ދެކުނުގެ އަތޮޅުތަކުގައި ހުރި ރިސޯޓްތަކާއި ހޮޓާތަކާއި ގެސްޓްހައުސްތަކަށް އިރުމަތީ ޔޫރަޕުން ޓޫރިސްޓުން ގެންނަން ހާއްސަ ޗާޓަރު ފްލައިޓްތަކެއް ފެށުމުގެ މަސައްކަތް ރިސޯޓް ލައިފް މޯލްޑިވްސްއިން ފަށައިފި އެވެ.
މި ޗާޓަރުތައް ފެށުމުގެ މަސައްކަތް ގޮސްފައިވާ ހިސާބާ ގުޅޭގޮތުން ރިސޯޓް ލައިފްގެ މެނޭޖިން ޑިރެކްޓަރު ޝާޒް ވަލީދް "އަދަދު"އަށް ވިދާޅުވީ، މިކަމަށް ބޭނުންވާ ހުއްދަތައް ނަގަން ސިވިލް އޭވިއޭޝަން އޮތޯރިޓީގައި މިހާރު އެދިފައިވާ ކަމަށެވެ. އަދި އަންނަ ސެޕްޓެމްބަރު މަހު ނޫނީ އޮކްޓޫބަރު މަހުގެ ތެރޭގައި ސީދާ އައްޑޫ އިންޓަނޭޝަނަލް އެއާޕޯޓަށް ދަތުރުތައް ފެށޭ ވަރު ވާނެ ކަމަށް ވިދާޅުވި އެވެ.
މި ޗާޓަރު ފްލައިޓްތައް ދަތުރުކުރާނީ ރަޝިއާއިން ސީދާ ގަން އިންޓަނޭޝަނަލް އެއާޕޯޓަށެވެ. އަދި މި އަހަރު ނިމުމުގެ ކުރިން ޔޫކްރެއިނުން ވެސް ސީދާ ދަތުރުތައް ފެށުމަށް އަންނަނީ މަސައްކަތް ކުރަމުންނެވެ.
ދެކުނުގެ އަތޮޅުތަކަށް އަމާޒުކޮށްގެން ދަތުރުތައް ފެށުމާ ގުޅިގެން ޝާޒް ވިދާޅުވީ، މި ފްލައިޓްތައް އަޅައިގެން ބޭނުންވަނީ ދެކުނުގެ ޓޫރިޒަމް ތަރައްގީކުރަން ކަމަށެވެ. އަދި އަމާޒަކީ އައްޑޫ އަތޮޅާއި ހުވަދު އަތޮޅުގައި މިހާރު ވެސް ޓޫރިސްޓުންނަށް ގިނަ ޕްރޮޑަކްޓްތަކެއް ހުރި އިރު، ޑެސްޓިނޭޝަނެއްގެ ތެރެއިން ޑެސްޓިނޭޝަނެއް ދިރުވާލުން ކަމަށް ވިދާޅުވި އެވެ.
"ޓޫރިޒަމްގައި ތަސައްވުރެއް ހުރި މީހެއް ވެއްޖިއްޔާ އެނގޭނެ، ކުރިޔަށް އޮތް ތާނގައި އެންމެ ކުރިއަރާނީ ދެކުނުގެ ޓޫރިޒަމް ކަން. ރޫރަލް ޓޫރިޒަމްގެ ތެރެއަށް ވަދެގެން ޑެސްޓިނޭޝަން ތަރައްގީވާ ވަރަކަށް ވިޔަފާރި ވެސް ތަރައްގީ ވާނެ ކަމުގެ ޔަގީންކަން އެބައޮތް" ޝާޒް ވިދާޅުވި އެވެ.
