ރައީސް މުހައްމަދު ނަޝީދު އަވަހާރަކޮށްލަން މާލޭގައި ބޮން ގޮއްވި މައްސަލައިގައި ހައްޔަރުކޮށްފައި ހުރި ލ. ގަން، ދުންފިނިއުފާ، އަހުމަދު ފާތިހުގެ މައްޗަށް ދައުވާ ނުކުރަން ނިންމުމުން އޭނާ ބަންދުން ދޫކޮށްލައިފި އެވެ.
ފުލުހުންގެ ބަންދުން ފާތިހު ދޫކޮށްލިކަން އެ އިދާރާއިން ވަނީ ކަށަވަރުކޮށްދީފަ އެވެ.
ފުލުހުންގެ އިންޓެލިޖެންސް ޑިޕާޓްމަންޓުގައި ކުރިން މަސައްކަތް ކުރި ފާތިހުގެ މައްޗަށް ދައުވާ ނުކުރަން ނިންމީ އޭނާގެ މައްސަލަ ކޯޓަށް ހުށަހަޅާނެވަރުގެ ހެކި ނެތުމުން ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް އަންގާރަ ދުވަހު ވަނީ ވިދާޅުވެފަ އެވެ.
ފާތިހު ދޫކޮށްލާފައި މި ވަނީ އޭނާ ދޫކޮށްލަފާނެކަމުގެ ކަންބޮޑުވުން ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ގައުމީ މަޖްލިސް ޖަލްސާއެއްގައި ރޭ ފާޅުކޮށްފައި އޮއްވަ އެވެ. މެމްބަރުންގެ މައިގަނޑު ކަންބޮޑުވުމަކަށްވީ އޭނާއަކީ ހަރުކަށި ފިކުރަށް ތާއީދު ކުރާ މީހެއްކަން ފުލުހުންގެ ތަހުގީގަށް އެނގޭއިރު ވެސް ދައުވާ ނުކުރަން ނިންމުމެވެ.
ފުލުހުން ފާތިހު ހައްޔަރުކޮށްފައި ވަނީ ބ. ދަރަންވަންދޫގައި ހުއްޓަ އެވެ. އޭނާ އެ ރަށަށް ފުރީ ކައިވެންޏެއް ކުރުމަށް ކަމަށްވެ އެވެ. އަދި ހައްޔަރު ކުރީ ކައިވެނި ކުރި ހަފްތާގަ އެވެ.
ފާތިހު މަސައްކަތްކޮށްފައި ވަނީ ފުލުހުންގެ އިންޓެލިޖެންސް ޑިޕާޓްމަންޓުގައި ނަމަވެސް އޭނާ މަސައްކަތް ކުރީ ޓެރަރިޒަމްއާ ގުޅޭ އިންޓެލިޖެންސްގައި ނޫން ކަމަށް ހޯމް މިނިސްޓަރު އިމްރާން އަބްދުﷲ މީގެ ކުރިން ވަނީ ވިދާޅުވެފަ އެވެ.
ނަޝީދު އަވަހާރަކޮށްލަން އުޅުނު މައްސަލައިގައި މިހާތަނަށް 10 މީހަކު ފުލުހުން ހައްޔަރުކޮށްފައިވާއިރު އަދުހަމް ހިމެނޭ ގޮތަށް ހަތަރު މީހެއްގެ މައްޗަށް ދައުވާ ކުރަން ފޮނުވި އެވެ. ފާތިހުގެ މައްޗަށް ދައުވާ ނުކުރި ނަމަވެސް ބޮން ގޮއްވި މައްސަލައިގައި ހަތަރު މީހެއްގެ މައްޗަށް ދައުވާ އުފުލާފައިވާ ކަމަށް ޕީޖީ ވިދާޅުވެފައިވެ އެވެ.
އެ މައްސަލައިގައި ހައްޔަރުގައި ތިބި މީހުންނަކީ މ. ކުދެހިގޭ، އިސްހާގާއި ގއ. ވިލިނގިލީ، ހުދުރުމާގޭ، ފަހުމީ އަލީ އާއި ނ. މަނަދޫ ނޫރީގޭ، އަލީ ހައިޝަން އާއި ހއ. ހޯރަފުށީ، އަލަނާސިގޭ، މުހައްމަދު ތަސްލީމާއި އއ. މާޅޮސް، އަސަރީގޭ މުހައްމަދު ނާޒިމާއި ހއ. މޮޅަދޫ، ބަހާރުގޭ އަބްދުﷲ އަލިމަނިކެވެ.
ނަޝީދު އަވަހާރަކޮށްލަން މިދިޔަ ރޯދަ މަހު ދިން ހަމަލާއަށްފަހު އެމަނިކުފާނުގެ ފުރާނަފުޅު ސަލާމަތް ކުރުމަށް އޭޑީކޭގެ ޑޮކްޓަރުން ނަޝީދުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހެދި އެވެ. ބޮމުގެ ތެރެއަށް އަޅާފައި ފުއްތަކުން 10 ފުއް އެމަނިކުފާނުގެ ހަށިކޮޅުން ނެގި އެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ފެނުނެވެ.
