މި ފަހަރުގެ އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް މިއަދު ރާއްޖޭގައި ފަށާއިރު، މި މުބާރާތުގައި މިހާރު ރާއްޖެ ތަމްސީލްކުރުމުގެ ފުރުސަތު އޮތް މާޒިޔާ އިން ކުޅޭނީ ވަރަށް ބޮޑަށް ގައުމީ ރޫހުގައި ކަމަށް އެ ޓީމުގެ ކެޕްޓަން އަސަދުﷲ އަބްދުﷲ (އަސަކޮ) ބުނެފި އެވެ.
މިއީ މާޒިޔާ އިން އޭއެފްސީ ކަޕްގައި ކުޅޭ ހަތް ވަނަ ފަހަރެވެ. މީގެ ކުރިން ހަ ފަހަރު އެ ޓީމުން އޭއެފްސީ ކަޕްގައި ކުޅުނުއިރާ މި ފަހަރު ތަފާތެއް އެބައޮތެވެ.
އެއީ ކުރިން އޭއެފްސީ ކަޕްގެ މެޗުތައް ހޯމް އެންޑް އަވޭ އުސޫލުން ކުރިއަށްދިޔަ ނަމަވެސް ކޮވިޑާ ހެދި މި ފަހަރު ސެންޓްރަލައިޒްކޮށް ކުޅެނީ އެއް ދަނޑުގަ އެވެ. އެ ގޮތުން ދެކުނު އޭޝިއާގެ ގްރޫޕްގެ މެޗުތައް ކުޅޭނީ މާލޭގަ އެވެ. ގަލޮޅު ދަނޑުގައި މެޗުތައް ކުޅޭއިރު މި މުބާރާތުގައި ރާއްޖެ ތަމްސީލްކުރާނެ ހަމައެކަނި ޓީމަކީ މާޒިޔާ އެވެ. ރާއްޖޭގެ އީގަލްސް ވަނީ ގްރޫޕް ސްޓޭޖުގެ ފުރުސަތު ނުލިބި ޕްލޭއޮފުން ކަޓައިފަ އެވެ.
އޭއެފްސީ ކަޕްގެ ގްރޫޕް ސްޓޭޖުގައި މި ފަހަރު މާޒިޔާ ކުޅޭ ފުރަތަމަ މެޗުގައި މިރޭ ނުކުންނާނީ ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއާ ދެކޮޅަށެވެ. އެ މެޗުގެ ކުރިން އިއްޔެ ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގައި އަސަދުﷲ ބުނީ ރާއްޖޭގައި މެޗުތައް ކުޅޭއިރު މާޒިޔާ އަށް ފަސޭހަވާނެ ކަމަށެވެ.
"ކޮންމެ ގޮތެެއް ވިޔަސް ރާއްޖޭގައި މި ފަސްގަނޑުގައި މި ދަނޑުގައި ކުޅޭއިރު އެއީ އަހަރެމެންނަށް ފަސޭހައެއް،" އަސަދުﷲ ބުންޏެވެ.
"މި ވަގުތު ރާއްޖެ ތަމްސީލް ކުރަން މި އޮތީ މާޒިޔާ. މާޒިޔާގެ ކުޅުންތެރިން ވެސް ދެކެނީ އެ ގޮތަށް. އޮފިޝަލުން ވެސް އެންމެން ވެސް މި ގަބޫލުކުރަނީ ގައުމު ކަމަށް މި ތަމްސީލް ކޮށްދެވެނީ. ސަޕޯޓަރުން ހަމަ ބެލުންތެރިން ހިތްހަމަ ޖެހޭ ވަރުގެ ނަތީޖާއެއް ނެރެވޭތޯ މަސައްކަތް ކުރާނަން،"
އިއްޔެ ބޭއްވި ނޫސްވެރިންގެ ބައްދަލުވުމުގައި އަސަދުﷲ ވާހަކަދައްކަނީ.-- ފޮޓޯ: ހުސެއިން ޝަޔާހު/ އަދަދު
މި ފަހަރުގެ އޭއެފްސީ ކަޕްގެ ގްރޫޕް ސްޓޭޖުގައި ލިބެނީ އެންމެ ތިން މެޗެވެ. އެހެންކަމުން ކޮންމެ މެޗެއް ވެސް އެއީ ފައިނަލެއްގެ ގޮތުގައި ދެކިގެން ނަތީޖާ ނެރުން މުހިއްމެވެ.
