ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލި މައްސަލައިގައި ހައްޔަރުކޮށްފައިވާ ލ. ގަން، ދުންފިނިއުފާ، އަހްމަދު ފާތިހު ވަޒީފާއަދާކުރީ ފުލުހުންގެ ޓެރަރިޒަމް މައްސަލަތަކާ ގުޅޭ އިންޓެލިޖެންސް ޔުނިޓުގައި ނޫން ކަމަށް ހޯމް މިނިސްޓަރު އިމްރާން އަބްދުالله މިދިޔަ އަންގާރަ ދުވަހު ވިދާޅުވެއްޖެ އެވެ.
ނަޝީދަށް ހަމަލާދިން ކަމަށް ތުހުމަތުވާ މީހުންގެ ތެރޭގައި ހިމެނޭ ފާތިހް ހައްޔަރުކުރީ ބ. ދަރަވަންދޫންނެވެ. އޭނާ ފުލުހުންގެ އިންޓެލިޖެންސްގައި އުޅުނުކަން ފަޅާއެރީ ހައްޔަރުކުރުމުންނެވެ.
ހަމަލާގެ ފަހުން ދަރަވަންދުއަށް ފާތިހު ދިޔައީ ކައިވެންޏަށް ކަމަށް އަނބިމީހާގެ އާއިލާ އިން ބުނެ އެވެ. އޭނާ ހައްޔަރުކޮށްގެން ގެނައީ ކައިވެނިކުރި ހަފުތާގަ އެވެ.
ބޮމުގެ ހަމަލާގައި ފާތިހުގެ ދައުރު ފުލުހުން މިހާތަނަށް އާއްމެއް ނުކުރެ އެވެ. އެކަމަކު އޭނާ ފުލުހުންގެ އިންޓެލިޖެންސްގައި މަސައްކަތް ކުރި ކަން ކަށަވަރުކޮށްދިނެވެ.
"އަދަދު" އަށް ދެއްވި ހާއްސަ އިންޓަވިއުއެއްގައި ވާހަކަ ދައްކަވަމުން މިނިސްޓަރު އިމްރާން ވިދާޅުވީ މިދިޔަ ފެބުރުއަރީ މަހު ވަޒީފާ އިން ވަކިކުރި ފާތިހު އުޅުނީ ފުލުހުންގެ އިންޓެލިޖެންސް ޑިޕާޓްމަންޓުގައި ކަމަށާއި ނަމަވެސް އޭނާ މަސައްކަތް ކުރީ ޓެރަރިޒަމާ ގުޅޭ އިންޓެލިޖެންސްތަކުގައި ނޫން ކަމަށެވެ. އޭނާ ވަކިކުރީ މަސައްކަތަށް ފަރުވާކުޑަކުރުން ފަދަ ރިޕޯޓްތަކެއް ލިބުމުން ކަމަށް ވެސް އިމްރާން ވިދާޅުވި އެވެ.
އިމްރާން ވިދާޅުވި ގޮތުގައި ފާތިހަށް އަންނަމުން ދިޔަ ބަދަލުތައް އޮތީ އެންމެ އެކަށީގެންވާ ވަރަށް ފުލުހުންނަށް ވަޒަން ނުކުރެވި އެވެ. ހަރުކަށި ފިކުރާ ގުޅޭ އެ ބަދަލުތައް އޭނާ އަށް އައީ ވަޒީފާ އިން ވަކިވި ފަހުން ނުވަތަ އޭގެ ކުރިން ކަމަށްވުން ވެސް އެކަށީގެންވާ ކަމަށް އިމްރާން ވިދާޅުވި އެވެ.
"އެއީ އަޅުގަނޑު ހިތުން ތަހުގީގުގެ މި މަރުހަލާގެ ތެރޭގައި އިތުރަށް އަޅުގަނޑުމެން ބަލަމުން ގެންދާނެ ކަމެއް. ނުވަތަ ތަހުގީގު ފުރިހަމަކުރަމުންދާ އިރު ކުރާނެ ކަމެއް," އިމްރާން ވިދާޅުވި އެވެ.
