ސަރުކާރު އޮފީސްތަކުން އިތުރު ގަޑީގެ އެލަވަންސްގެ ގޮތުގައި ކުރާ ހޭދަ އިތުރުވާތީ، އެ އެލަވަންސް ހަރަދުތަކާއި ގުޅޭ ހާއްސަ އޮޑިޓެއް ހަދަން ނިންމައި އެކަންކޮށްދޭނެ ފަރާތެއް ހޯދަން ފިނޭންސް މިނިސްޓްރީން އިއުލާންކޮށްފި އެވެ.
ސަރުކާރުން މި އިއުލާނާއެކު އާންމުކޮށްފައިވާ ޓާމްސް އޮފް ރިފަރެންސްގައި ހުރި މައުލޫމާތަށް ބަލާއިރު، ދައުލަތުގެ ރިކަރަންޓް ހަރަދުގެ ތެރެއިން އެންމެ ބޮޑު ހޭދައެއް ހިނގަނީ މުސާރަ އާއި އިނާޔަތްތައް ދިނުމަށެވެ. މި އިނާޔަތްތަކުގެ ތެރެއިން ވޭތުވެ ދިޔަ އަހަރުތަކުގެ އެންމެ ބޮޑަށް އިތުރުވީ އިތުރު ގަޑީގެ ފައިސާގެ ގޮތުގައި މުވައްޒަފުންނަށް ލިބޭ އޯޓީ އެލަވަންސެވެ.
އެހެން އެލަވަންސްތަކާ ނުބައްދަލު ގޮތަކަށް އޯޓީ ފައިސާ އިތުރުވާން މެދުވެރިވީ ސަބަބުތަކުގެ ތެރޭގައި މިހާރު ހުރި އުސޫލުތަކާއި ގަވާއިދުތަކަށް އަމަލު ނުކުރުމާއި އެކަށީގެންވާ ވަރުގެ މިންގަނޑުތަކެއް ކަނޑައެޅިފައި ނެތުން ފިނޭންސް މިނިސްޓްރީން ފާހަގަކުރި އެވެ.
މި އޮޑިޓްގެ ޒަރިއްޔާއިން ހާސިލުކުރަން ބޭނުންވާ މަގުސަދު ބަޔާންކޮށް ފިނޭންސުން ބުނި ގޮތުގައި، ދެނެގަންނަން ބޭނުންވަނީ އޯޓީ އެލަވަންސް ދިނުމުގައި ސަރުކާރު އޮފީސްތަކުން ހޭދަކޮށްފައިވާ ގޮތްތަކެވެ. އަދި މި މައުލޫމާތުގެ ޒަރިއްޔާއިން އޯޓީ އެލަވަންސް ފައިސާ އާއި ގުޅުންހުރި ގަވާއިދުތަކާއި އުސޫލުތައް ހަރުދަނާ ކުރަން ކުރަންޖެހޭ ކަންކަމުގެ ލަފާ ހޯދުމެވެ.
އެގޮތުން އޮޑިޓް ކުރާ ފަރާތުން އޯޓީ ފައިސާ އާއި ގުޅިގެން މި އޮފީސްތަކުން ގެންގުޅޭ ނިޒާމު ދިރާސާކޮށް، ގަވާއިދުތަކާއި އުސޫލުތަކަށް ބޯލަނބާފައި ވަނީ ކިހާވަރަކަށްތޯ ކަނޑައަޅަން ޖެހެ އެވެ. އަދި މިހާރު އޮންނަ އުސޫލުތަކާއި ގަވާއިދުތަކުގެ ތެރެއިން އޯޓީ ފައިސާއާ ގުޅޭ ކަންކަން ބަލަހައްޓަން ފުދޭތޯ ކަނޑައަޅާ، މި ކަންކަން އިތުރަށް ހަރުދަނާ ކުރަން އަޅަން ޖެހޭ ފިޔަވަޅުތައް ދެނެގަންނެ ޖެހެ އެވެ.
