އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ގައުމީ މަޖިލީހުގެ ޖަލްސާއެއް މާދަމާ ރޭ ބާއްވާ ގޮތަށް ހަމަޖެހިއްޖެ އެވެ.
އަދަދު އަށް އެނގިފައިވާ ގޮތުގައި މާދަމާ ރޭ 21:00 ޖަހާއިރު ބާއްވާ ގައުމީ މަޖިލީހުގެ ސިއްރު ބައްދަލުވުމަކީ މިހާރު ޕާޓީ ތެރޭގައި ޖެހިފައިވާ މައްސަލަތައް ހައްލުކުރުމަށް ދެފަރާތުން އެއްބަސްވެފައިވާ ކަންކަން ގައުމީ މަޖިލީހަށް ހުށަހަޅައި، ގޮތެއް ނިންމުމަށް ބާއްވާ ޖަލްސާއެކެވެ.
ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވީ އެމްޑީޕީގެ ހުރިހާ ލީޑަރުން އެކުގައި މަސައްކަތް ކުރެވޭނެ ގޮތެއް ހޯއްދެވިފައިވާ ކަމަށެވެ.
"އިރާދަކުރެއްވިއްޔާ މިހާ ހިސާބަށް އާދެވުނު އިރުގައި އަޅުގަނޑުމެން މި ވަނީ މިކަމަށް ހައްލެއް ހޯދާފައި. އާންމު މެންބަރު އެ އެދޭ ގޮތަށް އަޅުގަނޑުމެން މުޅި ލީޑާޝިޕް އެކީގައި މަސައްކަތް ކުރެވޭނެ ގޮތްތަކެއް އިރާދަކުރެއްވިއްޔާ އަޅުގަނޑުމެންނަށް މިހިސާބަށް އާދެވުނުއިރު ހޯދިއްޖެ،" ސޯލިހު މިރޭ ވިދާޅުވި އެވެ.
ސޯލިހު ވިދާޅުވީ 2028 ގެ ރިޔާސީ އިންތިހާބު އެމްޑީޕީން ކާމިޔާބުކުރާނީ ލީޑާޝިޕް އެކީގައި އޮވެގެން، އެއްވެސް ލީޑަރަކު ބާކީނުވާ ކަހަލަ ގޮތަކަށް ހިސާބު ކުރެވިގެން ކަމަށެވެ.
ސޯލިހުގެ ފެކްޝަނުގެ އިތުރުން އެމްޑީޕީގައި ދެން ހިމެނެނީ ކުރީގެ ރައީސް މުހައްމަދު ނަޝީދާއި ކުރީގެ ޗެއާޕާސަން ފައްޔާޒް އިސްމާއިލް ލީޑު ކުރައްވާ ފެކްޝަނާއި ޕާޓީގެ ރައީސް އަބްދުﷲ ޝާހިދުގެ ފެކްޝަނެވެ.
ފެކްޝަންތަކުގެ މެދުގައި ޖެހިފައިވާ މައްސަލަގަނޑު އާންމުންނާ ހަމައަށް ތިލަވީ، ލޯކަލް ކައުންސިލްތަކުގެ އިންތިހާބުގައި ލިބުނު ކާމިޔާބީ ފާހަގަ ކުރަން ހޯމަ ދުވަހު ބޭއްވި ޖަލްސާގައި ވާހަކަ ދެއްކެވުމުގެ ފުރުސަތު ނަޝީދަށް ނުދިނުމުންނެވެ.
އޭގެ ފަހުން، ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ މަގާމުން ވަކި ކުރުމުގެ މަސައްކަތް ނަޝީދުގެ ފެކްޝަނުން ފެށި އެވެ. ނަމަވެސް އެ މަސައްކަތް މިހާރު ހުއްޓާލާފައިވާ ކަމަށް މި ނޫހަށް މައުލޫމާތު ލިބިފައިވެ އެވެ.
މައްސަލަ ހޫނުވެފައިވާ ދަނޑިވަޅުގައި ފައްޔާޒް އާއި ޣަފޫރު މިރޭ ބައްދަލުވުމެއް ބޭއްވި އެވެ. އެ ބައްދަލުވުމުގެ ފޮޓޯތައް މިރޭ ސޯޝަލް މީޑިއާގައި ދަނީ ދައުރުވަމުންނެވެ.
