ރައްޔިތުންގެ މަޖިލީހުގެ ތިންވަނަ ދައުރުގެ ފުރަތަމަ ޖަލްސާ މާދަމާއަށް ތާވަލުކޮށްފި އެވެ.
ދެވަނަ ދައުރު ނިންމައި މަޖިލިސް ޗުއްޓީއަށް ގޮސްފައިވަނީ މިދިޔަ މަހުގެ ނުވަ ވަނަ ދުވަހެވެ.
ނަވާރަ ވަނަ މަޖިލީހުގެ އެހެން ދައުރުތަކާ އަޅާބަލާއިރު، ދެވަނަ ދައުރުގެ މަސައްކަތް ނިސްބަތުން ދަށެވެ.
ކޮވިޑުގެ ހަތަރު ވަނަ ރާޅާއެކު މަޖިލީހުގެ ޖަލްސާތައް ވެސް އޮންލައިންކޮށް ބާއްވަން ޖެހުނުއިރު، ހުށަހެޅުނު މަސައްކަތްތަކުގެ ތެރެއިން ނިމިފައިވަނީ އެންމެ 39 ޕަސަންޓު މަސައްކަތެވެ.
އެގޮތުން، ކުރީ ދައުރުގައި ނުނިމި ހުރި 25 ބިލަކާއި މި ދައުރުގައި ހުށަހެޅުނު 16 ބިލަކާއެކު ޖުމްލަ 41 ބިލެއްގެ މަސައްކަތް ކުރެވުނުއިރު، މި ދައުރުގެ ތެރޭގައި ނިންމިފައިވަނީ ނުވަ ބިލެއްގެ މަސައްކަތެވެ.
ތިންވަނަ ދައުރު މާދަމާ ފަށަން ތައްޔާރުވެފައިވާއިރު، އެޖެންޑާގެ އެންމެ ކުރިއަށްލާފައިވަނީ އިންފޮމޭޝަން ކޮމިޝަނަރުގެ މަގާމަށް ބޭފުޅަކު އައްޔަނުކުރުމުގެ ދިގުލައިގެން ގޮސްފައިވާ މައްސަލަ އެވެ.
މައުލޫމާތު ހޯދާއި ލިބިގަތުމުގެ ހައްގުގެ ގާނޫނު ބުނާގޮތުން، ކޮމިޝަނަރުގެ މަގާމު ހުސްވާތާ ލަސްވެގެން 60 ދުވަހުގެ ތެރޭގައި އެ މަގާމަށް މީހަކު އައްޔަނުކުރަންޖެހޭނެ ކަމަށް ބަޔާންކޮށްފައިވީ ނަމަވެސް، މިދިޔަ މާޗް މަހުގެ 21 ވަނަ ދުވަހުން ފެށިގެން އެ މަގާމު އޮތީ ހުސްކޮށެވެ.
ތިންވަނަ ފަހަރަށް ހުޅުވާލައިގެން އެ މަގާމަށް ކުރިމަތިލި ފަރާތްތަކުގެ ތެރެއިން ރައީސް ފޮނުއްވި ނަންތައް ދިރާސާކުރަން ކޮމިޓީއަށް ފޮނުވުމުގެ އިތުރުން، އިލެކްޝަންސް ކޮމިޝަން (އީސީ) އަށް އައްޔަނުކުރާ މެމްބަރުގެ މައްސަލަ ވެސް މާދަމާގެ ޖަލްސާއަށް ވަނީ އެޖެންޑާކޮށްފަ އެވެ.
އީސީއަށް އާ މެމްބަރަކު އައްޔަނުކުރަންޖެހުނީ އެ ކޮމިޝަނުގެ ރައީސް އަހްމަދު ޝަރީފް މިދިޔަ ޖޫން މަހުގެ ތެރޭގައި އިސްތިއުފާ ދެއްވުމުންނެވެ.
ދިރާސީ އާ އަހަރަށް ދާދި ފަހުން ގެނައި ބަދަލާ އެއްގޮތް ކުރަން، މަޖިލިސް ޗުއްޓީއަށް ދާ ދުވަސްތައް ވެސް ބަދަލުކުރުމާ ގުޅިގެން، މާދަމާ ފެށޭ ތިން ވަނަ ދައުރު ނޮވެމްބަރު މަހުގެ ނިޔަލަށް ކުރިއަށްދާނެ އެވެ.
