އެސްޓީއޯއިން ރާއްޖެއަށް އެތެރެކުރާ ކާޑާއި، ބޭހާއި، މެޑިކަލް ސާމާނު މާލޭ ބަނދަރަށް ގެނައުމުގެ ބަދަލުގައި ސީދާ އުތުރާއި ދެކުނުގެ ބަނދަރުތަކަށް ގެންދިއުމުގެ މަސައްކަތް ފަށާފައިވާ ކަމަށް އެ ކުންފުނީގެ މެނޭޖިން ޑިރެކްޓަރު ހުސެން އަމްރު ވިދާޅުވެއްޖެ އެވެ.
މިހާރު ވެސް އެސްޓީއޯއިން އަންނަނީ ކޮންމެވެސް ވަރަކަށް ދެކުނުން، އައްޑޫ ސިޓީ ހިތަދޫގެ ބަނދަރަށް ބައެއް ކަހަލަ ސާމާނު ފޮނުވަމުންނެވެ. ނަމަވެސް އެ ކުންފުނީގެ ވިސްނުން ހުރީ މި މަސައްކަތް އިތުރަށް ފުޅާކޮށް އެ ކުންފުނިން ގެންނަ މުދާ ޑައިރެކްޓްކޮށް އައްޑޫ ސިޓީ އަދި ކުޅުދުއްފުށި ސިޓީގެ ބަނދަރަށް ބޭލޭނެ ގޮތް ހެދުމަށެވެ.
މި މަސައްކަތް ގޮސްފައިވާ ހިސާބާ ގުޅިގެން އަމްރު "އަދަދު"އަށް ވިދާޅުވީ، މިހާރު އެ ކުންފުނިން ކުރަމުން ދަނީ މި ދެ ރަށުގައި ހުރި އެސްޓީއޯގެ ވެއާހައުސްތައް ބޮޑުކުރުމުގެ މަސައްކަތް ކަމަށެވެ. އަދި އައްޑޫއަށް އެސްޓީއޯގެ މުދާ އެތެރެކުރަން ވާން ޖެހޭ ތައްޔާރީތައް މިހާރު ގާތްގަނޑަކަށް ނިމިފައިވާ ކަމަށާއި، ކުރިއަށް މިއޮތް އޮގަސްޓް މަހުގެ ތެރޭގައި އެކަން ފަށާނެ ކަމަށް އޭނާ ވިދާޅުވި އެވެ.
"ދާދި އަވަހަށް އަޅުގަނޑުމެންނަށް އައްޑޫގައި އެކަން ފެށޭނެ. މިހާރު އަޅުގަނޑުމެން އެކަމަށް ބޭނުންވާ ސެޓަޕް ހެދިއްޖެ. އަޅުގަނޑު ގަބޫލުކުރަނީ އަންނަ މަހު ހިސާބު އަޅުގަނޑުމެންނަށް ސީދާ، މިހާރު އައްޑޫއަށް ގެންދާ އެއްޗެހީގެ އިތުރުން ކާޑާއި މެޑިކަލް ސާމާނު ޑައިރެކްޓްކޮށް ގެންދަން ފެށޭނެ" އަމްރު ވިދާޅުވި އެވެ.
ރާއްޖޭގެ އުތުރަށާއި ދެކުނަށް ބޭރުން މުދާ ގެންނަން ފެށުމުން މި ސަރަހައްދުތަކަށް އެސްޓީއޯގެ ހިދުމަތްތައް ފުޅާވުމުގެ އިތުރަށް، މުދަލުގެ އަގު ދަށްކުރަން ފަހިވާނެ ކަމަށް އެ ކުންފުނިން ބުނެ އެވެ. އަދި އޭރުން މިހާރަށް ވުރެ ފަސޭހައިން އަތޮޅުތެރެއަށް އެސްޓީއޯގެ މުދާ ފޯރުކޮށްދެވޭނެ ކަމަށް ވެސް ބުނެ އެވެ.
