ދެކުނު އޭޝިއާއިން ފަތުރުވެރިން ރާއްޖެ އަންނަން ހުޅުވާލިޔަސް އަތޮޅު ތެރޭގެ ގެސްޓް ހައުސްތަކުގައި ނުތިބެވޭނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.
ރާއްޖެ އަށް ދެކުނު އޭޝިއާ އިން މި މަހުގެ 15 އިން ފެށިގެން ފަތުރުވެރިން އައުމުގެ ހުއްދަ މި މަހުގެ ކުރީކޮޅު ވަނީ ދީފަ އެވެ. އޭރު ސަރުކާރުގެ ނިންމުމަކަށް ވެފައި އޮތީ މި މަހުގެ 30 އިން ފެށިގެން ގެސްޓްހައުސްތަކަށް ދިއުމުގެ ފުރުސަތު ވެސް ދޭށެވެ.
އެކަމަކު އެޗްޕީއޭ އިން މިއަދު ބުނީ ގައުމުތަކުން އަންނަ ފަތުރުވެރިން ރާއްޖެއަށް އެތެރެވާން ހުޅުވާލަން ނިންމާފައިވީ ނަމަވެސް ސައުތު އޭޝިއާގެ ގައުމުތަކުން އަންނަ ފަތުރުވެރިންނަށް ރަށްރަށުގެ ގެސްޓްހައުސްތަކަށް ޗެކިން ނުވެވޭނެ ކަމަށެވެ.
ފަތުރުވެރިން ރިސޯޓްތަކަށް ފުރުމަށްޓަކައި މާލޭގައި ޓްރާންސިޓްކުރުމަށް މިނިސްޓްރީ އޮފް ޓޫރިޒަމުން ކަނޑައަޅާ އުސޫލުގެ މަތިން އެ މިނިސްޓްރީން ކަނޑައަޅާފައިވާ ގެސްޓްހައުސްތަކުގައި ތިބޭ ތިބުން އެ އުސޫލުގެ ތެރޭގައި ނުހިމެނޭނެ ކަމަށް އެޗްޕީއޭން ބުނެ އެވެ.
އެޗްޕީއޭން ބުނީ މީހުން ދިރިއުޅޭ ރަށްރަށުގައި ހުންނަ ގެސްޓްހައުސްތައް ސައުތު އޭޝިއާގެ ފަތުރުވެރިންނަށް ހުޅުވާލުމުގައި އަމަލުކުރާނެގޮތްތައް ކަނޑައަޅައި އެކަން މި މަހުގެ 30 ގެ ކުރިން އަންގާނެ ކަމަށެވެ.
އެ ނިންމުން އެޗްޕީއޭން ނިންމާފައިވާއިރު ދެކުނު އޭޝިއާގެ ފަތުރުވެރިންނަށް ރާއްޖެއިން ވިސާ ދޫކުރުން މެދުކަނޑާލީ މިދިޔަ މެއި މަހުގެ 13 ވަނަ ދުވަހު އެވެ.
