ހުސްވި ހަފުތާގައި ރާއްޖެ އައި ޓޫރިސްޓުންގެ އަދަދު އިތުރުވެ، ދުވާލެއްގެ މައްޗަށް ރާއްޖެ އަންނަ ޓޫރިސްޓުންގެ އަދަދު 4،000 އަށް އުފުލިއްޖެ އެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާ ގޮތުގައި މިދިޔަ ހަފުތާގައި ދުވާލެއްގެ މައްޗަށް އެވަރެޖްކޮށް 4،102 ޓޫރިސްޓުން ވަނީ ރާއްޖެ ޒިޔާރަތްކޮށްފަ އެވެ.
އަދި ކޮވިޑުގެ ހަތަރުވަނަ ރާޅުގެ ސަބަބުން ރާއްޖޭގެ ޓޫރިޒަމަށް އައި ހީނަރުކަމަށް ފަހު އެންމެ ގިނަ އަދަދެެއްގެ ޓޫރިސްޓުން ޒިޔާރަތްކުރީ ވެސް މިދިޔަ ހަފުތާގަ އެވެ.
އޭގެ އިތުރުން ކޮވިޑް ބަލިމަޑުކަމުގެ ތެރޭގައި ދުވާލެއްގެ މައްޗަށް އެންމެ ގިނަ އަދަދެއްގެ ޓޫރިސްޓުން ރާއްޖެ އައީ ވެސް އެ ހަފުތާގަ އެވެ. އެގޮތުން އާދިއްތަ ދުވަހު ރާއްޖެއަށް 4،834 ޓޫރިސްޓުން އައެވެ. މިއީ ކޮވިޑުގެ ކުރިން ދުވާލެއްގެ މައްޗަށް ރާއްޖެ އަންނަ ޓޫރިސްޓުންނާ ދާދި އެއް ހަމަ އަދަދެކެވެ.
ރާއްޖެ އަންނަ ޓޫރިސްޓުން އިތުރުވި މައިގަނޑު ސަބަބަކީ ކޮވިޑުގެ ހާލަތު ގޯސްވުމާ ގުޅިގެން ރާއްޖެއަށް ދަތުރުކުރުން ހުއްޓާލި ބައެއް އެއާލައިންތަކުން އަލުުން ދަތުރުތައް ފެށުމާއި ފްލައިޓްތައް އިތުރުކުރުމާއި ގުޅިގެންނެވެ.
އޭގެ އިތުރުން ދެކުނު އޭޝިއާ ޓޫރިސްޓުންނަށް ރާއްޖެ އާދެވޭ ގޮތަށް ހުޅުވާލުމާއި ކޮވިޑާ ގުޅިގެން އަޅާފައިވާ ބައެއް ފިޔަވަޅުތަކަށް ލުއި ދިނުން ވެސް ޓޫރިސްޓުން އިތުރުވަމުން އަންނަ ސަބަބުތަކުގެ ތެރޭގައި ހިމެނެ އެވެ.
ޖުމްލަ ޓޫރިސްޓުންގެ އަދަދަށް ބަލާއިރު އަހަރުގެ މިހާތަނަށް ރާއްޖެއަށް 579,744 ޓޫރިސްޓުން ޒިޔާރަތްކޮށްފި އެވެ. އެއާއެކު ހުސްވި އަހަރު ރާއްޖެ ޒިޔާރަތްކުރި ޖުމްލަ ފަތުރުވެރިންގެ އަދަދު މިއަހަރުގެ މިހާތަނަށް ވަނީ ހުރަސްކޮށްފަ އެވެ.
މިހާރު ރާއްޖޭގެ ޓޫރިޒަމް ޖަހާފައިވާ މިސްރާބަށް ބަލާއިރު، މި އަހަރުގެ ތެރޭގައި އެއް މިލިއަން ފަތުރުވެރިން ގެނެވޭނެ ކަމުގެ ޔަގީންކަން ވަނީ އިތުރުވެފަ އެވެ. އަދި ކުރިއަށް އޮތް ދުވަސްތަކުގެ ތެރޭގައި ދެކުނު އޭޝިއާއިންނާއި އިރުމަތީ ޔޫރަޕުން އަންނަ ޓޫރިސްޓުންގެ އަދަދު ވެސް އިތުރަށް ރަނގަޅުވާނެ ކަމަށް ވަނީ ލަފާކޮށްފަ އެވެ.
ޓޫރިޒަމް މިނިސްޓްރީން އަންނަނީ މިހާރު ރާއްޖެ އަންނަ އަދަދުުތަކަށް ބަލައި، މި އަހަރުގެ އެރައިވަލް ހިސާބުތައް މުރާޖައާ ކުރުމުގެ މަސައްކަތް ވެސް ކުރަމުންނެވެ.
ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެފައިވާ ގޮތުގައި ކުރިއަށް އޮތް ދުވަސްތަކުގެ ތެރޭގައި ރާއްޖޭގެ ޓޫރިޒަމްގެ ހާލަތު ދައްކަނީ ރަނގަޅަށެވެ.
އެކަމަކު މިގޮތަށް ހާލަތު ދެމެހެއްޓުމަކީ މުހިއްމު ކަމެއްގެ ގޮތުގައި ފާހަގަކުރައްވައި، އޭނާ ވަނީ ކޮވިޑާ ގުޅިގެން އަޅާފައިވާ ފިޔަވަޅުތަކާއި އެންގުންތަކަށް ތަބާވުމަށް އާންމުންނަށާއި ޓޫރިޒަމް ދާއިރާގެ ވިޔަފާރިތަކަށް އިލްތިމާސްކޮށްފަ އެވެ.
