މިދިޔަ ސީޒަނުގައި ސުޕަ ޔުނައިޓެޑް ސްޕޯޓްސް (ސަސް)ގެ ގޯލު ބެލެހެއްޓި އުޒްބެކިސްތާންގެ ގޯލްކީޕަރު މިރްޒޮހިދު މަމަކްތޯނޯފް ރާއްޖޭގެ ޗެމްޕިއަން މާޒިޔާ އަށް ބަދަލުވެއްޖެ އެވެ.
މާޒިޔާ އިން މިރްޒޮހިދު ގެނައީ ކުރިއަށް އޮތް އޭއެފްސީ ކަޕާއި އަންނަ ސީޒަނާ އެއްކޮށެވެ.
މިދިޔަ ސީޒަނުގައި ލީގުގައި ސަސް އިން ކުޅުނު ހުރިހާ މެޗެއްގައި ވެސް އެ ޓީމުގެ ގޯލު ބެލެހެއްޓީ މިރްޒޮހިދު އެވެ. އުޒްބެކިސްތާންގެ ފުރަތަމަ ޑިވިޝަނުގެ ނަވްބަހޯރާއި ދެ ވަނަ ޑިވިޝަނުގެ ޝުރްތާން ގުޒާރަށް ކުޅުނު އުމުރުން 27 އަހަރުގެ މިރްޒޮހިދު ވަނީ މިދިޔަ ފަހަރު ދިވެހި ލީގުގައި މާޒިޔާއާ ލަނޑެއް ނުޖެހި އެއްވަރުވި މެޗުގައި މޮޅު ކުޅުމެއް ދައްކައިފަ އެވެ.
މިދިޔަ ސީޒަނުގައި މާޒިޔާގެ ގޯލު އެންމެ ފުރަތަމަ ބެލެހެއްޓީ ސާބިއާގެ ގޯލްކީޕަރު ނިކޮލަ ވުޔަަނަކް އެވެ. ނިކޮލަ ފޮނުވާލުމަށް ފަހު ކީޕަރު ހުސެއިން ޝަރީފް (ހުސެން) މާޒިޔާ ބާކީ މެޗުތަކުގައި އެ ޓީމުގެ ގޯލު ބަލަހައްޓައިފަ އެވެ. ސީޒަންގެ މެދު ޓްރާންސްފާ މާކެޓްގެ ތެރެއިން މާޒިޔާ އިން ވަނީ ކުރިން ވެސް އެ ޓީމަށް ކުޅުނު ސީރިއާގެ ގޯލްކީޕަރު މަހުމޫދު އަލް ޔޫސުފް ސޮއިކޮށްފަ އެވެ. އެކަމަކު، ކަކުލަށް ދިމާވެފައި ހުރި އަނިޔާގެ މައްސަލައެއްގެ ސަބަބުން މަހުމޫދު ޖެހުނީ ފޮނުވާލާށެވެ.
ދިވެހި ޕްރިމިއާ ލީގުގެ މެޗެއްގެ ތެރެއިން ކީޕަރު މިރްޒޮހިދު: ކުރިއަށް އޮތް ސީޒަނުގައި މާޒިޔާގެ ގޯލުން ފެންނާނީ މިރްޒޮހިދު.
މީގެ ކުރިން މާޒިޔާގެ ގޯލު ބަލަހައްޓާފައިވާ ބިދޭސީ ކީޕަރުންގެ ތެރޭގައި އިޓަލީގެ މައުރޯ ބޮއެކިއޯ، ކިރްގިސްތާންގެ ޕަވެލް މަޓިއަޝް އަދި އަފްގާނިސްތާންގެ އޮވޭސް އަޒީޒީ ހިމެނެ އެވެ. އަޒީޒީ އަކީ އަފްގާނިސްތާން ގައުމީ ޓީމުގެ ކީޕަރެކެވެ. ޕަވެލް ވަނީ ކިރްގިސްތާން ގައުމީ ޓީމަށް ކުޅެފަ އެވެ. މިދިޔަ ސީޒަނުގައި މާޒިޔާ އަށް ދެ ވަނަ ފަހަރަށް ގެނައި މަހުމޫދަކީ ސީރިއާ ގައުމީ ޓީމުގައި ވެސް ހިމެނުނު ކީޕަރެކެވެ.
މާޒިޔާ އަންނަ މަހު ކުޅޭ އޭއެފްސީ ކަޕްގެ ދެކުނު އޭޝިއާގެ ގްރޫޕް ސްޓޭޖުގައި ކުޅޭނެ އެވެ. މާޒިޔާގެ އިތުރުން މި ވަގުތު ގްރޫޕް ސްޓޭޖުގައި އޮތީ އިންޑިއާގެ އޭޓީކޭ މޯހަން ބަގާން އާއި ބަންގްލަދޭޝްގެ ޗެމްޕިއަން ބަޝުންދުރާ ކިންގްސް އެވެ. މި ގްރޫޕްގެ ފަހު ޖާގަ ލިބޭނީ ރާއްޖޭގެ ކްލަބް އީގަލްސް އާއި އިންޑިއާގެ ބެންގަލޫރު އެފްސީ ކުޅެގެން މޮޅުވާ ޓީމަކަށެވެ.
މިހާރު އޭއެފްސީން ނިންމާފައިވާ ތާރީހުތަކަކީ އަންނަ މަހުގެ 15 ވަނަ ދުވަހު އީގަލްސް އާއި ބެންގަލޫރު ބައްދަލުކުރާ ޕްލޭއޮފް މެޗު ކުޅޭށެވެ. އަދި ގްރޫޕް ސްޓޭޖުގެ މެޗުތައް އަންނަ މަހު 18 އިން 24 އަށް ކުރިއަށް ގެންދާށެވެ. މެޗުތައް ހޯސްޓްކުރަން ރާއްޖެ އާއި ބަންގްލަދޭޝް ވަނީ ބިޑްކޮށްފަ އެވެ.
