ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މެއި 6، ގައި ބޮން ގޮއްވި މައްސަލައިގައި ފުލުހުން ހައްޔަރުކޮށްފައިވާ ބައެއް މީހުން ކުށަށް އިއުތިރާފުވެ ދައުލަތާއެކު އިއުތިރާފުގެ އެއްބަސްވުމަކަށްދާން ބޭނުންވާ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް މިރޭ ވިދާޅުވެއްޖެ އެވެ.
އިސްކަންދަރު ކޮށީގައި ފުލުހުން ކުރިއަށްގެންދާ ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޝަމީމް ވިދާޅުވީ ތުހުމަތު ކުރެވޭ ބައެއް މީހުން އިއުތިރާފުގެ އެއްބަސްވުމަކަށްދާން ބޭނުންވި ނަމަވެސް އެކަމަށް މިހާތަނަށް ގޮތެއް ނިންމާފައިނުވާ ކަމަށެވެ.
"މި މައްސަލައިގައި މިހާތަނަށް ތުހުމަތު ކުރެވޭ މީހުންގެ ތެރެއިން ބައެއް މީހުން އިއުތިރާފުގެ އެއްބަސްވުން ހަދަން އަޅުގަނޑުމެންނާއެކު ވާހަކަ ދައްކަމުން އެބަދޭ. އަޅުގަނޑުމެން އަދި އެކަމަށް ގޮތެއް ނިންމާފައެއް ނުވާނެ. އަޅުގަނޑުމެން އެ ޑިސްކަޝަންތައް އިތުރަށް ކުރިއަށްގެންދާނީ މައްސަލަ ދިރާސާ ކުރަމުންދާއިރު،" އޭނާ ވިދާޅުވި އެވެ.
އިއުތިރާފްގެ އެއްބަސްވުމެއް ހެދުމާމެދު ގޮތެއް ނިންމައި ދެން ބާއްވާ ނޫސްވެރިންގެ ބައްދަލުވުމުގައި އެ މައުލޫމާތު ހިއްސާ ކުރައްވާނެ ކަމަށް ވެސް ޝަމީމް ވިދާޅުވި އެވެ.
"އަޅުގަނޑުމެން ދިރާސާ ކުރަމުން މިދަނީ އިއުތިރާފްވި މީހުންގެ އަތުން ކޮންކޮން މައުލޫމާތުތަކެއްތޯ ލިބެނީ،" އޭނާ ވިދާޅުވި އެވެ.
"އަދަދު" އަށް އެނގިފައިވާ ގޮތުގައި ނަޝީދު އަވަހާރަކޮށްލުމަށް ބޮން ގޮއްވާލުމުގައި ހަރަކާތްތެރިވި ސެލްގެ އިސް ލީޑަރުންގެ ތެރޭގައި ހިމެނޭ ކަމުގެ ތުހުމަތުވާ އިސްހާގުގެ އަމުރަށް ކަމަށް މައްސަލައިގެ ތުހްމަތުގައި ހައްޔަރުކޮށްފައިވާ އަހްމަދު އަދުހަމް ވަނީ އިއުތިރާފުވެފަ އެވެ.
އެ މައްސަލައިގައި މިހާރު ހައްޔަރުގައި ޖުމްލަ 10 މީހަކު ތިބި ކަމަށް ފުލުހުން މިރޭ ވަނީ ބުނެފަ އެވެ. އަދި އެމީހުން ތިބީ ޖާނުންފިދާވެގެން ނަމަވެސް ނަޝީދު އަވަހާރަކޮށްލަން ތައްޔާރަށް ކަމަށް ފުލުހުން ބުންޏެވެ.
ނަޝީދު އަވަހާރަކޮށްލަން މިދިޔަ ރޯދަ މަހު ދިން ހަމަލާއަށްފަހު އެމަނިކުފާނުގެ ފުރާނަފުޅު ސަލާމަތް ކުރުމަށް އޭޑީކޭގެ ޑޮކްޓަރުން ނަޝީދުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހެދި އެވެ. ބޮމުގެ ތެރެއަށް އަޅާފައި އޮތް 10 ރޭޒާ ފުއް އެމަނިކުފާނުގެ ހަށިކޮޅުން ނެގި އެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ފެނުނެވެ.
