ޑޮކްޓަރަށް ދައްކަން މާލެ އައި ގޮތަށް ގެއްލިގެން ހޯދާތާ ހަ ދުވަސް ފަހުން އިއްޔެ އަހްމަދު ނައުފަލް ފެނުނު ނަމަވެސް އޭނާއަށް ވީނުވީއެއް ނޭނގި ގެއްލުނު ތަހުގީގު ކުރިއަށް އެބަދާ ކަމަށް ފުލުހުން މިއަދު ބުނެފި އެވެ.
ނައުފަލްގެ ހަބަރެއް ނުވެގެން މިދިޔަ ހޯމަ ދުވަހުން ފެށިގެން އާއިލާ އިން ގެންދިޔައީ މާލެ އާއި ހުޅުމާލޭގެ އެކި ތަންތަން ބަލަމުންނެވެ. އޭނާ ގެއްލުނު ކަން ފުލުހުންނަށް ރިޕޯޓްކުރުމުން ފުލުހުން ވެސް އޮތީ ފޮޓޯއާ އެކު އޭނާ ހޯދަން އިއުލާންކޮށްފަ އެވެ.
ނޫސްތަކުގައި ވެސް އޭނާއާ ގުޅޭގޮތުން ގިނަ ވާހަކަތަކެއް ރިޕޯޓްކޮށްފައި ވަނިކޮށް އިއްޔެ ނައުފަލް ވަނީ އާއިލާއާ ގުޅައިފަ އެވެ. އަދި އޭނާ ގެއްލުނީ ނޫން ކަމާއި ނުގުޅުނީ ފޯން ހަލާކުވެގެން ކަމަށް ބުނެފައިވެ އެވެ.
ނައުފަލް އިއްޔެ ފެނުމުން އާއިލާއިން ވަނީ އޭނާ ފުލުހަށް ގެންގޮސް ބަޔާން ދީފަ އެވެ. މިހާރު އޭނާ ހުރީ އާއިލާ މީހެއްގެ ގޭގަ އެވެ.
ފުލުހުންގެ މީޑިއާ އޮފިޝަލް މިއަދު "އަދަދު" އަށް ވިދާޅުވީ އެ މައްސަލައާ ގުޅިގެން އިތުރަށް ބަލަން ޖެހޭ ކަންކަން ބަލައި އެ މައްސަލަ އަދިވެސް ތަހުގީގު ކުރަމުން އަންނަ ކަމަށެވެ. އިތުރު ތަފްސީލެއް ނުދެއްވަ އެވެ.
ޗާންދަނީ މަގުގައި ހުރި ގެސްޓް ހައުސްގައި ނައުފަލް އުޅުނީ އޭނާގެ އެކުވެރި ހާޝިމްއާ އެކުގައި ކަމަށް އާއިލާއިން ވާހަކަ ދެއްކި މީހާ ރޭ ބުންޏެވެ. އޭނާ މާލެ އައިސް ކުރިން ވެސް އުޅެނީ އެ ހާޝިމާ އެކުގަ އެވެ.
ނަމަވެސް އެއީ ކާކުކަމެއް އެ އާއިލާއަކަށް ނޭނގެ އެވެ. އަދި އެ ހާޝިމާ ގުޅޭގޮތުން ނައުފަލް ދައްކާފައި ހުރި ވާހަކަތަކާ މެދު ސުވާލު އުފެދޭ ކަމަށް ވެސް އާއިލާއިން ބުންޏެވެ.
މިހާ ދުވަސްވީއިރު އަދި ގެއްލިގެން ފުލުހުން އިއުލާން ކުރުމުން ވެސް ނައުފަލް ހަބަރެއް ނުވީ ކީއްވެގެންތޯ ރޭ "އަދަދު" އިން ސުވާލު ކުރުމުން އާއިލާ މެމްބަރު ބުނީ މިވަގުތަކީ އެ ހުރިހާ ސުވާލެއް ކުރަން އެންމެ ރަނގަޅު ވަގުތު ކަމަށް ނުވާތީ އެހެން އަދި ނާހާ ކަމަށެވެ.
އދ. ކުނބުރުދޫ, ޒުވާން މަސްވެރިޔާ، ނައުފަލް 26, ގެއްލިގެން ހޯދަން ފެށީ މިމަހު 26 ވަނަ ދުވަހު އޭނާގެ މަންމައަށް ގުޅިފަހުން ދެން ހަބަރެއް ނުވެގެންނެވެ.
އޭނާގެ ބައްޕަ ދުއްވާ "ޒިކުރާ 2" ދޯނިން ކަންނެއްޔަށް ދާން އުޅޭ ނައުފަލް މި މަހު 20 ގައި މާލެ އައީ ދޯންޏަށް ވެއްޓި ފަޔަށް ލިބުނު އަނިޔާއަކަށް ފަރުވާ ހޯދުމަށެވެ. މާލެ އައިސް އޭގެ އަނެއް ދުވަހު އޭނާ ވަނީ ޓްރީޓޮޕް ހޮސްޕިޓަލުން ޑޮކްޓަރަށް ދައްކައިފަ އެވެ.
