގައި ވެސް ޑެޓް ކެޕިޓަލް ބާޒާރުތަކުގައި ހަރަކާތްތެރިވާނެ ކަމަށެވެ. ނަމަވެސް ސަރުކާރުން އިސްކަން ދެނީ ބައިލެޓެރަލް އަދި މަލްޓިލެޓެރަލް ގުޅުންތަކުގެ ޒަރިއްޔާއިން ހޯދާ ކޮންސެޝަނަލް ފައިނޭންސިންއަށް ކަމަށް ފިނޭންސުން ބުންޏެވެ.
ޓޫރިޒަމާއި ވެކްސިން ޕްރޮގްރާމްގެ ކާމިޔާބީއާ ގުޅުވާ، ފިނޭންސުން ބުނި ގޮތުގައި މެދު ރާސްތާގެ އަންދާޒާތަކުން ވެސް ފެންނަނީ ރާއްޖޭގެ އިގުތިސޯދު ކުރިއަރައިގެންދާ މަންޒަރެވެ. އަދި މި އަހަރުގެ ތެރޭގައި ޖީޑީޕީ 22.7 ޕަސެންޓު އިތުރުވާނެ ކަމަށް ލަފާކުރެވެ އެވެ.
މޫޑީސްގެ ރޭޓިންއާ ގުޅިގެން ސަރުކާރުން ވަނީ ރާއްޖޭގެ އިންވެސްޓަރުންނާ ކުރަން ޖެހޭ މަޝްވަރާތައް ކުރާނެ ކަމަށާއި، ތަރައްގީގެ ޕްލޭންތަކުގެ އަޕްޑޭޓް ހިއްސާކުރާން ނިންމާފަ އެވެ. އަދި ކުރިޔަށް އޮތް ހަފުތާއިން ފެށިގެން އިންވެސްޓާ ކޯލްތަކެއް ކުރާނެ ކަމަށް ފިނޭންސުން ބުންޏެވެ.
ރާއްޖޭގެ ދަރަނީގެ މައްސަލައިގައި ކަންބޮޑުވުން ފާޅުކޮށްފައި ވަނީ މޫޑީސްއިން އެކަންޏެއް ނޫނެވެ. ރޭޓިން އެޖެންސީތަކުގެ އިތުރުން ވާލްޑް ބޭންކާއި އިންޓަނޭޝަނަލް މަނިޓަރީ ފަންޑުން ވެސް ވަނީ ރާއްޖޭގެ ދަރަނީގެ ހާލަތު މިހާރަށް ވުރެ ރަނގަޅުކުރަން އަންގާފަ އެވެ. އަދި ރާއްޖޭގެ އިގުތިސޯދީ މުސްތަގުބަލަށް މިވަގުތު އޮތް އެންމެ ބޮޑު ގޮންޖެހުމަކީ ވެސް ދަރަނީގެ މައްސަލަ ކަމަށް ބައިނަލްއަގްވާމީ މާލީ އިދާރާތަކުން ފާހަގަކުރެ އެވެ.
