ރާއްޖޭގައި މަސައްކަތްކުރުމަށް ފާއިތުވި އަށް އަހަރުގެ ތެރޭގައި ބޭރުގެ އެކި ގައުމުތަކުން 275،000 އަށް ވުރެ ގިނަ މީހުންނަށް ވާކް ޕާމިޓު ދޫކޮށްފައިވާ ކަމަށް އިކޮނޮމިކް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ޖެނުއަރީ 2013 އިން ފެށިގެން މި އަހަރުގެ ޖުލައި މަހުގެ ނުވަ ވަނަ ދުވަހާ ހަމައަށް ރާއްޖޭގައި މަސައްކަތްކުރާ ބިދޭސީންގެ މައުލޫމާތުތަކަށް ބަލާއިރު، އެ މުއްދަތުގެ ތެރޭގައި ޖުމްލަ 413،164 ކޯޓާ އެ މިނިސްޓްރީން ދޫކޮށްފައި ވެ އެވެ.
އެގޮތުން ބަލާއިރު، އެއް އަހަރެއްގެ ތެރޭގައި އެންމެ ގިނަ އަދަދަކަށް ވާކް ޕާމިޓު ދޫކޮށްފައިވަނީ ރިޔާސީ އިންތިހާބު އޮތް 2013 ވަނަ އަހަރާއި 2018 ވަނަ އަހަރެވެ. ދެހާސް ތޭރަ ވަނަ އަހަރު 93،312 ކޯޓާ ދޫކޮށްފައިވާއިރު، 2018 ވަނަ އަހަރުގެ ނޮވެމްބަރު މަހުގެ ކުރިން 11 މަސް ދުވަހުގެ ތެރޭގައި ޖުމްލަ 97،263 ކޯޓާ ދޫކޮށްފައި ވެ އެވެ.
އެ މުއްދަތުގެ ތެރޭގައި ވާކް ޕާމިޓު ދޫކޮށްފައިވާ އެވްރޭޖަށް ބަލާއިރު، ކޮވިޑުގެ ބަލިމަޑުކަމުގެ ދެ އަހަރު އެ އަދަދު ވަނީ ވަރަށް ބޮޑަށް ދަށްވެފަ އެވެ. އެގޮތުން، މިދިޔަ އަހަރު 11،198 ކޯޓާ ދޫކުރިއިރު، މި އަހަރުގެ ޖުލައި 9އަކާ ހަމައަށް ދޫކޮށްފައިވަނީ 8،965 ކޯޓާ އެވެ.
152 ގައުމެއްގެ މީހުން ރާއްޖޭގައި މަސައްކަތް ކުރި
އިކޮނޮމިކް މިނިސްޓްރީން ދޫކޮށްފައިވާ ކޮންމެ ކޯޓާއަކަށް މީހުން ނުގެނައި ނަމަވެސް، އެ މުއްދަތުގެ ތެރޭގައި 276،778 ވޯކު ޕާމިޓު މިނިސްޓްރީން ދޫކޮށްފައި ވެ އެވެ.
ތަފާސްހިސާބުތަކަށް ބަލާއިރު، ދުނިޔޭގައި އޮންނަ ޖުމްލަ 195 ގައުމުގެ ތެރެއިން، ތަފާތު 152 ގައުމެއްގެ ރައްޔިތުންނަށް އެ މުއްދަތުގެ ތެރޭގައި ރާއްޖެއިން ވާކް ޕާމިޓު ވަނީ ދޫކޮށްފަ އެވެ.
އޭގެ ތެރެއިން އެއް ގައުމަކުން އެންމެ ގިނަ މީހުންނަށް ޕާމިޓު ދޫކޮށްފައިވަނީ ބަންގްލަދޭޝް އަށެވެ. އެގޮތުން، އަށް އަހަރުގެ ތެރޭގައި ބަންގްލަދޭޝަށް 123،848 ވާކް ޕާމިޓު ދޫކޮށްފައި ވެ އެވެ.
ދެވަނަ އަށް އެންމެ ގިނައިން ވާކް ޕާމިޓު ދޫކޮށްފައިވަނީ އިންޑިއާގެ މަސައްކަތްތެރިންނަށެވެ. އެގޮތުން، އިންޑިއާއަށް 57،387 ޕާމިޓު ދޫކޮށްފައިވާއިރު، ތިން ވަނައިގައި އޮތް ސްރީލަންކާގެ 34،561 މަސައްކަތްތެރިއަކަށް ވާކް ޕާމިޓު މިނިސްޓްރީން ވަނީ ދޫކޮށްފަ އެވެ.
އެންމެ ގިނައިން ވާކް ޕާމިޓު ދޫކުރި ހަތް ގައުމުގެ ތެރޭގައި ދެން ހިމެނެނީ، ޗައިނާ، ނޭޕާލް، އިންޑޮނީޝިއާގެ އިތުރުން ފިލިޕީންސް އެވެ.
އިކޮނޮމިކް މިނިސްޓްރީގެ ހިސާބުތައް ދައްކާ ގޮތުން، އެ މުއްދަތުގެ ތެރޭގައި ދޫކުރި ވާކް ޕާމިޓުތަކުގެ ތެރެއިން ޖުމްލަ 196،106 ޕާމިޓު ވަނީ ކެންސަލްކޮށްފަ އެވެ. އެއީ ވަޒީފާ އަދާކުރުމުގެ މުއްދަތު ހަމަވެ، އަނބުރާ ގައުމަށް ދިއުމުން ކެންސަލް ކޮށްފައިވާ ޕާމިޓުތައް އެކަންޏެވެ. އޭގެ ތެރޭގައި ވަޒީފާދޭ ފަރާތް ބަދަލުވެ، އަދި މިނިސްޓްރީން ހިންގަން ފެށި ރެގިއުލަރައިޒޭޝަން ޕްރޮގްރާމްގެ ދަށުން ދޫކޮށްފައިވާ ޕާމިޓުތައް ނުހިމެނޭ ކަމަށް ބުނެފައި ވެ އެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީން ގާނޫނުގެ ތެރެއަށް ފެއްތުމުގެ އިތުރުން އެފަދަ މީހުން އަނބުރާ ގައުމަށް ފޮނުވާލުމުގެ ޕްރޮގްރާމެއް ވެސް މިނިސްޓްރީން އިސްވެ ދަނީ ކުރިއަށް ގެންދަމުންނެވެ.
އެގޮތުން، މިދިޔަ އަހަރުގެ މާޗް މަހުން ފެށިގެން ޑިސެމްބަރު މަހާ ހަމައަށް ޖުމްލަ 8،938 މީހަކު އަނބުރާ ގައުމަށް ފޮނުވާލެވިފައިވާ ކަމަށް ހިސާބުތަކުން ދައްކަ އެވެ.