އަސަދުﷲ ބުނީ އެންމެ މުހިއްމު ކަމެއްގެ ގޮތުގައި މި ވަގުތަށް އޮތީ ރަނގަޅު ފެށުމެއް ހޯދުން ކަމަށެވެ.
"ކޮންމެ ޓީމަކަށް ވެސް އެންމެ މުހިއްމު ވާނީ ފުރަތަމަ މެޗު. އެއީ ތިން މެޗު މި ކުޅެނީ ފުރަތަމަ މެޗުގައި ރަނގަޅު ނަތީޖާއެއް ނުނެރެވިއްޖިއްޔާ ހަމަ ވަރަށް ބޮޑު އުނދަގުލަކަށްވާނީ ކުރިއަށް ދިއުމުގައި. ގްރޫޕްގައި މި އޮތް ހަތަރު ޓީމަކީ ވެސް ވަރަށް ޓަފް ވަރުގަދަ ހަތަރު ޓީމު. ހުރިހާ މެޗުތަކެއް ވެސް ރަނގަޅުވާނެ ކަމަށް މި އުއްމީދުކުރަނީ،" މާޒިޔާގެ ތާރީހުގައި އެ ޓީމަށް އެންމެ ގިނަ ގޯލު ޖަހައިދިން ފޯވާޑް، އަސަދުﷲ ބުންޏެވެ.
އޭއެފްސީ ކަޕްގައި މީގެ ކުރިން ހުރިހާ ފަހަރަކު މާޒިޔާ އިން ކުުޅުނުއިރު ވެސް އަސަދުﷲ ޓީމުގައި ހިމެނެ އެވެ. މިދިޔަ އަހަރުގެ އޭއެފްސީ ކަޕްގެ ކޮލިފައިން ޕްލޭއޮފް ބުރުގައި ބެންގަލޫރާ ދެކޮޅަށް ކުޅުނު ފުރަތަމަ ލެގުގެ ތެރެއިން އަސަދުﷲގެ ކަކުލަަށް އަނިޔާވެ، ކުޅުމާ ދުރަށްދާން ޖެހުނެވެ.
ބެންގަލޫރު ކަޓުވާލައި މިދިޔަ އަހަރުގެ އޭއެފްސީ ކަޕްގެ ގްރޫޕް ސްޓޭޖަށް މާޒިޔާ ކޮލިފައިވިއިރު، ގްރޫޕް ސްޓޭޖުގެ ފުރަތަމަ މެޗުގައި ޗެންނާއީއާ ދެކޮޅަށް ވީ އެއްވަރެވެ. އެ މެޗަށް ފަހު އޭއެފްސީ ކަޕް މުއްދަތެއް ނެތް ގޮތަށް ފަސްކޮށް ފަހުން އޮކްޓޫބަރުގައި ސެންޓްރަލައިޒްކޮށް މާލޭގައި ކުޅެން ތާވަލުކުރި އެވެ. މާޒިޔާ އިން އެ މެޗުތަކަށް ޕްރެކްޓިސް ފެށިއިރު އަސަދުﷲ ބައިވެރިވި އެވެ. އެކަމަކު، ފަހުން އޭއެފްސީން ނިންމީ މިދިޔަ އަހަރުގެ އޭއެފްސީ ކަޕް ކެންސަލް ކޮށްލާށެވެ.
މި ފަހަރުގެ އޭއެފްސީ ކަޕަށް ތައްޔާރުވުމުގެ ގޮތުން ރާއްޖޭގެ ޗެމްޕިއަން މާޒިޔާ އިން ވަނީ ސައުދީ އަރަބިއްޔާގައި ވިއްސަކަށް ދުވަހުގެ ޓްރެއިނިން ކޭމްޕެއް ފުރިހަމަަކޮށްފަ އެވެ. އެފްއޭއެމުން ދިން ފުރުސަތެއްގައި ފުރިހަމަަކުރި މި ޓްރެއިނިން ކޭމްޕްގެ ތެރެއިން މާޒިޔާ ވަނީ އެކުވެރިކަމުގެ ތިން މެޗު ކުޅެފަ އެވެ.
އޭއެފްސީ ކަޕްގައި މާޒިޔާ އާއި ބަޝުންދަރާ ކުޅޭ މެޗު ފަށާނީ މިރޭ 9 ޖަހާއިރު އެވެ. މިއަދު ހަވީރު 4 ޖަހާއިރު ފަށާ މެޗުގައި ބެންގަލޫރު ކުޅޭނީ އޭޓީކޭ މޯހަން ބަގާންއާ ދެކޮޅަށެވެ.