އިތުރު ގަޑީގެ ފައިސާއާ ގުޅޭ އޮޑިޓުގެ ތެރެއިން ކުރެވޭ މުހިއްމު މަސައްކަތްތައް
- އޮޑިޓް ކުރާ ސަރުކާރު އޮފީސްތަކުން ވޭތުވެ ދިޔަ ފަސް އަހަރުގެ ތެރޭގައި އޯޓީ ފައިސާއަށް ކުރި ހޭދައިގެ އެނަލިސިސް ހެދުން، އޯޓީ އަށް ބަޖެޓު ކުރެވުނު ފައިސާ އަދި އަސްލު ހަރަދު އަޅާކިޔުމާއި މުސާރައިގެ ތެރެއިން އޯޓީ ފައިސާގެ އިންސައްތަ ދެނެގަތުން.
- ސަރުކާރު އޮފީސްތަކުގައި މަސައްކަތް ކުރާ މުވައްޒަފުންގެ ވަޒީފާ ގިންތިކޮށް، އެ މީހުންނަށް އޯޓީ އެލަވަންސް ދިން ސަބަބުތައް ދެނެގަނެ އަޅާކިޔުން.
- އޯޓީ އެލަވަންސް ގިނައިން ލިބޭ މުވައްޒަފުންނަކީ ކޮބައިކަމާއި ކީއްވެގެންކަން ދެނެގަތުން، މުސާރައިގެ ނިސްބަތުން އޯޓީ އެލަވަންސް އިތުރުވާން މެދުވެރި ވަނީ ވަޒީފާގެ މަސްއޫލިއްޔަތުގެ ސަބަބުންތޯ ބެލުން ނުވަތަ މަސައްކަތަށް އެކަށީގެންވާ ވަގުތު ނުދެވޭތީތޯ ނޫނީ އެކަށީގެންވާ ވަރަކަށް މުވައްޒަފުން ނެތުމުގެ ސަބަބުންތޯ ދެނެގަތުން. އަދި އޯޓީ ފައިސާ އާއި ގުޅިގެން އެއްވެސް ކަހަލަ އޮޅުވާލުމެއް ނުވަތަ ނާޖައިޒު މަންފާއެއް ލިބުނުތޯ ދެނެގަތުން.
- އޯޓީ އެލަވަންސާ ގުޅޭ އުސޫލުތައް މުރާޖާކުރުން: ސަރުކާރު އޮފީސްތަކުން ގެންގުޅޭ އުސޫލުތައް މުރާޖާކޮށް މިހާރަށް ވުރެ ހަރުދަނާ ގަވާއިދުތަކަކާއި އުސޫލުތަކެއް އޮޓީ އެލަވަންސާ ގުޅިގެން އެކުލަވާލަން އެޅިދާނެ ފިޔަވަޅުތައް ދެނެގަނެ ލަފާ ހުށައެޅުން. މި މަސައްކަތުގެ ތެރެއިން ކުރިން ހެދި އޮޑިޓްތަކުގައި ރަނގަޅު ކުރަން ބުނި ކަންކަން ތަންފީޒުކުރެވުނީ ކިހާ ވަރަކޮށްތޯ ދެނެގަތުން.
ފިނޭންސުން ބުނާ ގޮތުގައި ސަރުކާރު އޮފީސްތަކުގެ އޯޓީ ފައިސާއާ ގުޅޭ އޮޑިޓް ފަށާނީ އަންނަ އޮގަސްޓް މަހުގެ 1 އިން ފެށިގެންނެވެ. އަދި އޮޓިޑް ކުރާ ފަރާތުން އެ ދުވަހުން ފެށިގެން ހަ ހަފުތާ ތެރޭގައި ފައިނަލް ރިޕޯޓް ނިންމާފައި ފިނޭންސަށް ފޮނުވަން ޖެހެ އެވެ.
