ރަށްރަށުގެ ޕޮލިސް ސްޓޭޝަންތަކާއި ޕޮލިސް ޕޯސްޓްތައް ހިމެނޭ ގޮތުން ފުލުހުންގެ މުއައްސަސާއަށް ބޭނުންވާ އުމްރާނީ ތަރައްގީގެ ވަސީލަތްތައް ގާއިމްކުރުމުގެ އެންމެ ބިޔަ މަޝްރޫއު އިންޑިއާގެ ކުންފުންޏެއް ކަމަށްވާ އޭބީއެލް އިންދިރާ ޕްރޮޖެކްޓްސްއާ މިއަދު ހަވާލުކޮށްފި އެވެ.
ފުލުހުންނާއި އެ ކުންފުންޏާ ދެމެދު މި މަޝްރޫއުގައި ސޮއިކުރީ 48 މިލިއަން ޑޮލަރު (740 މިލިއަން ރުފިޔާ) އަށެވެ.
މިއީ, އިންޑިއަން އެގްޒިމް ބޭންކާއި ދިވެހި ސަރުކާރާ ދެމެދު ވާ ލޯން އެއްބަސްވުމުގެ ދަށުން ހިންގާ މަޝްރޫއެކެވެ. އެގްޒިމް ބޭންކުން 85 ޕަސެންޓް ފައިނޭންސްކުރާއިރު ސަރުކާރުން ހަމަޖައްސާނީ 15 ޕަސެންޓެވެ.
ބީލަމަށް ނުލައި މި މަޝްރޫއު ކުރިއަށް ގެންދަން ނިންމީ ޕްރޮޕޯސަލް ހުށަހަޅައިގެންނެވެ.
"މި މަޝްރޫއު ހިންގުމަށް ދާ ހަރަދާ ގުޅޭގޮތުން ދިވެހި ފުލުހުންގެ ހިދުމަތުން ކުރިއަށް ގެންދިޔަ އެސެސްމަންޓަށް ބަލާއިރު، މިހާތަނަށް ކުރިއަށް ގެންގޮސްފައިވާ ޕީއެސްއައިޕީގެ ދަށުން ހިންގާފައިވާ އިންފްރާސްޓްރަކްޗާ މަޝްރޫއުތަކަށް ވުރެ މި މަޝްރޫއަށް ކުރަން ޖެހޭ ހަރަދު ނިސްބަތުން ކުޑަ އެވެ," ފުލުހުންގެ ވެބްސައިޓުގައި ބުނެފައިވެ އެވެ.
ފުލުހުން ބުނި ގޮތުގައި ބައެއް ތަންތަން މަރާމާތުކުރުން ވެސް ހިމަނައިގެން އެއްބަސްވުމުގެ ދަށުން ޖުމްލަ 61 އިމާރާތެއްގެ މަސައްކަތް ކުރިއަށް ގެންދާނެ އެވެ. އޭގެތެރޭގައި 23 ޕޮލިސް ސްޓޭޝަނާއި 21 ޕޮލިސް ޕޯސްޓް އަދި އަށް އަތޮޅު ޕޮލިސް ސްޓޭޝަނާއި މާލޭގައި އިމާރާތްކުރާ ޕޮލިސް ސްޓޭޝަނަކާއި ހުޅުމާލެ ފޭސް 2 ގައި ޕޮލިސް ސްޓޭޝަނެއްގެ އިތުރުން ހަތަރު އެކޮމޮޑޭޝަން އިމާރާތް ހިމެނެ އެވެ.
ދޫނިދޫ ކަސްޓޯޑިިއަލް ފެސިލިޓީ އާއި އެތަނުގައި މިހާރު ވެސް ބޭނުންކުރާ ދެ އިމާރާތެއް މަރާމާތު ކުރުން ވެސް އެ ކުންފުނިން ކުރިއަށް ގެންދާނެ އެވެ.
މި ތަންތަނުގެ މަސައްކަތް ދެ އަހަރުގެ ތެރޭގައި ނިންމަން ޖެހެ އެވެ.
ފުލުހުން ބުނީ މި މަޝްރޫއުގެ ސަބަބުން ފުލުހުންގެ ހިދުމަތް ލާމަރުކަޒު ކުރެވި ރައްޔިތުން ބޭނުންވާ ފަދަ ޒަމާނީ ހިދުމަތެއް ދިނުމުގެ މަގުފަހިވެގެންދާނެ އެވެ.
މި އެއްބަސްވުމުގައި ސޮއިކުރަން ބޭއްވި ރަސްމިއްޔާތުގައި, މިއީ މިހާތަނަށް ފުލުހުންގެ މުއައްސަސާގައި ހިންގާ އުމްރާނީ ތަރައްގީގެ އެންމެ ބޮޑު މަޝްރޫއުކަން ފާހަގަކުރައްވައި ޕޮލިސް ކޮމިޝަނަރު މުހައްމަދު ހަމީދު ވިދާޅުވީ ފުލުހުންގެ ހިދުމަތް ކުރިއަރުވަން އެ ވަސީލަތްތައް ކޮންމެހެން ބޭނުން ކަމަށެވެ.
އިންޑިއާގެ ކުންފުނިން ވަނީ އެއްބަސްވި މުއްދަތުގައި އިމާރާތްތައް ނިންމައި ހަވާލުކުރާނެ ކަމުގެ ޔަގީންކަން ދީފަ އެވެ.
