ފުލުހުންނަށް ބޭނުންވާ މުހިންމު ހަތަރު ގަވާއިދެއް ހަދައި މިދިޔަ ހަފްތާގެ ތެރޭގައި ހޯމް މިނިސްޓްރީގެ ފަރާތުން އެ ގަވާއިދުތައް ގެޒެޓުކޮށް އަމަލު ކުރަން ފަށައިފި އެވެ.
ފުލުހުންގެ ގާނޫނުން ބާރު ލިބިގެން ހޯމް މިނިސްޓްރީގެ ފަރާތުން ހެދި ހަތަރު ގަވާއިދަކީ ފުލުހުންނަށް ތަމްރީނު ދިނުމާ ބެހޭ ގަވާއިދަކާއި ލިޔެކިޔުން ކްލެސިފައި ކުރުމުގެ ގަވާއިދަކާއި ފުލުހުންގެ ހިދުމަތަށް ބޭނުންވާ ވަސީލަތްތައް ދޫކުރުމާ ބެހޭ ގަވާއިދަކާއި ޗުއްޓީ ނެގުމާއި ސަލާމް ބުނުމުގެ ގަވާއިދެކެވެ.
ފުލުހުންނަށް ތަމްރީނު ދިނުމާ ބެހޭ ގަވާއިދުގައިވާ ގޮތުން ފުލުހުންނަށް ތައުލީމާއި ތަމްރީނު ދޭ މަރުކަޒުތަކެއް ރާއްޖޭގެ އެކި ހިސާބުތަކުގައި ގާއިމް ކުރަންޖެހެ އެވެ. އަދި އެ މަރުކަޒުތަކުގައި ތައުލީމު އުނގަންނައިދޭ މީހުންގެ ޝަރުތުތަކާއި ތަމްރީނު ލިބޭ މީހުންގެ ވާޖިބުތައް ވެސް ބަޔާންކޮށްފައިވެ އެވެ.
ރަސްމީ ލިޔުންތައް ކްލެސިފައި ކުރުމުގެ ގަވާއިދުގައި ރަސްމީ ލިޔުންތައް ކަނޑައެޅުމާއި ލިޔުންތައް ގިންތި ކުރުމާއި ސިއްރު ތައްގަނޑު ޖެހުމާއި އާންމު ކުރުން މަނާ ލިޔުންތައް ގެންގުޅޭނެ ގޮތް ބަޔާންކޮށްފައިވެ އެވެ.
ފުލުހުންގެ ހިދުމަތަށް ބޭނުންވާ ތަކެތި ދޫކުރުމާ ބެހޭ ގަވާއިދުގައި އިންވެންޓްރީ ބެލެހެއްޓުމާއި ދޫކުރާ ތަކެތި ޒިންމާދާރުކޮށް ބެލެހެއްޓުމާއި އިންޝުއާ ކުރުން ފަދަ މުހިންމު އުސޫލުތައް ބަޔާންކޮށްފައި ހުއްޓެވެ.
ފުލުހުންނާ ގުޅޭ މުހިންމު ގަވާއިދުތަކެއް ހަދާފައި މި ވަނީ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މެއި 6، ވަނަ ދުވަހު މާލޭގައި ބޮން ގޮއްވި މައްސަލަ ތަހުގީގު ކުރުމަށްފަހު ރައްޔިތުންގެ މަޖިލީހުން މިމަހުގެ އަށް ވަނަ ދުވަހު އިންކުއަރީ ރިޕޯޓެއް ނެރުނުތާ ހަފްތާއެއްގެ ތެރޭގަ އެވެ.
ނަޝީދަށް ސެކިއުރިޓީ ދިނުމުގައި ހުރި މައްސަަތައް ދިރާސާ ކުރުމުގެ ތެރޭގައި، ފުލުހުން އަދި ހާއްސަކޮށް މޯލްޑިވްސް ނެޝަނަލް ޑިފެންސްގެ ފޯސްގެ އެތެރޭގެ ހިންގުމުގައި ހުރި ވަރަށް ގިނަ މައްސަލަތައް އިންކުއަރީ ރިޕޯޓުން ފެންމަތި ކުރި އެވެ.
ނަޝީދު އަވަހާރަކޮށްލަން މިދިޔަ ރޯދަ މަހު ދިން ހަމަލާއަށް ފަހު އެމަނިކުފާނުގެ ފުރާނަފުޅު ސަލާމަތް ކުރުމަށް އޭޑީކޭގެ ޑޮކްޓަރުން ނަޝީދުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހެދި އެވެ. ބޮމުގެ ތެރެއަށް އަޅާފައި އޮތް 10 ބެއަރިން ބޯލްސް އެމަނިކުފާނުގެ ހަށިކޮޅުން ނެގި އެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ފެނުނެވެ.
ބޮން ގޮއްވާލި މައްސަލައިގައި މިހާތަނަށް ފުލުހުން ވަނީ ހަތަރު މީހަކު ހައްޔަރުކޮށްފަ އެވެ. އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އަދި ދަރަވަންދޫއިން ލ.ގަން، ދުންފިނި އުފާ، އަހުމަދު ފާތިހު، 23، އެވެ.
އޭގެ ތެރެއިން އަދުހަމަކީ ބޮން ގޮއްވާލި ކަމަށް ތުހުމަތު ކުރެވޭ މީހާ އެވެ. ތަހުމީނަކީ ސައިކަލުގެ ވެރި މީހާ އެވެ. ދެން ތިބި މީހުން ހަމަލާއާ ގުޅެނީ ކޮން ގޮތަކުންކަން ފުލުހުން އަދި ހާމަކޮށްފައެއްނުވެ އެވެ.
