ވޮޝިންޓަން، އެމެރިކާ (ޖުލައި 8) - ފޭސްބުކް، ޓްވިޓާ އަދި ގޫގުލްއާ ދެކޮޅަށް ކޯޓަށް މައްސަލަ ހުށަހަޅަން ނިންމާފައިވާކަން އެމެރިކާގެ ކުރީގެ ރައީސް ޑޮނަލްޑް ޓްރަމްޕް އިއުލާނު ކުރައްވައިފި އެވެ.
ފޭސްބުކް، ޓްވިޓާ އަދި ގޫގުލްގެ އިތުރުން އެ ކުންފުނިތަކުގެ ސީއީއޯއިން ކަމުގައިވާ މާކް ޒަކަބާގް، ސުންދަރް ޕިޗާއީ އަދި ޖެކް ޑޯޒީއާ ދެކޮޅަށް ވެސް މައްސަލަ ހުށަހަޅާނެ ކަމަށް ޓްރަމްޕް ވިދާޅުވި އެވެ.
ޓްރަމްޕްގެ ގޮލްފް ކްލަބްގައި ހުންނަވައިގެން ނޫސްވެރިންނަށް ވިދާޅުވީ ޓެކް ކުންފުނިތަކުން ދަނީ ގާނޫނު އަސާސީއާ ހިލާފަށް "ސެންސަރު" ކުރަމުން ކަމަށެވެ.
މިދިޔަ ޖެނުއަރީ ހަ ވަނަ ދުވަހު އުމުރުން 75 އަހަރުގެ ޓްރަމްޕްގެ ސަޕޯޓަރުން އެމެރިކާގެ ކެޕިޓަލް އިމާރާތަށް ވަދެގަނެ ހިންގި ހަމަނުޖެހުމަށް ފަހު، ޓްރަމްޕްގެ އެކައުންޓުތައް ވަނީ ސަސްޕެންޑުކޮށްފަ އެވެ.
ފޭސްބުކް އާއި ޓްވިޓާއިން އެގޮތަށް ނިންމީ ހަމަނުޖެހުމަށް ހިތްވަރު ލިބޭ ގޮތަށް ތަކުރާރުކޮށް ދޮގު ވާހަކަތައް ޕޯސްޓު ކުރަމުން ދިޔުމުގެ ސަބަބުން ކަމަށް ބުންޏެވެ.
ޓްރަމްޕް ވިދާޅުވީ ކޯޓަށް ހުށަހަޅާ މައްސަލާގައި އެމެރިކާ ފަސްޓް ޕޮލިސީ އިންސްޓިޓިއުޓާއި އެތައް ހާސް އެމެރިކާ ރައްޔިތުން ވެސް ބައިވެރިވާ ކަމަށެވެ. އެ އެންމެންނަކީ ވެސް ސޯޝަލް މީޑިއާއިން "ޑީޕްލެޓްފޯމް" ކޮށްފައިވާ މީހުން ކަމަށް ޓްރަމްޕް ވިދާޅުވި އެވެ.
ކޯޓަށް މައްސަލަ ހުށަހަޅަނީ ފައިސާއަށް މައްސަލަ ދޫކޮށްލާ ގޮތަށް ނޫން ކަމަށާއި ސޯޝަލް މީޑިއާއިން ގާނޫނާ ހިލާފަށް މީހުންގެ ޕޯސްޓުތައް ސެންސަރު ކުރުމާއި، ބްލެކްލިސްޓް ކުރުން ހުއްޓުވާނެ ކަމަށެވެ.
