ރާއްޖެއަށް ބިދޭސީން ގެންނަ ފަރާތްތަކުން ހަދަން ޖެހޭ "ސެޓްފިކެޓް އިން އެމްޕްލޯއިމަންޓް އިންޓަމީޑިއަރީސް ކޯސް" ފުރިހަމަކޮން ސަނަދު ހޯދުމުގެ ފުރުސަތު، އިކޮނޮމިކް މިނިސްޓްރީންނާއި ގައުމީ ޔުނިވާސިޓީން ހުޅުވާލައިފި އެވެ.
މި ކޯހުގެ މަގުސަދަކީ ރާއްޖޭގައި ވަޒީފާ އަދާކުރަން ބިދޭސީން ގެނައުމާއި އެ ބިދޭސީންނާ ގުޅޭ ކަންތައްތައް ބެހެއްޓުމުގައި ރިޕްރެޒެންޓޭޓިވްސްގެ ގޮތުގައި ހަރަކާތްތެރިވާ ފަރާތްތަކަށް، ކަމާ ގުޅުންހުރި ގާނޫނުތަކާއި ގަވާއިދުތައް ކިޔައިދިނުމެވެ. އަދި އެފަރާތްތަށް ކުރުން ލާޒިމްކުރާ ކަންތައްތަކާއި ޒިންމާތައް އަންގާދިނުމެވެ. މީގެ އިތުރުން މި ކޯހުގައި، މަސައްކަތު މާހައުލުގައި ބިދޭސީ މަސައްކަތްތެރިންނާ މެދު އަމަލު ކުރެވޭނެ ގޮތްތަކާއި ލިބިދޭ ހައްގުތަކަށް އަހުލުވެރި ކުރަން ވަނީ ނިންމައިފަ އެވެ.
ކޯހުގެ މުއްދަތަކީ ހަ ހަފްތާ އެވެ. މި ކޯހުގެ ފުރަތަމަ ބެޗް ކުރިޔަށް ގެންދިޔުމަށް ހަމަޖެހިފައިވަނީ މިމަހާއި އަންނަ މަހު އެވެ. މި ކޯހުގައި ބައިވެރިވުމަށް 600 ރުފިޔާ އަދި އެގްޒާމް ފީގެ ގޮތުގައި 200 ރުފިޔާ ނެގުމަށް ވަނީ ހަމަޖެހިފަ އެވެ.
އެކްސްޕޯޓް އޮންލައިން ސިސްޓަމްގައި ރަޖިސްޓްރީގެ ސިސްޓަމް މެދުވެރިކޮށް ހިދުމަތްތަކަށް އެދޭ ރިޕްރެޒެންޓޭޓިވްސްގެ ތެރެއިން 10 ބިދޭސީންނަށްވުރެ ގިނަ ބިދޭސީންގެ ކަންކަން ބަލަހައްޓާ ހުރިހާ ރިޕްރެޒެންޓޭޓިވްސްއަށް، އަންނަ އަހަރުގެ ޖެނުއަރީ ތިން ވަނަ ދުވަހުން ފެށިގެން ހިދުމަތް ދެވޭނީ އެ ކޯސް ފުރިހަމަ ކޮށްފައިވާނަމަ އެވެ.
ކޯހަށް ޝައުގުވެރިވާ މީހުން ގައުމީ ޔުނިވާސިޓީއަށް ހުށަހަޅައިގެން ކުރިއަށް ދިއުމަށް އިކޮނޮމިކް މިނިސްޓްރީން އެދެ އެވެ.
