ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ގިނަ ދުވަސްތަކެއްވަންދެން ކެބިނެޓްގައި މަސައްކަތް ކުރެއްވި އަބްދުﷲ ކަމާލުއްދީން، އަމިއްލަ ސިޔާސީ ޕާޓީއެއް އުފައްދަވަން ހުށަހެޅުއްވި ފޯމު އިލެކްޝަންސް ކޮމިޝަން (އީސީ)އިން ބާތިލުކޮށްފި އެވެ.
ކުރިން ރައްޔިތުންގެ މަޖިލީހުގެ މެންބަރުކަން ވެސް ކުރެއްވި ކަމާލުއްދީން ވަރަށް ފަހަކަށް ޖެހެންދެން ވެސް ހުންނެވީ މައުމޫންގެ އެމްއާރްއެމްގަ އެވެ. އެ ޕާޓީން ވަކިވެވަޑައިގަތީ ގައުމުގައި ހައްލުކުރަން ޖެހޭ ގިނަ ކަންތައްތަކެއް އެބަހުރި ކަމަށް ވިދާޅުވެ، އެ ޕާޓީން ތެރޭން އެކަން ހާސިލުވާނެ ކަމަށް ނުފެންނާތީ އެވެ.
އެމްއާރްއެމްއިން ވަކިވެވަޑައިގެންނެވުމުން، ކަމާލުއްދީންގެ ހިދުމަތަށް މައުމޫން ޝުކުރުއަދާކުރެއްވި އެވެ. އެމްއާރްއެމްގެ ސްލޮޓެއްގައި އެންމެފަހުން ބޭއްވި މަޖިލިސް އިންތިހާބުގައި ފޮނަދޫ ދާއިރާއަށް ވާދަކުރެއްވި ނަމަވެސް، ކާމިޔާބެއް ނުވި އެވެ.
މައުމޫންގެ ވެރިކަން ނިމުމުން، ކަމާލުއްދީން ގުޅިވަޑައިގެންނެވީ ޖުމްހޫރީ ޕާޓީއާ އެވެ. އެ ޕާޓީގެ ނައިބު ލީޑަރެއްގެ ގޮތުގައި ގިނަ ދުވަސްތަކެއްވަންދެން މަސައްކަތް ކުރެއްވި އެވެ. އެ ޕާޓީން ކަމާލުއްދީން ވަކިވެވަޑައިގެންނެވީ ނައިބު ލީޑަރު މަގާމުގެ އިތުރު ދައުރަކަށް ކުރިމަތިލައްވައި، ލިބުނު ނާކާމިޔާބީއާއެކު އެވެ.
"ގައުމީ އެއްބައިވަންތަކަމުގެ ޕާޓީ"ގެ ނަމުގައި ރަޖިސްޓްރީކުރަން ކަމާލުއްދީން ހުށަހެޅުއްވި ފޯމު ބާތިލުކުރަންޖެހުނީ ސިޔާސީ ޕާޓީއެއް އުފެއްދުމަށް އެދި ހުށަހަޅާ މީހެއްގެ ކިބައިގައި ހުންނަން ޖެހޭ ޝަރުތު ފުރިހަމަ ނުވާތީކަމަށް އީސީން މިއަދު ބުންޏެވެ.
އެކަމާ ގުޅޭގޮތުން އީސީގެ ނައިބު ރައީސް އިސްމާއިލް ހަބީބު "އަދަދު"އަށް ވިދާޅުވީ ސިޔާސީ ޕާޓީއެއް އުފައްދަން ހުށަހަޅާ މީހެއް އެހެން ޕާޓީއެއްގެ މެމްބަރެއްގެ ގޮތުގައި ހުރެގެން ނުވާނެ ކަމަށް ބުނެފައިވާ ކަމަށެވެ.
"ފޯމު ހުށަހެޅުއްވިއިރު ކަމާލުއްދީނަކީ އެހެން ޕާޓީއެއްގެ މެމްބަރެއް. އެހެންވެ ފޯމު ބާތިލުކުރަންޖެހުނީ،" ހަބީބް ވިދާޅުވި އެވެ.
އެހެން ޕާޓީއެއްގެ މެމްބަރުކަމުން ވަކިވެވަޑައިގެންނެވުމަށްފަހު، އެ ފޯމު އަލުން ހުށަހެޅުއްވުމުގެ ފުރުސަތު އޮންނާނެކަމަށް ވެސް އޭނާ އިތުރަށް ވިދާޅުވި އެވެ.
ކަމާލުއްދީން އާ ސިޔާސީ ޕާޓީއެއް އުފައްދަވަން މަސައްކަތް ފެއްޓެވިއިރު، ދަނގެތީ ދާއިރާގެ މެންބަރު މުހައްމަދު ނާޒިމް އިސްވެ ހުންނަވައި އާ ސިޔާސީ ޕާޓީއެއް އުފެއްދެވުމުގެ މަސައްކަތް ވެސް ވަނީ ފައްޓަވާފަ އެވެ.
އާ ދެ ޕާޓީ އުފެއްދުމުގެ މަސައްކަތް ކުރަމުން އަންނައިރު ޕާޓީތައް އުފެއްދުމަށް އިލެކްޝަން ކޮމިޝަނުން މިފަހުން ވަނީ ކޮވިޑާ ގުޅިގެން ލުޔެއް ދީފަ އެވެ.
އެގޮތުން ސިޔާސީ ޕާޓީއެއް އުފައްދަން ހުއްދަދޭތާ 90 ދުވަހުގެ ތެރޭ 3000 މެންބަރުން ހަމަކޮށް އިލެކްޝަން ކޮމިޝަނަށް ހުށަހަޅަން ޖެހެ އެވެ. ނަމަވެސް، މިހާރު ކޮމިޝަނުން ވަނީ އެ މުއްދަތު ސަސްޕެންޑްކޮށް، ސިއްހީ ކުއްލި ނުރައްކަލުގެ ހާލަތު އިއުލާންކޮށްފައި އޮންނައިރު މުއްދަތު ނުގުނާ ގޮތަށް ނިންމާފަ އެވެ.
