ގއ. ދާންދޫގައި ފުލުހުން ހިންގަން އުޅުނު މަސްތުވާތަކެތީގެ އޮޕަރޭޝަނެއްގެ މައުލޫމާތު މާ ކުރިން ލީކުކޮށްލައި އެ އޮޕަރޭޝަނަށް ހުރަސްއެޅި ކަމުގެ ތުހުމަތު އެ ރަށު ކައުންސިލްގެ ރައީސް މުހައްމަދު އާސިފްގެ މައްޗަށް ކޮށްފި އެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
ފުލުހުންގެ ތަރުޖަމާނު "އަދަދު"އަށް މިއަދު ވިދާޅުވި ގޮތުގައި މި ހަފުތާގެ ތެރޭގައި ހިންގި އެ އޮޕަރޭޝަންގެ މައުލޫމާތު ލީކުކުރި މައްސަލައެއް އަންނަނީ ތަހުގީގުކުރަމުންނެވެ.
އެ ތަހުގީގާ ގުޅިގެން ކޯޓު އަމުރެއްގެ ދަށުން މިހާތަނަށް ހަތަރު މީހެއްގެ ފޯނު ފުލުހުންގެ ބެލުމުގެ ދަށަށް ގެނެވިފައިވާ ކަމަށް އޭނާ ވިދާޅުވި އެވެ.
ނަމަވެސް، އިތުރު ތަފްސީލެއް ނުދެއްވަ އެވެ.
"އަދަދު"އަށް ކަށަވަރުވެފައިވާ ގޮތުގައި އެ ހަތަރު މީހުންގެ ތެރޭގައި ކައުންސިލްގެ ރައީސް ހިމެނެ އެވެ. އޭނާގެ މައްޗަށް ކުރެވެނީ އެ އޮޕަރޭޝަންގެ މައުލޫމާތު ބަޔަކަށް ދިން ކަމުގެ ތުހުމަތެވެ. ފުލުހުން ބަލާފާސްކުރަން އުޅުނު ގެއަކީ, ކައުންސިލް ރައީސްއާ އާއިލީ ގޮތުން ގުޅުން އޮންނަ ބައެއް ކަން ވެސް އެނގިފައިވެ އެވެ.
މި ތުހުމަތާ ގުޅިގެން އާސިފްގެ ބަހެއް ލިބޭ ގޮތެއް ނުވި އެވެ.
މިކަމާ ގުޅޭ ގޮތުން ސުވާލުކުރި އެ ރަށު ކައުންސިލުގެ ބައެއް އެހެން މެމްބަރުން ވިދާޅުވަނީ އެކަމުގެ އެއްވެސް މައުލޫމާތެއް އެނގިވަޑައިގެންފައި ނުވާ ކަމަށެވެ.
