ދެ ވަނަ ހާފްގައި އިބްރާހިމް ވަހީދު ހަސަން (އިއްބެ) ޖެހި ދެ ގޯލުން ރާއްޖޭގެ ޗެމްޕިއަން މާޒިޔާ އިން ސައުދީ އަރަބިއްޔާގެ ޖިއްދާ އެފްސީއާ 2-2 އިން އެއްވަރުކޮށްފި އެވެ.
މިއީ މާޒިޔާ އިން ސައުދީ އަރަބިއްޔާގައި ފުރިހަމަކުރާ ޓްރެއިނިން ކޭމްޕް ތެރޭގައި ކުޅުނު ފަހު މެޗެވެ. ޓްރެއިނިންގެ ފުރަތަމަ މެޗުގައި މާޒިޔާ އިން ވަނީ އަލް-އިއްތިހާދުގެ 19 އަހަރުން ދަށުގެ ޓީމު އަތުން 2-1 އިން މޮޅުވެފަ އެވެ. ދެ ވަނަ މެޗުގައި ސައުދީގެ ޕްރޯ ލީގުގެ ކްލަބް އަލް ވަހްދާއާ ލަނޑެއް ނުޖެހި ވީ އެއްވަރެވެ. އަދި ފަހު މެޗުގައި މިރޭ މުހައްމަދު ބިން ސަލްމާން ލީގު (ސައުދީ ދެ ވަނަ ޑިވިޝަން)ގެ ޖިއްދާއާ ވެސް މި ވަނީ އެއްވަރުވެފަ އެވެ.
މާޒިޔާ އިން މިރޭގެ މެޗުގައި ނެރުނު ފުރަތަމަ އެގާރައިގައި ހިމެނެނީ އުޒްބެކިސްތާންގެ ގޯލްކީިޕަރު މިރްޒޮހިދު މަމަކްތޯނޯފް، އަހުމަދު އަބްދުﷲ (ލިލީ)، ސްޕެއިނުގެ ޑިފެންޑަރު ޕޯޒޯ، ޖަޕާނުގެ ޓަކަޝީ އޮޑަވާރާ (ޓަކާ)، ނާއިޒު ހަސަން (ދާދު)، މުހައްމަދު އުމެއިރު، ހަމްޒާ މުހައްމަދު (ހަމްޕު)، ހަސަން ޝިފާޒް (ޑުންގާ)، ހުސެއިން ނިހާން (ނިހާޓް) އަދި ސެއިން ވިންސެންޓްގެ ފޯވާޑް ކޮނޭލިއަސް ސްޓެވާޓް (ކޯނޭ) އެވެ.
މާޒިޔާ އިން މިރޭގެ މެޗަށް ނެރުނު ފުރަތަމަ އެގާރަ ކުޅުންތެރިން.-- ފޮޓޯ: މާޒިޔާ
ޖިއްދާ އެފްސީން ދެ ގޯލު ޖަހާފައިވަނިކޮށް މާޒިޔާ އަށް ފަހަތުން އަރައި އެއްވަރުކޮށްދިނީ އިއްބެ އެވެ. އިއްބެ ކުޅެން އެރީ ވެސް ބަދަލު ކުޅުންތެރިއެއްގެ ގޮތުގަ އެވެ.
އަނިޔާގެ ސަބަބުންނާއި އެކި އެކި ކަންތައްތައް ދިމާވުމާ ގުޅިގެން މިދިޔަ ސީޒަނުގައި އިއްބެ އަށް އޭނާގެ އެންމެ ރަނގަޅު ކުޅުން ނުދެއްކުނެވެ. އެކަމަކު، މިރޭގެ މެޗުގައި ބެންޗުން އަރައި ދެ ގޯލު ޖެހުމަކީ ކުރިއަށް އޮތް އޭއެފްސީ ކަޕަށް ދިއުމުގެ ކުރިން އޭނާ އަށް އިތުބާރު ލިބޭނެ ކަމެކެވެ. އިއްބެ އަކީ ރަނގަޅު ފޯމެއްގައި ހުރެފިނަމަ ރާއްޖޭގައި މި ވަގުތު ހުރި އެންމެ ގޯލާ ރައްޓެހި އެއް މިޑްފީލްޑަރެވެ.
ޓްރެއިނިން ކޭމްޕް ނިންމާލުމަށް ފަހު މާޒިޔާ އެނބުރި ރާއްޖެ އަންނާނީ ހޮނިހިރު ދުވަހު އެވެ.
މީގެ ކުރިން "އަދަދު" އަށް ދިން އިންޓަވިއުއެއްގައި މާޒިޔާގެ ކޯޗު ސާބިއާގެ ރިސްޓޯ ވިޑަކޮވިޗް ވަނީ މިއީ އެ ޓީމަށް ވަރަށް މުހިއްމު ޓްރެއިނިން ކޭމްޕެއް ކަމަށް ބުނެފަ އެވެ. މާޒިޔާ އަށް މި ޓްރެއިނިން ކޭމްޕް ހަމަޖައްސައިދިނީ އެފްއޭއެމުންނެވެ.
މާލޭގައި ކުޅޭ އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތަކުގެ ތެރެއިން މާޒިޔާ ކުޅޭ ފުރަތަމަ މެޗުގައި މި މަހުގެ 18 ވަނަ ދުވަހު ކުޅޭނީ ބަންގްލަދޭޝްގެ ޗެމްޕިއަން ބަޝުންދުރާ ކިންގްސްއާ އެވެ. ދެ ވަނަ މެޗުގައި މި މަހުގެ 21 ވަނަ ދުވަހު އޭޓީކޭ މޯހަން ބަގާންއާ ބައްދަލުކުރުމަށް ފަހު އޭގެ ތިން ދުވަސް ފަހުން މި މަހުގެ 24 ވަނަ ދުވަހު ކުޅޭނީ ޕްލޭއޮފްގައި އީގަލްސް އާއި ބެންގަލޫރު ކުޅެގެން މޮޅުވާ ޓީމަކާ އެވެ. ޕްލޭއޮފް އޮތީ އަންނަ އާދިއްތަ ދުވަހުގެރޭގަ އެވެ.
