ހަރުކަށި ދީނީ ފިކުރުގެ ކަންކަމަށް ރައްޔިތުން ހޭލުންތެރި ކުރުވުމަށް ގައުމީ ފެންވަރުގެ ކެމްޕެއިނެއް ފަށަން ނިންމާފައިވާކަމަށް އިސްލާމިކް މިނިސްޓްރީއާ ހަވާލާދީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާގެ ކަންކަން ބެލުމަށް އުފައްދާފައިވާ އެމްޑީޕީގެ "މެއި6" ކޮމިޓީން މިރޭ ބުނެފި އެވެ.
އެމްޑީޕީގެ ގައުމީ މަޖިލީހުގެ މެމްބަރުން ހިމެނޭގޮތަށް އުފައްދާފައިވާ މެއި6 ކޮމެޓީން މިއަދު ވަނީ އިސްލާމިކް މިނިސްޓްރީގެ އިސް ބޭފުޅުންނާ ބައްދަލު ކުރައްވައިފަ އެވެ.
އެ ބައްދަލުވުމުގެ މައުލޫމާތު އެމްޑީޕީގެ ގައުމީ މަޖިލީހާ ހިއްސާ ކުރަމުން އެ ކޮމެޓީގެ މުގައްރިރު އަދި ވިލުފުށީ ދާއިރާގެ މެމްބަރު ހަސަން އަފީފް ވިދާޅުވީ ދީނާ ގުޅުވައިގެން މީހުން ކާފަރުކޮށް ލޭ ހޭދަކުރުމާ ގުޅޭގޮތުން ދީނުގައި އޮންނަ ގޮތް އިސްލާމިކް މިނިސްޓްރީގެ ބޭފުޅުންގެ ކިބައިން ސާފުކުރެއްވި ކަމަށެވެ.
އެގޮތުން، އެއީ ދީނީ ގޮތުން ކުރެވޭނެ ކަމެއް ނޫން ކަމާއި، އެފަދަ ކަންކަން ރައްޔިތުންނަށް ސާފުކޮށްދޭން ދެ އަހަރު ދުވަހުގެ ކެމްޕެއިނެއް ފަށަން މިނިސްޓްރީން ނިންމާފައިވާ ކަމުގެ މައުލޫމާތު އަފީފް ހިއްސާކުރެއްވި އެވެ.
"އިސްލާމް ދީނުގައި ވަކި މީހަކީ ލާދީނީ މީހެއްކަން އަނެއް މީހާއަކީ މަރަން ޖެހޭ މީހެއްކަން މިގޮތަށް ނުކިޔޭނެ ކަމާއި އަދި އެއީ އިސްލާމް ދީން ހުއްދަ ކުރާ ކަމެއް ނޫންކަން މި މައުލޫމާތު ރައްޔިތުންނަށް ފޯރުކޮށްދޭން ޖެހޭ،" އަފީފް ވިދާޅުވި އެވެ.
ޓީވީ މެދުވެރިކޮށް ހަރުކަށި ފިކުރާ ދެކޮޅަށް ކެމްޕެއިން ފަށަން މަސައްކަތް ކުރާއިރު މިނިސްޓްރީއަށް ދިމާވާ އެންމެ ބޮޑު ދައްޗަކީ އެކަށީގެންވާ ބަޖެޓެއް ނެތުން ކަމަށް ވެސް އަފީފް ވިދާޅުވި އެވެ.
ޅައުމުރުގައި ކުޑަކުދިންގެ ސިކުނޑިތައް ވެސް ހަރުކަށިފިކުރަށް އަނބުރާލަމުންދާތީ އެކަންކަން ހުއްޓުވުމަށް އެޑިއުކޭޝަން މިނިސްޓްރީ އާއި އިސްލާމިކް މިނިސްޓްރީ ގުޅިގެން ކުރެވޭނެ ކަންތައްތަކާ މެދުވެސް މިއަދު މަޝްވަރާ ކުރެއްވި ކަމަށް އަފީފް ވިދާޅުވި އެވެ.
އިސްލާމިކް މިނިސްޓަރު ޑރ. އަހުމަދު ޒާހިރާ ހަވާލާދެއްވައި އަފީފް ވިދާޅުވީ ހަރުކަށި ފިކުރުގެ މީހުންގެ ހަތަރު ބަޔަކަށް ބެހިފައިވާ ކަމަށެވެ.
އެފަދަ މީހުންނަށް ނަސޭހަތް ދީ އަލުން އަނބުރާ މުޖުތަމައުއަށް ގެނައުމަށް އިސްލާމިކް މިނިސްޓްރީން މަސައްކަތްތަކެއް ކުރަމުން އަންނަ ކަމަށް މިނިސްޓްރީން ބުނި ކަމަށް ވެސް އަފީފް ވިދާޅުވި އެވެ.
"އެކަން ކުރަނީ ޕޮލިސް އިންޓެލިޖެންސްއާ ގުޅިގެން. ޕޮލިސް އިންޓެލިޖެންސްއިން ފާހަގަކުރާ ފަރާތްތަކަށް މި ބޭފުޅުން ވަޑައިގެން ބައްދަލުކޮށް، އެ މީހުންނަށް ދީނުގައި އަސްލު ކަންތައް އޮންނަގޮތް ސާފުކޮށް ކިޔައި މިދެނީ. އެއީ ވަރަށް އުނދަގޫ މަރުހަލާއެއް ކަމަށް އެ ބޭފުޅުން މި ވިދާޅުވަނީ،" އަފީފް ވިދާޅުވި އެވެ.
އެ ހަމަލާއާ ގުޅިގެން ރާއްޖޭގެ ތާރީހުގައި ފުރަތަމަ ފަހަރަށް މުޅި މަޖިލިސް އިގުރާރުވެގެން، މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ހިންގި އިންކުޔަރީއަށްފަހު ނެރުނު ރިޕޯޓުގައި ހުށަހެޅި ރެކަމަންޑޭޝަންތަކުގެ ތެރޭގައި ހަޜުކަށި ފިކުރާ ދެކޮޅަށް އިސްލާމިކް މިނިސްޓްރީން ކުރަންޖެހޭކަންކަން ވަނީ ފާހަގަކޮށްފަ އެވެ.
ނަޝީދު އަވަހާރަކޮށްލަން ދިން ޓެރަރިސްޓް ހަމަލާއިން އެމަނިކުފާންގެ ފުރާނަ ސަލާމަތްވީ ކިރިޔާ އެވެ. އެހަމަލާ ދިނުމުގެ ފަހަތުގައި ތިބީ ދީނީގޮތުން ހައްދުފަހަނަ އަޅާފައިވާ ބައެކެވެ. އޭގެ ތެރެއިން ބައެއް މީހުންގެ މައްޗަށް ވަނީ ދައުވާ އުފުލައިފަ އެވެ.