އިސްލާމްދީނުގެ ނަމުގައި ހައްދުފަހަނައެޅި ފިކުރަށް ނުވަތަ އެފަދަ މީހުން ހިންގާ ހަރަކާތްތަކަށް ވާގިދޭ ބަޔަކު ފުލުހުންގެ އިންޓެލިޖެންސްގައި ނުތިބޭނެ ކަމުގެ ކިހާވަރެއްގެ ޔަގީންކަމެއް އޮތްތޯ ސުވާލުކުރުމުން މިނިސްޓަރު ވިދާޅުވީ މި ސަރުކާރުގައި އެއީ އިސްކަމެއް ދީގެން މަސައްކަތްތަކެއް ކުރަމުން އައި ކަމެއް ކަމަށެވެ. ފުލުހުންނާއި ސިފައިންނާއި އިމިގްރޭޝަނާއި ކަސްޓަމްސް ފަދަ މުހިއްމު އިދާރާތަކުގައި ތިބޭ މީހުންގެ ބެކްގްރައުންޑް ރަނގަޅަށް ޗެކްކުރަން ޖެހޭނެ ކަމަށް މިނިސްޓަރު ވެސް ގަބޫލުކުރައްވަ އެވެ.
"އެފަދަ ޕްރޮސެސްއެއް ފުރިހަމަކުރުމުގެ މަސައްކަތް މިހާރު ވެސް އަޅުގަނޑުމެން ކުރިއަށް އެބަގެންދަން،" އިމްރާން ވިދާޅުވި އެވެ.
އެ މަސައްކަތް ދާއިމީ ގޮތެއްގައި ކުރިއަށްދާނެ ކަމަށް ވެސް އިމްރާން ވިދާޅުވި އެވެ.
"އަޅުގަނޑު ޔަގީންކުރާ ކަމަކީ ފުލުހުންގެ ތެރޭގައި ވެސް އަދި ސިފައިންގެ ތެރޭގައި ވެސް ހަރުކަށި ފިކުރަށް ތާއީދުކުރާ އަދި އެކަމަށް ހިތްވަރުދޭ އެއްވެސް ފަރާތެއް ވާ ނަމަ އެ ދެ މުއައްސަސާގައި މަސައްކަތް ކުރުމުގެ ޖާގަ ދިނުމަކީ މި ސަރުކާރުން ކުރާނެ ކަމެއް ނޫން," މިނިސްޓަރު ވިދާޅުވި އެވެ.
"ނޭނގި ކަމެއް ހިނގާފައި އޮތުމަކީ ކަންކަން އިތުރަށް ރަނގަޅަށް ބަލައި ވިސްނުންތެރިކަމާ އެކު ރަނގަޅުކުރަން ޖެހޭނެ ކަމެއް."
އިމްރާން ވިދާޅުވި ގޮތުގައި އެކަމާ ގުޅޭ ގޮތުން މުއައްސަސާތަކުގެ ބައްދަލުވުންތަކުގައި ވާހަކަ ދައްކަ އެވެ. ކުއްލިއަކަށް މީހަކަށް އަންނަ ބަދަލެއްގެ ސަބަބުން ހިނގާ ކަމަކާ ގުޅުވައި، އެއީ އެ މުއައްސަސާއަކުން އެފަދަ މީހުންނަށް ޖާގަދެނީ ކަމަށް ބުނުމަކީ އެންމެ ޒިންމާދާރު ގޮތެއް ކަމަށް ދެކެވަޑައިނުގަންނަވާ ކަމަށް ވެސް އޭނާ ވިދާޅުވި އެވެ.
"އެފަދަ މީހުންނަކަށް މުއައްސަސާތަކުގެ ތެރެއިން ޖާގައެއް ނޯންނާނެ," އިމްރާން ވިދާޅުވި އެވެ.
މެއި މަހުގެ ހަ ވަނަ ދުވަހުގެ ރޭ ރައީސް ނަޝީދު ކެނެރީގެއިން ހިންގަވާފައި، މަޖީދީ މަގުގައި އޮތް ކާރުކޮޅާ ހަމައަށް ވަޑައިގަތުމާ އެކު ބޮމެއް ގޮއްވާލި މައްސަލައިގައި ނުވަ މީހަކު ހައްޔަރުކުރި އެވެ. އޭގެތެރޭގައި އެކަމުގައި އަމަލީ ގޮތުން އުޅުނު ކަމަށް ތުހުމަތުކުރެވޭ އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 ގެ އިތުރުން ފާތިހް ހިމެނެ އެވެ.
ހަމަލާގައި ތުހުމަތުކުރެވޭ މީހުންގެ މައްޗަށް ވަރަށް އަވަހަށް ދައުވާކުރަން ފޮނުވޭނެ ކަމަށް ހޯމް މިނިސްޓަރު ވަނީ ވިދާޅުވެފަ އެވެ.