މި ފްލައިޓްތައް ޖައްސާ ގަން އެއާޕޯޓާ ގުޅިގެން ހުރި ކަންބޮޑުވުންތަކާއި ގުޅިގެން ޝާޒް ވިދާޅުވީ، އެއާޕޯޓުގައި ރަނގަޅު ކުރަން ހުރީ ކުދިކުދި ކަންކަން ކަމަށެވެ. އަދި އެކަންކަން ހައްލު ކޮށްދޭނެ ކަމުގެ ޔަގީންކަން ސަރުކާރާއި، އައްޑޫ އެއާޕޯޓްސް ހިންގާ އޭއައިއޭ ކުންފުނިން ދީފައިވާ ކަމަށް ވިދާޅުވި އެވެ.
"އެއާޕޯޓުގެ ރަންވޭއަކީ ބަރާބަރު ރަންވޭއެއް. ދެން ބައެއް ކަހަލަ އިންފްރާސްޓްރަކްޗާ ބޭނުން ނުކުރެވޭ މައްސަލަ. މިސާލަކަށް އިމިގްރޭޝަންގެ އެންމެ ކައުންޓަރެއް ހުރުން. އެކަމަކު ސަރުކާރާއި، އައްޑޫ އެއާޕޯޓް ހިންގާ ކުންފުނިން އެކަންކަން ހައްލުކުރާނެ ކަމުގެ ޔަގީންކަންދޭ. އަދި ފްލައިޓްތައް ފެށުމަށް ބާރުއަޅާ" ޝާޒް ވިދާޅުވި އެވެ.
ރިސޯޓް ލައިފުން އަމާޒު ހިފާފައިވަނީ މި ޗާޓަރު ފްލައިޓްތަކާ އެކު ރަސްމީކޮށް "ސައުތް ޓޫރިޒަމް" ބްރޭންޑް ލޯންޗް ކުރުމެވެ. އަދި މިހާރު ޖައްސާ ފްލައިޓްތަކަކީ މިއީ ދެކޮޅު ޖެހޭ ކަމެއްތޯ ބަލަން ކުރާ މަސައްކަތެއް ކަމުން، މިކަމުގެ ފީސިބިލިޓީއަށް ބަލާފައި އިތުރަށް މި މަސައްކަތް ފުޅާކުރުމުގެ ވިސްނުން ގެންގުޅެ އެވެ.
ޝާޒް ވިދާޅުވީ ހެޔޮ އަގުގައި ޓޫރިސްޓުންނަށް ސީޓް އޮފާކޮށްގެން ބޭޏުންވާ ވަރަށް ކެޕޭސިޓީ ލިބޭނެ ކަމަށެވެ. އަދި ރިސޯޓް ލައިފުން ޓޫރިސްޓުންނަށް ވިއްކާނީ މުޅި ޗުއްޓީގެ ހުރިހާ ކަމެއް ހިމެނޭ ގޮތަށް ކޮމްބައިންޑް ޕެކޭޖްތަކެއް ކަމުގައި ވިދާޅުވި އެވެ. އެގޮތުން ފްލައިޓް ޓިކެޓުން ފެށިގެން ގޮސް ޓްރާންސްފާ އަދި އެކޮމޮޑޭޝަން ހަރަދުތައް މި ޕެކޭޖްތަކުގައި ހިމެނެ އެވެ.
ރާއްޖޭގެ އިން-ބައުންޑް ޓްރެވަލް އެޖެންސީތަކުގެ އިސް ސަފުގައި ހަރަކާތްތެރިވާ ރިސޯޓް ލައިފަކީ ރިސޯޓްތަކާއި، ހޮޓާތަކުގެ އިތުރުން ގެސްޓްހައުސް އަދި ސަފާރީތައް ވެސް ވިއްކާ ވިޔަފާރިއެކެވެ. އަދި މި ބަލިމަޑުކަމުގެ ތެރޭގައި އިރުމަތީ ޔޫރަޕުން ޓޫރިސްޓުން އަންނަ ޓޫރިސްޓުން އިތުރުވުމުގައި ބޮޑު ރޯލެއް އަދާކުރި އެވެ.
