ދެވަނަ ކުއާޓާގައި އިގުތިސޯދީ ދުވެލި މަޑުޖެހުމާ ގުޅިގެން ހޯލްސޭލާއި ރީޓެއިލް ދާއިރާގެ ވިޔަފާރިތައް ފިޔަވާ އެހެން ހުރިހާ ދާއިރާއެއްގެ ވިޔަފާރިތަކަށް އަސަރު ކުރި ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
އެމްއެމްއޭ އިން އިއްޔެ އާންމުކުރި ދެވަނަ ކުއާޓާގެ ކުއާޓަލީ ބިޒްނަސް ސާވޭގައި ފާހަގަކޮށްފައިވާ ގޮތުގައި އެ ކުއާޓާގައި ޓޫރިޒަމާއި، ކޮންސްޓްރަކްޝަންގެ އިތުރުން ދަތުރުފަތުރާއި މުވާސަލާތީ ދާއިރާގެ ވިޔަފާރި ހަރަކާތްތަކަށް އަސަރުކުރި އެވެ. އަދި މި ސާވޭގައި ބައިވެރިވި ގިނަ ވިޔަފާރިތަކުން ވަނީ އާމްދަނީ ހީނަރުވި ކަމަށް ބުނެފަ އެވެ.
ވިޔަފާރިތަކުގެ މާލީ ހާލަތަށް ބަލާއިރު، ދެވަނަ ކުއާޓާގައި ދަތުރުފަތުރާއި މުވާސަލާތީ ދާއިރާގެ ވިޔަފާރިތައް ފިޔަވާ އެހެން ހުރިހާ ދާއިރާއެއްގެ ގިނަ ވިޔަފާރިތަކުގެ މާލީ ހާލަތު ވަނީ އިތުރަށް ގޯސްވެފަ އެވެ. އަދި ހުރިހާ ވިޔަފާރިތަކުން ވެސް ބުނީ ދަރަންޏަށް ފައިސާ ހޯދަން ކުރިޔަށް ވުރެ އުނދަގޫ ކަމަށެވެ.
ދެވަނަ ކުއާޓާގައި ގިނަ ވިޔަފާރިތަކަށް އަސަރު ކުރި ނަމަވެސް، ކޮންސްޓްރަކްޝަން ދާއިރާ ނޫން ވިޔަފާރިތަކުން އުއްމީދު ކުރަނީ ތިންވަނަ ކުއާޓާގައި ވިޔަފާރި ރަނގަޅު ވާނެ ކަމަށެވެ. ކޮންސްޓްރަކްޝަން ދާއިރާގެ ގިނަ ވިޔަފާރިތަކުން ލަފާކުރަނީ މި ކުއާޓާގައި ވެސް ވިޔަފާރިއަށް މާ ބޮޑު ބަދަލެއް ނާންނާނެ ކަމަށެވެ.
މި އަހަރުގެ ފުރަތަމަ ކުއާޓާއަށް ވުރެ ޖުމްލަކޮށް ހުރިހާ ވިޔަފާރިއަކަށް ވެސް ދެވަނަ ކުއާޓާގައި ގެއްލުން ބޮޑެވެ އޭގެ ތެރެއިން ވެސް ޓޫރިޒަމާއި ކޮންސްޓްރަކްޝަން ވިޔަފާރިތަކުގެ އާމްދަނީއަށް ކުރި އަސަރު ބޮޑެވެ. މި ދާއިރާގެ ގިނަ ވިޔަފާރިތަކުން ބުނަނީ ތިންވަނަ ކުއާޓާގައި ވެސް ބަލިމަޑުކަމުގެ ސަބަބުން ލިބެމުންދާ ގެއްލުން ފޫނުބެދޭނެ ކަމަށެވެ.
